КОМАНДИР

І

Урокъяс помассьӧм бӧрын коймӧд класса велӧдчысьяс дорӧ пырис школаса пионервожатӧй Лида.

— Октябрята, — шыасис сійӧ, — Ленин чужан лунӧ тіянӧс примитам пионеръясӧ.

— Ура! — горӧдісны челядь.

— Но огӧ ставнытӧ, — торкис Лида класслысь радлунсӧ, — сӧмын найӧс, кодъяс бура велӧдчӧны да активнӧйӧсь.

— А ми кӧсъям, мед миянӧс ставнымӧс примитісны, — сувтіс аслас парта сайысь Миша, рудов юрсиа да мугов чужӧма детинка.

— Ставнытӧ-ӧ? — нюркнитіс пионервожатӧй. — Он на ставныд туйӧй. 7-ӧд класса велӧдчысьяс висьтавлісны пионеръяс йывсьыс?

— Да! — горӧдіс кодкӧ бӧръя парта сайысь.

— Сідзкӧ ті бура тӧданныд, кутшӧмӧсь пионеръясыд. А тіян классын эмӧсь на и дышӧдчысьяс. Со кӧть Вася Прокушевӧс босьтам, — индіс Лида неыджыд тушаа, еджгов юрсиа гӧгрӧс чужӧма детинка вылӧ, коді сы видзӧдлӧмысь гӧрдӧдіс да лэдзис чужӧмсӧ дзик парта бердӧдзыс. — Омӧля велӧдчӧ. А кодлӧн дваяс эмӧсь, найӧс ми пионерад огӧ примитӧ. Да и кутшӧм бурторъяс ті вӧчинныд? Вот тэ, Миша, сувт да висьтав, кутшӧм буртор тэ вӧчин колян вежонас?

— Ме? — паймыштіс Миша, — ме... гортӧ пес пыртла, няньла лавкаӧ ветла...

— Гортад отсасьӧмыд эськӧ и зэв буртор. Но этша тайӧ. Тэ сӧмын ас гортад уджалін. А сэсся кодлы бурсӧ вӧчин? Школалы мый вӧчин? Суседъясыдлы? А пионерлы колӧ лоны став челядьлы примерӧн. Гӧгӧрвоинныд? Думыштлӧй, апрель 22-ӧд лунӧдз коли кык вежон, — шуис Лида да пӧдлаліс ас бӧрсяыс ӧдзӧссӧ.

Классын пуксис чӧв-лӧнь.

Нина Григорьевна, учительницаыс, сулаліс ӧшинь дорын да видзӧдіс класс вылӧ, быттьӧ мыйкӧ виччысис челядьсянь.

— А ме чайта, тадз век жӧ неправильнӧ. Колӧ став класслы лоны пионеръясӧн, — пӧся шуис Миша.

— Кыдз нӧ став класслы? Тэн жӧ лючки шуисны: бура велӧдчысьясӧс да активнӧйясӧс примитасны, — юрнас довкнитіс класса отличница Ира Попова.

— Челядьӧ, энӧ вензьӧй, — шыасис медбӧрын учительница, — вайӧ ставӧн мӧвпыштлам, мый позяс вӧчны, медым ставнымлы ӧттшӧтш пырны пионерӧ.

— Медпервой колӧ ставлы бура велӧдчыны, — бара шыасис Ира.

— Правильнӧ, — сы дор сувтіс учительница. — Коді эськӧ тіян пиысь содтӧд занимайтчыштас Вася Прокушевкӧд математикаысь да кыв кузя?

Класс джынйыс лэптіс ки,

Отсасьысьнас индісны Таняӧс, ыджыд сьӧд синъяса да збой нывкаӧс.

— А асылӧдз думыштлӧ, — водзӧ сёрнитіс учительница, — кутшӧм бур делӧяс ті верманныд вӧчны. Асыв быд звездочка висьталас. А ӧні мунӧ гортад да бура велӧдӧ урокъяс.

ІІ

Миша вӧчис урокъяс, пыртліс пес, ветліс няньла да пуксис лыддьыны книга Гаврош йылысь. Книгаыс вӧлі ёнакодь бонзьӧма, вылыс листыс торъялӧма. Но Миша та вылӧ эз видзӧд, сылы вӧлі окота тӧдны, мый водзӧ лоӧ Гаврош нима детинкакӧд. Кор книгаыс помассис, Миша дыр пукаліс чӧв, мӧвпаліс выльӧн лыддьӧм йывсьыс. И библиотекаӧ книгасӧ вежны мунігӧн син водзсьыс эз вешйыв повтӧм да бур сьӧлӧма Гаврош нима французскӧй детинкаыс.

Миша матыстчис библиотекарь пызан дорӧ да пуктіс вайӧм книгасӧ. Мария Николаевна видзӧдліс книга вылӧ, сэсся детинка вылӧ да скӧрысь кодь шуис:

— Мыйла нӧ косявлін книгасӧ?

— Ме эг косявлы, — тэрыба вочавидзис Миша, — ме татшӧмӧс нин и босьтлі.

— А кӧть и татшӧмӧс. Гортад колӧ вӧлі мичаа клеитны косяссьӧминсӧ еджыд кабалаӧн.

— Ме либӧ бӧр гортӧ нула да клеита, — кӧсйысис Миша.

— Но эн нин либӧ нулы, тані бурдӧдам книгасӧ. Лок ме велӧда, кыдзи колӧ.

Регыд книгаыс лои бӧр крепыд, еджыд кабалаыс мичмӧдіс гӧрд эжсӧ.

— Мария Николаевна, а тіян уна татшӧм косясьлӧм книгаыс?

— Уна. Талун со нарошнӧ торйӧдлі. Быдса чукӧр лои.

— А кытчӧ сійӧ косясьлӧм книгаяссӧ воштанныд?

— А вот ог тӧд. И ӧтнамлы мен тайӧс дыр лоас лӧсьӧдлынысӧ.

— Мария Николаевна, ми асыв волам став классӧн да отсалам, — кӧсйысис Миша.

— А волӧй и эм. Ме клейстер пуа. И выльмӧдам книгаяссӧ.

ІІІ

Мӧд луннас став классыс сёрӧдз уджаліс библиотекаын. И челядь зэв сьӧлӧмсяньыс дзоньталісны книгаяс. Квайтымын вит лечитӧм книга бӧр сувтісны джаджъяс вылӧ. Мария Николаевна ёна ошкис отсасьысьясӧс.

Удж бӧрын Миша зэв радпырысь восьлаліс гортас. Сьӧлӧм вылас вӧлі кыпыд. Ывлаыс лунся ульсавлӧм бӧрас кӧдздӧдӧма, туйясыс йизьӧмаӧсь, кӧть конькиӧн ислав.

Мишалӧн мамыс уджаліс детсадйын воспитательницаӧн. И детинка гортас мунігмозыс кӧсйис пыравны сы дорӧ, ошйысьыштны талунъя лунӧн.

Детсад йӧрӧ пырис котӧрӧн. Дзиръя дорас жӧ и вильдіс да зэв чорыда шнёпкысис-уси. Мамыс дорӧ пырӧм мысти ошйысьӧм пыдди норасис усьӧм вылӧ.

— Кынмӧма? Сэтшӧм вильыд? А кыдз бара посни челядьнас мӧдасны мунавны садиксьыс? — мӧдіс маитчыны Мишалӧн мамыс. — Мишук, вай тэ босьт кӧрт зыр сарайсьыс да жугӧдлышт йисӧ кильчӧ да дзиръя дорсьыс. Мед йӧзыс оз усьны.

Миша петіс ывлаӧ, корсис сарайысь кӧрт зыр да мӧдіс зутшйӧдлыны йизьӧм туйсӧ. Посни-посни йи торъяс резсисны быдладорӧ. Регыд детинкалӧн мудзис киыс, но сійӧ уджсӧ эз эновт. Медбӧрын детсадйысь петан туйыс лои серӧсь.

— Ӧні бур лои, — радліс детинка, — некод оз мӧд усявны. А мый, асыв кӧ став классӧн волам татчӧ да челядьыслысь гуляйтанінсӧ серӧдлам.

ІV

Уджалан кӧлуйыс ставлы эз тырмы. Челядь, кодъяс олісны матын школа да детсад дорын, гортсяньыс вайисны кӧрт зыръяс, а Вася Прокушев босьтӧма весиг ичӧтик кокньыдик чер. Мыйсюрӧ босьтісны садса сарайысь, но век жӧ ставӧн уджавны эз вермыны.

Миша зэв сьӧлӧмсяньыс зутшйӧдліс йизьӧм лымсӧ исласян кыр дорын. Вася сэні жӧ кераліс йисӧ кыр йылас каян содъяс вывсьыс.

— Исласьыштам, — шуӧ Вася.

— Эштӧдам да. А то мӧдам кӧ исласьны, уджыд вунӧ, — лӧньӧдіс сійӧс Миша.

Друг детинкаяс кылісны нывкаяслысь шум. Таня да Ира кутчысьӧмаӧсь ӧти зырйӧ.

— Вай, мися, ме уджышта, — кыскыштіс асланьыс зырсӧ Ира.

— Ме жӧ шуи, эг на мудз, — эз сет Таня.

— Абу тэнад зырйыс, ачым гортысь вайи, — бара нетшыштіс Ира.

— Но и мый, — эз сдайтчы Таня, — мудза и сета. А тэ шойччышт.

— А уджавтӧгыс меным тан нинӧм вӧчнысӧ, — лётнитіс юрсӧ Ира, да мӧдӧдчис дзиръялань. — Зырсӧ ачыд гортӧдз ваян.

— А вот и ог. Лоӧма принцесса! Татчӧ сараяс пукта. Ачыд волан. Принцесса, — нӧшта ӧтчыд нимтіс Таня.

— А позис и сетны, — шыасис Миша, — ӧчередьӧн колі уджавны.

— Да ачыс меным зырсӧ вӧзйис, — вочавидзис Таня. — Куимысь тувкнитіс да мудзи пӧ. А сэсся уджавныс эз мӧд сетны. Мед гортас дізьвидзӧ. Ёна тай, сытӧг лӧсьыдджык.

Но челядьлӧн кыпыдлуныс воши. Весиг ӧти мортлӧн мунӧмыс торкис ӧтувъя уджсӧ.

V

Пионерскӧй сбор бӧрын ставӧн бӧр пырисны классӧ. Миша пуксис ас местаас Танякӧд орччӧн. Нимкодьысла детинка эз вермы топӧдны вомсӧ. Нюмъявсис. Ӧд примитісны! Примитісны пионерӧ! И став классӧ. Ӧні морӧс выланыс кутасны быд лун новлыны гӧрд галстук. Пионерскӧй галстук! А пеляс век на чуналісны горн да барабан шыяс. И некор оз вун медводдзаысь салют сетӧм.

Медбӧрын классӧ пырис Нина Григорьевна. Сійӧ тшӧтш нюмъяліс.

— Чолӧмала тіянӧс, челядь, — шыасис сійӧ класс дінӧ. Со и ті лоинныд пионеръясӧн. Некор энӧ уськӧдӧ пионерлысь ним. А ӧні миян колӧ бӧрйыны командирӧс. Кодӧс ті инданныд, челядь?

— Колӧ бӧрйыны медся бур велӧдчысьсӧ, — сувтіс Ира, — сы вӧсна, мый пионеръяслӧн медся главнӧй могыс — велӧдчӧм.

— Тэнӧ? — пыльснитіс Таня.

— А кӧть и... — пуксис бӧр места вылас Ира.

— А ме думысь, — чеччис места вывсьыс Вася Прокушев, — Ираӧс бӧрйыны оз ков. Сійӧ муніс, кор ми ставным уджалім детсад йӧрын.

— Сійӧ медбура велӧдчӧ, — горӧдіс кодкӧ ӧшинь дор радысь.

— Но и мый? Колӧ бӧрйыны Таняӧс. Сійӧ меным ёна отсаліс математикаысь. И уджаліс бура, — шуис Вася да пуксис ас местаас.

— Ті нӧ мый? — бергӧдчис класс дорӧ Таня. — Мыйла менӧ командирас бӧрйыныс? Ме кӧсъя тіянлысь юавны: коді нуӧдіс миянӧс библиотекаӧ?

— Миша, — горӧдісны челядь.

— А детсадйӧ?

— Миша, — бара кыліс дружнӧй шуӧм.

— А коді медводз думыштіс, мед став классӧс примитісны пионерӧ?

— Миша, Миша, — гыаліс класс.

— Сідзкӧ Миша и командирыс, — помаліс Таня да пуксис парта сайӧ.

— Правильнӧ, правильнӧ, — горзісны нывкаяс да зонкаяс.

Миша пукаліс нюмъялігтыр да яндысьыштӧмысла юрсӧ лэдзыштӧмӧн. Челядьӧс лӧньӧдны ковмис Нина Григорьевналы:

— Бур, челядь, мед Миша лоас командирӧн. И мед тіянӧс ставнытӧ ышӧдас уна буртор вылӧ.