"ИЧӦТЫСЯНЬ МЕНӦ МЕДСЯ..."

Ичӧтысянь менӧ медся ёна кыскис книгаяс дорӧ. Сиктса библиотеканым, а быдми ме Емдін районса Лыаты сиктын, вӧлі зэв озыр. Ме сэні, буракӧ, вӧлі медся зіль лыддьысьысьнас. Ачымӧс тай сӧмын библиотекаысь да гортын книга сайысь и помнита-а. Сідзи и кӧсйи век овны книгаяс дорын. Сы вӧсна и школа бӧрын сеті документъясӧс культура училищеӧ библиотечнӧй факультетӧ. Лэччи бӧр гортӧ и век ёна майшася: сідз-ӧ ме вӧчи. Сэсся экзаменъясӧдзыс на бӧр босьті документъясӧс да нуи пединститутӧ: кӧсйыссис босьтны ыджыд тшупӧда филологическӧй образование.

И пединститутыс мыйлакӧ меным вӧлі ас. Гашкӧ, сы вӧсна, мый менам бать, Козлов Василий Петрович, 38 во чӧж учителяліс (1932 воын пыралӧма жӧ институтас, но ӧткымын помка вӧсна абу помавлӧма сійӧс), пединститутын жӧ велӧдчыліс и менам ыджыдджык чой Валентина. Тадзи ме лои пединститутса студенткаӧн.

Медся донаӧн да асӧн меным лои ичӧт лыда группаным. Институтын тайӧ вӧлі медбӧръя коми группа, сэсся мӧд воас сійӧс вуджӧдісны университетӧ и коми филологиясӧ мӧдісны велӧдны сэні.

Кодкӧд ӧтлаын велӧдчи — ӧнӧдз бур кывйӧн казьтыла и аддзысьлам матысса йӧз моз.

Филология тӧдӧмлунъясысь кындзи институтыс сетіс мирсӧ, обществоыслысь оланногсӧ гӧгӧрвоӧм, мӧд ногӧн кӧ шуны, миянӧс верстяммӧдіс, таысь ыджыд аттьӧ велӧдысьяслы. Торъя шоныда окота казьтыштны шонъянӧй Тамара Александровна Скибаӧс, кураторнымӧс, коді миянӧс, сиктысь воӧм том йӧзӧс, став сьӧлӧмсяньыс чуйдӧдіс да ышӧдіс бурас.