МАТИ

Меным ӧти висерса висьтавліс. Батьӧкӧд пӧ каям Лымва пыр Помӧсдінӧ. Сэті ӧд веськыд туйӧдыс матын, Кулӧмдінӧд ӧд кутшӧм кузь туйыс. И сэті век вӧлі Помӧсдінӧ подӧн ветлӧны. И сэк пӧ ме кывлі Мати йылысь, кутшӧмкӧ тшыкӧдчысь вӧлӧма. В самом деле вӧлі.

Батькӧд вӧлі каям да охотничӧй керкаӧ пырим узьны. Охотникыс ачыс сэні жӧ. Но, нар вылӧ водан, сэтчӧ ӧд куим морт и тӧрӧ. Сэсся бать да охотник пӧ ас костаныс сёрнитісны, и бать коркӧ унмовсис, а ме ог узь. И друг охотник понйыскӧд кутас сёрнитны, шуас: талун пӧ Матиыд локтас да шор вомӧныс пӧ эськӧ вуджанін эм, ӧти кер чӧвтӧма, но кер вывтіыс пӧ сійӧ оз лысьт вуджны, вильдӧмысь полӧ. А таті весьтасӧдыс пӧ эн лэдз, сэк пӧ пӧгибӧ воам ставным.

Сэсся коркӧ войнас понйыс ёна увтчыны кутіс да ав-авӧн пӧ петіс, и кылӧ зверлы моз сёйӧмӧн сёйӧ. Кытчӧкӧ выліӧ кайисны. Увтӧм шыыс век ылыстчӧ. Сэсся понйыс коркӧ воис да ставнас ва, войнас ӧд вӧрыс лысваа, лысваӧдыс сідзи кӧтасьӧма. А охотник пӧ шуӧ вӧлӧм: «Но и молодеч тэ, эн лэдз. Лэдзин кӧ, миянӧс эськӧ сёйис».

Нимнас на понсӧ шуис да вот ог нин помнит. Эз эськӧ и гораа сёрнит, а страшнӧ кодь жӧ лолі.

Матиыс сійӧ вроде кӧлдун. Охотникыс эськӧ тожӧ кӧлдун, но слабджык. Шулӧны тай ӧтияс вынаджыкӧсь, мӧдъяс слабджык овлӧны. Охотниксӧ понйыс толькӧ спаситӧма.