ВӦРАЛЫСЬ, СНАЙПЕР
Олӧ-вылӧ Кулӧмдінса Мыс сиктын морт. Важӧн нин квайтымынысь йӧткыштчис, сизимдаслань матыстчӧ.
Тайӧ мортыс — Серафим Григорьевич Опарин, буретш сійӧ видзӧдӧ миян вылӧ снимок вывсянь. Вӧралысьлӧн да снайперлӧн лэчыд синъясӧн видзӧдӧ. Ми аддзам Серафим Григорьевичлӧн морӧс вылысь уна боевӧй награда, на лыдын Боевӧй Краснӧй Знамя орден. Сійӧн коми снайперӧс наградитісны немецкӧй фашистъясӧс бура дітшйӧдлӧмысь.
Со мый та кузя гижліс 1942 воын ноябрь 16-ӧд лунся номерын «Правда» газет: «Калининскӧй фронт вылын боецъяслӧн котыр, Панченко ёртӧн юрнуӧдігӧн, уськӧдчыліс враглӧн гарнизон вылӧ. Разведчикъяс сотісны танк да жугӧдісны немецкӧй батальонлысь штаб. А капитан Сурановлӧн снайперъяс ӧти лунӧн виисны 52 гитлеровецӧс, ӧтнас Опарин ёрт лыйис нёльӧнӧс. Ӧні сылӧн ставсӧ лон нин виӧма 303 фашистӧс».
Татшӧмтортӧ, дерт, эз быдӧн вермыв вӧчны. Татшӧмтор вылад колӧ вӧлі повтӧмлун и мудерлун, а сідз жӧ лэчыд син да бур сой вын.
Буретш ставыс тайӧ и лӧсяліс коми зон Серафим Опаринлы. Ӧд сійӧ дас арӧссянь уяліс-вӧраліс парма ягъясті, мыйта зверь-пӧткаӧс лыйис война вылӧ мунтӧдз.
— Заводитлі вӧравны кремневка-пищальӧн, — зэв нимкодьпырысь казьтылӧ Серафим Григорьевич. — Пуысь сизьдӧм порошнича кыскалан, сутуга моз нюжӧдӧм свинеч. Зарадитігӧн свинечсӧ пуля мында курччан да и сюян стволӧ. Урыдлы вӧлі лыя со кыдзи: боксяньыс кӧ — пель вужъяс, а водзсяньыс кӧ — кык син костас. Мед не тшыкӧдны кусӧ. Тайӧ менӧ бура велӧдіс лыйсьынытӧ.
— Ошъяскӧд, дерт, ковмыліс жӧ паныдасьлыны? — юася. — Сы дыра вӧралігӧн?
— А кыдзи нӧ... — муртса тӧдчана нюмъёвтӧ Серафим Григорьевич. — Дас кыкӧс лыйлі... Эг повлы ошсьыд, кӧть эськӧ сылӧн черыс и пуртыс век сьӧрсьыс. Метра дас-дас витӧдз вӧлі сибӧдча, мед нин бурджыка веськавны. Лыйтӧдзыд сійӧ оз уськӧдчы морт вылад, ачыс дзӧръялӧ пышйыны. Ранитан кӧ, сэки жӧ пурас-а...
Фронт вылын вӧралысьлы сетісны оптическӧй прицела снайперскӧй винтовка, и ковмис кыйӧдчыны кык кока зверьяс бӧрся. А найӧ мудерджыкӧсь вӧлӧмаӧсь ошкысь и туланысь, асьтӧ кокыштны кыйӧдчӧны, немецыдлӧн снайперъяс ӧд абу жӧ йӧйӧсь.
«Правда» газетын гижлӧм бӧрын нӧшта на уна немецӧс чергӧдіс снайпер Опарин, сэсся весиг пикируйтысь самолёт уськӧдіс. Снайперскӧй винтовкасьыс жӧ бензобакас лыйӧмӧн. Войналӧн сьӧкыд туйяс вылын унаысь ранитчыліс, бӧръяысьсӧ Польшаын, муртса эз кув, дыр куйліс госпитальын...
А Отечественнӧй войнаӧдз Серафим Григорьевич вӧвлі и действительнӧй служба вылын армияын, и финнъяскӧд война вылын.
Сідзкӧ, позьӧ шуны, би пырыс и ва пырыс мунӧм коми мортӧс ми аддзам журнал мышкын фото вылысь.
