КӦРТКЕРӦС ЙЫЛЫСЬ

Зэв нин важӧн первой Кӧрткерӧс кыр йылас локтас ӧтик беглӧй морт. А водзын ӧд сійӧ беглӧй мортыс вӧлі шуӧны казакӧн, вот, кодъяс Дон вылӧ пышйылісны. И быттьӧкӧ ӧтик сэтшӧм беглӧй морт веськалӧ Кӧрткерӧсӧ. И сэтӧн овмӧдчас...

Казак стрӧитчас Кӧрткерӧс катыд помас да кутас сэн овны. А сэті ставыс гӧгӧр вӧр. Сэсся коркӧ кутас ӧтик асылӧ кӧнкӧ кывны петук шы. Сійӧ сэсся босьтас чер и черӧн мӧдӧдчас петук шы вылад мунны. Но сійӧ лӧсас вӧчалӧ, медым не вошны, лӧсасӧн пасъялӧ ассьыс туйсӧ. Мунӧ и веськалӧ аслас сусед дорӧ, кодкӧд ӧти кадӧ овмӧдчылӧмаӧсь да тӧдсаӧсь нин вӧлӧмаӧсь. Из Юр нимаыс сувтас Кияӧ, юас пырас да сэтчӧ сувтас, а мӧдыс, казакыд, каяс-катас Эжва кузя да вылӧ сувтас. Вот вӧлӧм ӧта-мӧдыскӧд найӧ аддзысьны локтӧны. Кия юыс усьӧ Эжваас, и йылыс Эжваыслӧн ӧтлаасьӧ да Эжва кузя кӧ кывтны да Кия кузя катны, вывті ылын, гашкӧ, дзонь сутки колӧ мунны, а лӧсас туй кузяыс ӧти здукӧн и воас…