ӦМИДЗ
Сиӧма Галя воча чойлы
Тайӧ лоӧмторсяньыс колис пӧшти кык во, но меным сӧмын ӧні лои окота сы йылысь висьтавны...
Кор ме вола чужан сиктӧ шойччӧг коллявны, век гуляйта, шывкъяла фотоаппаратӧн сійӧ местаясті, кодъяс меным челядьдырсянь на донаӧсь.
Дерт, ылӧ кольӧм кадсяньыс сиктыд ёнакодь вежсис. Уна керкаыс эндӧма, тӧдчӧ, мый сэні важӧн нин некод оз ов: ӧшиньястӧ тувъялӧма пӧвъясӧн, а град йӧръяс тырӧмаӧсь петшӧрӧн. Тайӧ петшӧр шӧрас, кытчӧ он видзӧдлы, быдмӧ ӧмидз.
Со и сійӧ гожӧмнас ӧмидз вӧлі зэв бур — мича, гаг йиртӧм гырысь тусьяса. Да сэтшӧм уна, мый пырысьтӧм-пыр окота лои босьтны кутшӧмкӧ доз да чукӧртны вотӧстӧ, нуны сьӧрысь карӧ.
Ыджыд мамлӧн керка дай сыкӧд орчча керка дорті уялыштӧм бӧрын гӧгӧрвои, мый ӧмидз куст дінӧ писькӧдчыны некыдз — петшӧрыс сэн вӧлі меысь ыджыдджык. Сэки аслам ичӧтджык нывкӧд шуи дзужнитны машинаӧн пристань дорӧ, кӧні ӧмидз быдмис дзик туй бокас — сэні петшӧрыд миянлы чукӧртны тусьястӧ оз мешайт.
Сувтӧді машинаӧс керка дорӧ, кӧн коркӧ овліс менам ёрт, сыкӧд велӧдчылім ӧти классын. Пристаньланьӧ сэсся мӧдім нывкӧд подӧн.
Нылӧй босьтчис чукӧртны тусьтӧ туй дор кустъяс вылысь да кольччис, а ме муні водзӧ...
Улич помас сулаліс менам Нина тьӧткалӧн керка: пӧлыньтчӧма, пӧрысьмӧма. Дыр нин татӧн эг вӧв...
Восьті дзиръя да гӧгӧрвои, мый кильчӧ дорӧ ог писькӧдчы — пода туй дзоньнас тырӧма петшӧрӧн. И кӧть пода туй да киссьӧм кильчӧ серти вӧлі гӧгӧрвоана, мый татчӧ важӧн некод эз волы, ӧдзӧс вылын мыйлакӧ ӧшаліс шнич выль томан.
...Тьӧткалӧн вӧлі вурсян машина. Ме кута дум вылын платтьӧ: кельыдлӧз рӧма, пӧшти сӧдз шифонысь. Сійӧс Нина тьӧт рытывбыдӧн вурис меным детсадса лэдзан лун кежлӧ ас ыджыдджык нылыс платтьӧысь.
Платтьӧ вӧлі дзик дзуввидз — та вӧсна сы улӧ мамӧй пасьталіс меным еджыд майка.
Детсадйысь лэдзан лунӧ ме вӧлі медся мича нывкаӧн, платтьӧ вӧлі бальнӧй, пушыд юбкаа — татшӧмыс некодлӧн эз вӧв!..
— ... Мый, бара-й, сэн шывкъялӧны? Бокӧвӧй йӧз... — кылі ме...
Меысь неылын сулалісны кык нывбаба. Найӧ сёрнитісны вель гораа, сы вылӧ явӧ надейтчӧмӧн, мый найӧс кыласны. Ӧти нывбабасӧ пыр и тӧді: менам томдырйи сійӧ разӧдіс тані пошта. Дерт, ӧні Вера тьӧт вӧлі пенсия вылын нин.
— Карсаяс... Ӧмидз вотӧны. Со, йӧз керка дорас кыйкъялӧны! Ӧмидз налы колӧма! Мед мунӧны асланыс карӧ да сэн и вотчӧны!
Тайӧ кывъясӧн шыбитчӧм бӧрын нывбабаяс разӧдчисны-мунісны: ӧтикыс ӧтикланьӧ, мӧдыс мӧдланьӧ.
А ме тайкӧ эг бӧрддзы, зэв окота вӧлі горӧдны бӧрсяньыс: «Вера тьӧт, кутшӧм нӧ ме тӧдтӧм, бокӧвӧй, тайӧ ӧд ме, Алена!»
Сэккості нылӧй, ӧмидз тыр дозъя, матыстчис ме дорӧ. Сійӧ ставсӧ кывліс, и кӧть коми кыв оз тӧд, нывбабаяслӧн гора гӧлӧс серти гӧгӧрвоис, мый найӧ явӧ дузӧмаӧсь йӧз йӧрӧ кортӧг пырӧмысь. Нылук кыскыштіс менӧ соскӧд машиналань...
... Варенньӧ, кодӧс ме пуи ӧмидз тусьясысь, вӧлі неуна кургов, и ме тӧда, мыйла.
P.S... Ӧні Нина тьӧт керкаас олӧ пошта разӧдысь Вера тьӧт...
