КЫПЫД ГОРА ДЗОЛЯ ЁЛЬ
В. Е. Пантелеевалӧн паметьлы

«Парма ёльыс» быттьӧ-й муртса письтіс,
Муртса аддзис аслыс зумыд под.
Кыпыд горыс сюрӧма тай кыськӧ,
Гора шысьыс енэжыс кӧть пот.

Йӧзкост сьылан — мед кӧть кутшӧм кывъя —
Век тай муса: вильышсор ли рам,
Сьылан босьтас аслас небыд сывйӧ —
Быттьӧ кутлас морӧс бердас мам.

Енэжтассӧ вештас ылӧ-ылӧ,
Олӧмыслысь помтӧм восьтас эрд.
Но а кодыр норджык шыыс кылас,
Сьӧлӧмыд сэк синваасьлас, дерт.

Нывъяс котыр — Летка юлӧн быдтас —
Сьылан ключысь чужтіс «Парма ёль»,
Медым сылӧн шоныд горысь быдӧн
Мичлун дорас веськодьӧн оз коль.

Визувт-юргы, сӧстӧм «Парма ёльӧй»,
Вужля костӧ сибдыны эн лысьт.
Мед тэ ӧні арлыд серти дзоля,
Но и томӧн ло тэ сё во мысьт.