БЫДСӦНЛӦН АСЛАС ТАЛАНКодыр гӧтраси, вӧлись тӧдмалі, Ӧні нинӧм нин мем и эльтчыны, Вӧлім вичкоын, лои гӧтыра, Енмӧй мыждіс кӧ, пусьы сир пӧртйын! Мед кӧть тайӧс ме босьті кызмырдӧн, Мед кӧть вӧлі ме кыдзкӧ пӧръялӧм, Сійӧ ачым со сідзи бӧрйи ме, Кӧні коліс мем, сэні-й кораси. Сыысь ӧтар тай уна вӧлісны Нывъяс шаньджыкӧсь, таланаджыкӧсь, Видзӧд, немторйӧн босьтны яндзим зэв Ас бур рӧдвужысь, тӧдса войтырысь. Со и бӧрйи ме найӧ кӧр серти, Кыдзи йӧз костын овлӧ ӧтторъя, Бур рӧдвужаӧс, зэв бур нимаӧс; Нимӧн-рӧдвужӧн кӧсйи пӧт лоны. Со и оламӧ лун-лун видчамӧ, Да ас рӧдвужӧн сыкӧд ошйысям, Да мый вӧліс на, ставсӧ видзимӧ, Ыджыд уджйӧзӧ пырим юр вывті... «Ӧні воас кад, лоас сьӧкыдик, Мый нӧ, гӧтырӧй, пондам керны ми?» — Матӧ вои ме! Бур йӧз, висьталӧ, Кыдзи велӧдны мем бӧб верӧсӧс? — «Ой, бур гӧтырӧй, мича баруня! Кодыр чужӧмыд сэтшӧм мывкыдӧн, Мыйла инӧ тэ менсьым юр воштін Паськыд олӧмнад, гӧститчӧмъяснад? Регыд, регыд нин гӧгӧр йӧрмамӧ, Коді отсалас, кытчӧ воштысям?» — Ачыс воштысис гӧгӧр, мывкыдтӧм, Да кузь юрсиысь корсьӧ вежӧрлун!
