ТУЙ ДОР БАДЬ
ВОРСЫСЬЯС:
АВЕНИР — лэдзчысьӧм морт, 50 арӧса.
ДМИТРИЙ ВИТАЛЬЕВИЧ ПОМЫСОВ — депутат, 50 арӧса.
НИКОЛАЙ НИКОЛАЕВИЧ ДУРКИН — вузын велӧдысь, 50 арӧса.
ВЕНИАМИН ПРОКОПЬЕВИЧ МАКСИМОВ — рабочӧй, 50 арӧса.
ИВАН НАЗАРОВИЧ — следователь, ар дасӧн томджык.
ЭДИК — Помысовлӧн пи.
НИНА — Дуркинлӧн гӧтыр.
ИРИНА — Дуркинлӧн ныв.
МАША — Максимовлӧн гӧтыр, инвалид, коктӧм.
ВЕРА — 16 арӧса ныв.
НАТАША — Авенирлӧн ныв (Верасӧ да Наташасӧ ворсӧ ӧти морт).
ТОМ ЗОНЪЯС — нёльӧн (вермасны ворсны Авенир, Помысов, Дуркин, Максимов).
МЕДВОДДЗА ДЕЙСТВИЕ
Первой петкӧдчӧм
Следовательлӧн сӧстӧм да югыд кабинет. Пызан, улӧс, телефон, дзоридзьяс.
Иван Назарович пукалӧ пызан сайын, гижӧ.
Кылӧ ӧдзӧсӧ тотшкӧдчӧм шы, кодкӧ юалӧ: «Позьӧ?»
ИВАН НАЗАРОВИЧ. Да-да, пырӧй.
Пырӧ Авенир, киас чабралӧ важиник кепка.
АВЕНИР (вежавидзӧмӧн). Видза оланныд.
ИВАН НАЗАРОВИЧ. Видза-видза. Пуксьӧй. Мый-кутшӧм могӧн?
Авенир пуксьӧ.
АВЕНИР. Локті со сетчыны. Судитӧй, мыжа.
ИВАН НАЗАРОВИЧ (дугдӧ гижны). Но? Пыр и пуксьӧдны?
АВЕНИР. Ог сэсся вермы ме овнысӧ. Ог вермы.
ИВАН НАЗАРОВИЧ. Мыйӧн нӧ сэтшӧмасӧ мыжмин?
АВЕНИР. Лолӧй висьӧ.
ИВАН НАЗАРОВИЧ. Врач дорӧ колӧ шыасьны.
АВЕНИР. Оз. Татчӧ колӧ. Кык туй меным: либӧ петляӧ юрӧс сюйны, либӧ тюрмаӧ мунны. Бӧрйи мӧдсӧ.
ИВАН НАЗАРОВИЧ. Некод на ас вӧляысь тюрмаӧ эз вӧзйысьлы.
АВЕНИР. Пукала тюрмаас, да, гашкӧ, грекӧй мынас, сьӧлӧм вылын кокниджык лоӧ, да олышта на. Лолалышта на вӧльнӧй сынӧднас кокни лолӧн. А ӧні ог вермы.
ИВАН НАЗАРОВИЧ. Ме следователь, Иван Назарович. Тіян нимыд, овыд?
АВЕНИР. Авенир менам нимӧй. Авенир Васильевич Попов, 50 арӧса.
ИВАН НАЗАРОВИЧ (гижӧ). Но, висьталӧй, мыйӧн мыжминныд.
АВЕНИР. Тайӧ... Мыйкӧ... Тайӧ важӧн нин вӧлі. Уна во сайын. А овнысӧ оз сет. Нӧшта и нылӧй аслам сы вылӧ мунӧ. Пӧгибӧ вои.
ИВАН НАЗАРОВИЧ. Стӧчджыка, стӧчджыка. Абу гӧгӧрвоана.
АВЕНИР. Ми... Эсійӧ... Мыйкӧкерим... Но...
ИВАН НАЗАРОВИЧ. Но висьтав нин, висьтав.
АВЕНИР. Но... Мырдӧналім ми нылӧс. Ме эськӧ эг, но сэн жӧ вӧлі.
ИВАН НАЗАРОВИЧ. Кор? Кӧні? Кодъяс?
АВЕНИР. Кӧччой сиктын... Комын во нин сэксянь коли.
ИВАН НАЗАРОВИЧ. Кымын, кымын?
АВЕНИР. Комын, стӧчджыка кӧ, комын куим.
ИВАН НАЗАРОВИЧ. Дыр жӧ тэ локтӧмыд. Комын куим во чӧж.
АВЕНИР. Туйыс кузь вӧлі. Комын куим тулыс нин сэсянь коли. Комын куимысь чӧд дзордзавліс.
ИВАН НАЗАРОВИЧ. Кутшӧм чӧд? Мыйла чӧд?
АВЕНИР. Сэк чӧд вӧлі дзордзалӧ. Став муыс югыдгӧрд пӧнарика.
ИВАН НАЗАРОВИЧ. Чӧд дзордзалӧ... Мыйкӧ тай висьталас.
АВЕНИР. Ставсӧ висьтала. Ставсӧ.
ИВАН НАЗАРОВИЧ. А ӧні кывзы менӧ, Авенир Васильевич. Татшӧм важся мыжтӧ ми ог нин видлалӧй. Кызь вит во кӧ мыжаыс оз сюр, тупкам делӧсӧ да сетам архивӧ. И пом. Сідзкӧ, ковмас тэныд тайӧ грекнас овны и кувны.
АВЕНИР. Ог, ог вермы. Ме пӧда. Босьт менӧ тюрмаӧ, ме грекӧс вешта.
ИВАН НАЗАРОВИЧ. Гректӧ вештӧм могысь тэныд колӧ вичкоӧ мунны.
АВЕНИР. Да пырттӧм ме, пырттӧм. Абу енлӧн пи. А пырттӧгыс вичкоас оз позь пырнысӧ. А пыртчынысӧ грекыс оз сет. Вот, сэтшӧм кытш артмӧ. Он кӧ босьт менӧ, пӧда. Лолавнысӧ меным нинӧмӧн, сынӧдыс оз тырмы.
ИВАН НАЗАРОВИЧ. Ӧнӧдз тай лолалӧмыд. Абу на пӧдӧмыд комын сайӧ воӧн. Сідзкӧ, ӧні он нин пӧд.
АВЕНИР. Да тэ кывзы менӧ. Ог тӧд, восьтан он делӧсӧ. Но тэ кывзы, сэсся тэнад сӧвесть вылын лоӧ, восьтан ли, он ли. Зэв ёна кора: кывзы.
ИВАН НАЗАРОВИЧ. Но, висьтав, кывза.
АВЕНИР. Меным сэки вӧлі дас сизим арӧс. И сылы, Вералы, сы мында жӧ. Гӧгрӧс чужӧма, еджыд кузь юрсиа мичаник ныв. А синмыс, синмыс... лӧзсьыс-лӧз, быттьӧ кисьмӧм чӧд тусь. Орчча классын велӧдчис. Сэтшӧма сьӧлӧм вылӧ мӧдіс воны, лун ни вой эг казяв. Сӧмын сійӧ син водзын. Ёртъясӧйлы восси, а Вера дорӧ матыстчыны пола.
ИВАН НАЗАРОВИЧ. Эн татшӧм кузя.
АВЕНИР. Да, да. Ог. И вот ӧтчыд аддзи: Вераӧс зон колльӧдӧ, сылӧн классысь жӧ. Ёна менӧ парскис, сьӧлӧмӧс дойдіс. Керкаыс Вералӧн сикт помас, мукӧд керкасьыс торйӧн сулалӧ, вӧр ді торйӧдӧ. Кыйӧдчи. Зонмыс оз дзик керка дорӧдзыс колльӧд, а сикт помӧдзыс. Буракӧ, нылыс батьсьыс полӧ вӧлі, оз лэдз горт дорӧдзыс колльӧднысӧ. А ме кок улысь мусӧ ог казяв, кыдзи и ветлӧдла му вывтіыс. Мый мекӧд лоис? А сэсся и ёртъяс шуӧны, вай пӧ кутам Вератӧ да сёрнитыштам, мед ёна вылӧ оз пуксьы.
ИВАН НАЗАРОВИЧ. Ті водзвыв сёрнитчинныд нывсӧ мырдӧнавны?
АВЕНИР. Эг. Сэтшӧм сёрни эз вӧв. Ми сӧмын кӧсйим ӧлӧдны сійӧс.
ИВАН НАЗАРОВИЧ. Водзӧ.
АВЕНИР. Тулыс вӧлі. Школа помалан кад. Экзаменъяс. Югыд войяс.
ИВАН НАЗАРОВИЧ. Дженьыдджыка, дженьыдджыка.
АВЕНИР. Мунім ми зонъяскӧд сійӧ керкадорса вӧрас, Вераӧс виччысям. И вот Вера локтӧ зонмыскӧд, Андрейкӧд. Ми кыйӧдчам. А найӧ ми син водзын кутчысьлісны да окасисны. Гашкӧ, медводдзаысь. Ӧні ме гӧгӧрвоа: гашкӧ, Вераыс сэки медся шуда вӧлі. А ми... Ме киӧс чабырті: кыдзи сійӧ лысьтӧ окасьны... Мӧд зонкӧд... Вежӧрӧй пемдіс. Ме чайта, зонъяскӧд тадзи жӧ вӧлі. Ӧд миянӧс некод на эз окавлы. Торйӧдчисны найӧ, а ми, кыр понъяс моз, вочаалім.
Авансцена. Том зонъяс вочаалісны Вераӧс.
ӦТИ ЗОН. Окассис?
МӦД ЗОН. Сэсся микӧд окасьыштам.
Вера бӧрыньтчӧ.
КОЙМӦД ЗОН. Мекӧд чӧскыдджык.
ВЕРА. Мунӧй, зонъяс, мунӧй кытчӧ мӧдӧмныд.
ӦТИ ЗОН. Тэкӧд окасям да вӧлись.
Мӧд зон босьтӧ сійӧс киӧдыс.
Вера нетшкысьӧ. Мынтӧдчӧ да котӧртӧ. Зонъяс сы бӧрся.
Следовательлӧн кабинетын.
АВЕНИР. Сійӧ нетшыштчис да мӧдіс котӧртны. Ми сы бӧрся. Вера уси. Ми уськӧдчим сы вылӧ. Ме мӧді сійӧс окавны. Кодкӧ косяліс ковтасӧ, тыдовтчис сылӧн морӧсыс. Чужъясигас да мездысигас лэптыссис юбкаыс. Зонъяслӧн, дерт, вежӧрыс пемдіс. Вера сьӧласис, курччасис, но эз горзы. Буракӧ, яндзимысла. Ме окалі чужӧмсӧ, синъяссӧ, а Митя... первойӧн. Кор казялі, мый лои менам муса нывкӧд, ме скӧрысь уськӧдчи Митя вылӧ, но менӧ кодкӧ сконъяліс, ог тӧд, Коля либӧ Веня, кодкӧ вартіс юрӧ. Ме мыйкӧдыра кежлӧ воштылі садьӧс.
Авансцена.
ӦТИ ЗОН (чужйӧ куйлысь Авенирлы). Ӧні тэ!
АВЕНИР (чеччӧ). Мый?
МӦД ЗОН. Ӧні тэ. Ӧдйӧ. Косӧн кӧсъян кольны?
АВЕНИР. (Матыстчӧ куйлысь нывлань. Чужӧмыс векыштчӧ аддзӧмторсьыс). Вера! Мый тэкӧд вӧчисны, Вера! Ме тэнӧ радейта, Вера!
Вера сувтӧ, шатласиг, вӧчӧ воськов.
АВЕНИР. Вера! Прӧстит, прӧстит!
ВЕРА (котӧртӧ). Ме тэнӧ ёра! Ме тэнӧ ёра!
Следовательлӧн кабинетын.
ИВАН НАЗАРОВИЧ. Водзӧ.
АВЕНИР. Мый водзӧ?
ИВАН НАЗАРОВИЧ. Водзӧ мый вӧлі? Следствие? Суд?
АВЕНИР. Нинӧм эз вӧв.
ИВАН НАЗАРОВИЧ. Эз явит Вераыс? Некодлы эз висьтав? Дзебис лоӧмторсӧ?
АВЕНИР. Воши.
ИВАН НАЗАРОВИЧ. Мый воши?
АВЕНИР (гораа). Воши Вераыс. Воши и ставыс. Эз сюрлы. Некод эз аддзыв сэсся ловйӧн ни кулӧмаӧн.
ИВАН НАЗАРОВИЧ. Кытчӧ вермис вошны?
АВЕНИР. Гашкӧ, вӧрӧ воши, гашкӧ, ваӧ пырис да ытва ванас нуис.
ИВАН НАЗАРОВИЧ. Эз ӧмӧй корсьны?
АВЕНИР. Корсисны. Ми асьным тшӧтш, став школаӧн. Но эз сюр. Эз вӧв некӧн.
ИВАН НАЗАРОВИЧ. Сэсся?
АВЕНИР. А мый сэсся. Андрейсӧ, кодкӧд Вера колльӧдчис, кыскалісны допросъяс вылӧ. Эз жӧ тай пуксьӧдны-а. Мунліс сэсся сиктысь. Эз и волывлы, буракӧ.
ИВАН НАЗАРОВИЧ. Тіянӧс эз корлыны?
АВЕНИР. Эз. Коді нӧ ми вылӧ чайтас?
ИВАН НАЗАРОВИЧ. Сэсся комын во сайӧ сьӧлӧмыд, сӧвесьтыд чӧв оліс?
АВЕНИР. Чӧв кӧ оліс, тэ дорӧ эг лок. Некор эг вунӧдлы, некор. Перво ачым вӧлі ваӧ пыранвыйын. Сэсся муні Ухтаӧ, велӧдчи техникумын. Уджавны локті орчча посёлокӧ, нывкӧд тӧдмаси. Гӧтрасьны шуим. Эг тӧд ме, мый менам Рита гӧтырпуӧ Вералӧн воча чой. Кӧлысь водзвылас сӧмын тӧдмалі, кор гӧсьтъясӧс мӧдім коравны. Ок и свадьба менам вӧлі! Кутшӧм нин гаж! Синмӧс эг лысьтлы лэптыны: ӧд Вералӧн мам-батьыс сэні пукалісны. Мый налӧн сьӧлӧм вылас вӧлі? Менсьым грексӧ найӧ, дерт, эз тӧдны. А месӧ, месӧ? Кыдз ме сэки пукалі? А Риталӧн мам-батьыс чайтісны, мый ме ог ас вӧляысь гӧтрась. Да и менам рӧдвуж тшӧтш казялісны майшасьӧмӧс.
ИВАН НАЗАРОВИЧ. Авенир Васильевич! (Сувтӧ.) Менам кадыс абу, ог вевъяв тэнӧ кывзынысӧ.
АВЕНИР. Кывзы! Ёна кора, кывзы! Медводдзаысь сьӧлӧмӧс восьта.
ИВАН НАЗАРОВИЧ. Но, дженьыдджыка либӧ.
АВЕНИР. Да-да. Ме гӧтыр рӧдвужкӧд ёнасӧ эг мӧд рӧдйысьны. Эг ёна сюйсьыв на дорӧ. Ныв миян чужис. Сійӧн ылалі. Быдтысигас быттьӧ вунӧдлі Вераӧс, сьӧлӧм дойӧй бурдны заводитіс. Но, Иван Назарович, гӧгӧрвоан он (Авенир сувтӧ да мӧдӧ ветлӧдлыны джоджті), Енмыс оз сет меным вунӧднысӧ.
ИВАН НАЗАРОВИЧ. Мыжыд — сьӧкыд изки, сійӧс регыдӧн он вермы шыбитнытӧ.
АВЕНИР. Да-да. Вӧтӧ кӧ уськӧдчис, позис на овны. А менам нылӧй быдмис, сӧвмис да дзик Вера кодь лои. Статьнас, чужӧмнас, вӧраснас, юрси и син — быттьӧ кульӧма да ляскӧма. Видзӧдлас ме вылӧ — Вера. Быттьӧ мӧдаръюгыдсьыс локтӧма ме дорӧ. Ӧд гӧтырлӧн дзик мӧд ӧбликыс. Кытысь нылӧйлы сэтшӧмыс? Со ӧд кыдз меным ёрӧмыд инмис.
ИВАН НАЗАРОВИЧ. Да, инмӧма.
АВЕНИР. Ме гортӧ эг мӧд лысьтны локны. Кытчӧ веськалӧ муна. Удж вылӧ водза-водз муна, удж вылысь гортӧ оз кыскы. Мися, йӧйма дзикӧдз. Сэсся пышйи гортысь.
ИВАН НАЗАРОВИЧ. Гортсьыд пышйин?
АВЕНИР. Эг вермы овны. Быттьӧ век ме вылӧ Вера видзӧдӧ. Тані ӧні карас ола.
ИВАН НАЗАРОВИЧ. Уджалан?
АВЕНИР. Корсюрӧ. Пропискатӧгыс бур удж вылас оз босьтны.
ИВАН НАЗАРОВИЧ. Кӧні нӧ олан?
АВЕНИР. Кӧні лун-вой суас, сэні и узя. Да-да.
ИВАН НАЗАРОВИЧ. Бомжалан, сідзкӧ.
АВЕНИР. А кӧть сідз шу. Рӧдня эськӧ выйим жӧ да.
ИВАН НАЗАРОВИЧ. Но мый нӧ, Авенир Васильевич, корсь удж, оланін, босьтчы морт нога олӧмӧ. А бурджык, бӧр гортад мун, семья дорад. Ме уголовнӧй делӧ ог пан, кыдз шуласны, «за давностью лет». Мун гортад да ов, кыдз кужан да верман.
АВЕНИР (дзӧрӧдӧ юрсӧ). Верми кӧ эськӧ, дерт, олі.
ИВАН НАЗАРОВИЧ. Быдты нывтӧ, кок йылӧ сувтӧд, велӧд, видз лёк йӧзысь, мед сылы Вераыдлысь туйсӧ не талявны.
АВЕНИР. Тэ мый шуин? Менсьым нылӧс? Ме быдӧнӧс, коді лысьтас кутчысьны менам ныв дорӧ... (Чабыртӧ кабырсӧ.)
ИВАН НАЗАРОВИЧ. Вот, вот. Мун гортад да и видз нывтӧ, ас коддьӧм лёк йӧзсьыс.
АВЕНИР (лигышмунӧ). Перво вешта ассьым мыжӧс, сэсся и муна.
ИВАН НАЗАРОВИЧ. Ме ӧд шуи, мися, делӧсӧ ог восьтӧ.
АВЕНИР. Тэ обязан преступниксӧ накажитны! Да-да.
ИВАН НАЗАРОВИЧ. Мун гортад.
АВЕНИР (корӧмӧн). Босьт менсьым грексӧ.
ИВАН НАЗАРОВИЧ. Ме тэд абу поп ни Ен. Мун вичкоӧ, да сэні гректӧ вештасны. Ӧні нӧ кыдз ме следствиесӧ мӧда нуӧдны, сы мыйта во кольӧма да. Ни ӧти свидетель абу.
АВЕНИР. Кыдзи абу? Ёртъясыс ӧд менам ловъяӧсь. Корлы да юась. Митя Помысов, Коля Дуркин, Веня Максимов.
ИВАН НАЗАРОВИЧ. Найӧ, сідзкӧ, лоӧны соучастникъясӧн.
АВЕНИР. Но да.
ИВАН НАЗАРОВИЧ. Кӧні найӧ олӧны?
АВЕНИР. Да тані ставныс, карынӧсь.
ИВАН НАЗАРОВИЧ. Адрессӧ тӧдан?
АВЕНИР. Тӧда. Со. Дмитрий Васильевич Помысов.
ИВАН НАЗАРОВИЧ. Мыйкӧ овыс зэв тӧдса.
АВЕНИР. Тӧдса, дерт. Депутат сійӧ. Да-да.
ИВАН НАЗАРОВИЧ. Депутат Помысовыс? Тэнад ёрт? Сійӧ мырдӧналіс нылӧс?
АВЕНИР. Да-да. Ме ӧд висьталі.
ИВАН НАЗАРОВИЧ. Но тэ, другӧ, радейтан жӧ лӧсьӧдлынытӧ.
АВЕНИР (сувтӧ). Ме лӧсьӧдла? Ме? Да ме эг Помысов радиысь татчӧ лок! Ас ради. Аслам мыж ради.
ИВАН НАЗАРОВИЧ (гижӧ). Сэсся коді вӧлі тэкӧд?
АВЕНИР. Николай Николаевич Дуркин.
ИВАН НАЗАРОВИЧ. Кӧні сійӧ уджалӧ?
АВЕНИР. Ог тӧд, буракӧ, том йӧзӧс велӧдӧ. Газетад тай гижасьӧ-а.
ИВАН НАЗАРОВИЧ. Сійӧ Дуркиныс, коді челядь быдтӧм йылысь статьяяссӧ гижалӧ?
АВЕНИР. Но, сійӧ, со адресыс.
ИВАН НАЗАРОВИЧ (сувтӧ). Кывзы, Авенир Васильевич, бур да нималана йӧзсӧ эн лякӧсьт. Сы ыджда мыж на вылӧ кӧсъян ӧшӧдны?
АВЕНИР. Ме ас вылӧ ӧшӧда, ог на вылӧ. Мен веськодь, найӧ кӧ вермӧны грекнас овны, мед олӧны. А ме ог вермы.
ИВАН НАЗАРОВИЧ. Коймӧдыс коді?
АВЕНИР. Вениамин Прокопьевич Максимов.
ИВАН НАЗАРОВИЧ. Тайӧ коді? Эг тай кывлыв.
АВЕНИР. Эн, дерт. Рабочӧйӧн уджавліс механическӧйын.
ИВАН НАЗАРОВИЧ. Тадз, Авенир Васильевич. Ме аддзысьла да сёрнита накӧд. Нуӧда сідз шусяна прӧверка. Тэнӧ сэсся тшӧтш чукӧстла. Кутшӧм адрес кузя мӧдӧдны корана письмӧсӧ?
АВЕНИР. Татчӧ мӧдӧд. (Мыччӧ кабала.)
Мӧд петкӧдчӧм
Помысовлӧн озыр патера. Трюмо водзын, мича костюма да галстука, сулалӧ Дмитрий Витальевич Помысов.
ПОМЫСОВ (видзӧдӧ зеркалӧлань). Дона ёртъяс! (Чӧв олыштӧ.) Дона господа! Оз, оз тадз. Дона. Абу дона. (Гораджыка.) Господа! Оз тадз ков. Ёртъяс, господа! Абу тадз. Оз тадз ков. Ёртъяс, господа! Абу тадз. Дона ёртъяс, коллегаяс, господа! М-м-м! Оз артмы. Дона ёртъяс, коллегаяс, депутатъяс! О! Тадз колӧ шыасьны. Дона ёртъяс, коллегаяс, депутатъяс! Оз тадз, депутатыс да коллегаыс ӧтитор. Сідзкӧ, дона ёртъяс, депутатъяс! Став депутатыс ӧд абу ёрт. Дона ёртъяс, коллегаяс! Тадз лоӧ бур! (Видзӧдӧ кабалаӧ.) Талун ме тіянлы кӧсъя висьтавны... (Видзӧдчӧ зеркалӧӧ.)
Пырӧ Эдик.
ЭДИК. Пап, тэныд эз на дышӧд?
ПОМЫСОВ. Мый дышӧдас?
ЭДИК. Артиставнытӧ.
ПОМЫСОВ. Кутшӧм артисталӧм? (Скӧрмӧ.) Кутшӧм артисталӧм? Мый тэ гӧгӧрвоан? Ме... Ме... Тэ тӧдан он, коді ме...
ЭДИК. Ог.
ПОМЫСОВ. Тэ он гӧгӧрво, мый ме зэв ыджыд государственнӧй морт.
ЭДИК. О-о!
ПОМЫСОВ. Тэ немтор он гӧгӧрво. Тэныд весиг юрад оз пуксьы, коді тэнад батьыд. Депутат! Республикаса Госсӧветын!
ЭДИК. Вӧлін кӧ олигарх, бурджык вӧлі.
ПОМЫСОВ. Тэ бӧб! Тэн колӧ гордитчыны батьнад. А тэ?
ЭДИК. Мый ме? Тэ ӧд водзвыв велӧдан сійӧс, мый кӧсъян шуны.
ПОМЫСОВ. Менам кӧ батьӧй вӧлі депутатӧн, гашкӧ, ме тэ моз жӧ велӧдчи карса медбур школаас, тэ моз жӧ томысянь вӧлі грамотнӧй да тешитчи ме коддьӧм вылас. Но менам батьӧй вӧлі вӧр пӧрӧдысь мужик. Ме быдми сиктын. Меным эз вичмыв тэ кодь образование. Но ме лои депутатӧн, а мыйӧн тэ лоан? Гашкӧ, став вылас тешитчысьӧн и колян?
ЭДИК. Папӧ, ланьты, пельӧ сьӧдмис. Ме тайӧс сёысь нин кывлі.
ПОМЫСОВ. Кывлӧмыд, но абу гӧгӧрвоӧмыд.
ЭДИК. Велӧд, велӧд. Меным нӧ мый? Сӧмын эн гораа. А то час джын нин сӧмын и кыла: «Дона ёртъяс, дона депутатъяс!»
ПОМЫСОВ. Пет татысь, а то... (Пузьӧ скӧрысла.)
ЭДИК (шпыньмунӧ). А то мый?
ПОМЫСОВ. Пет, мися...
Эдик петӧ.
ПОМЫСОВ. Эг куж, эг куж быдтыны пиӧс. Дзик огӧ гӧгӧрвоӧй ӧта-мӧднымӧс. Сиктын кӧ быдті, ёна бурджык вӧлі. Уджавны эськӧ велаліс, а ӧні сӧмын шландайтӧ да тшӧкӧлдывайтӧ. (Ӧвтыштӧ кинас да бара матыстчӧ рӧмпӧштан дорӧ.)
Кылӧ ӧдзӧсӧ тринькнитӧм.
Помысов петӧ, пырӧны Авениркӧд кыкӧн.
АВЕНИР. Чолӧм-здорово, мися.
ПОМЫСОВ. Чолӧм, эськӧ да.
АВЕНИР. А мый нӧ?
ПОМЫСОВ. Ог эськӧ ёнасӧ вевъяв да. Занят эськӧ ме да. Тэ ме дорӧ кыдз депутат дорӧ локтін? Могӧн? Могтӧг, дерт, ме дорӧ он лок. Бурджык эськӧ, мед офисӧ пыралін. Сэні и сёрнитім эськӧ. Ӧні менам кадыс абу.
АВЕНИР. Ог дыр манит. Сёрни эм.
ПОМЫСОВ. Но, пуксьы вай, локтін нин да.
Авенир пуксьӧ.
АВЕНИР. Кисьтышт.
ПОМЫСОВ. Мый?
АВЕНИР. Кисьтышт, мися, выйим кӧ.
ПОМЫСОВ. А! Дӧвгис. Мый юан? Водка, коньяк, шампанскӧй?
АВЕНИР. Водкасӧ кисьт.
ПОМЫСОВ (вайӧ водка, нур, пуктӧ ставсӧ журнальнӧй пызан вылӧ Авенир весьтӧ, кисьталӧ). Ю. Оз эськӧ тайӧн ёна ков ышмынысӧ да.
АВЕНИР. Ачыд нӧ?
ПОМЫСОВ. Оз позь. Асыв ме сёрнита Госсӧветын.
АВЕНИР. Сёрниыд ӧд сёрни и эм, абу на сійӧ самолёт новлӧдлӧм.
ПОМЫСОВ. Немтор тэ он гӧгӧрво, Авенир. Сьӧд мужикӧн вӧлін, сьӧд мужикӧн и колин. Эськӧ велӧдчылін жӧ да.
АВЕНИР. Нӧшта кисьт.
Помысов кисьтӧ. Авенир юӧ.
ПОМЫСОВ. А тшӧтш тэкӧд юышта, ог эськӧ вӧлі кӧсйы да. «Друг детства» ӧд. (Кисьтӧ да юӧ.)
АВЕНИР. Мыйта нин талун юи, а ог коддзы. Да-да.
ПОМЫСОВ. Но мый нин сэні сиктас, ставыс-ӧ лючки-ладнӧ?
АВЕНИР. Мыйкӧ тай олӧны-а.
ПОМЫСОВ. Коді нин сэсся куліс?
АВЕНИР. Некод. Ставӧн олӧны-вылӧны.
ПОМЫСОВ. Степ Марья пӧ кулӧма да.
АВЕНИР. Но сійӧ ӧд важӧн нин, тӧлысь нёль сайын.
ПОМЫСОВ. А тэ тӧдан, тешкодьтор артмис. Ме сыкӧд колян во аддзысьлі сиктын, сельпо лавкаын. А ме мӧдӧдчи нин карӧ. Ёна и кутлі ме Степ Марьясӧ, морӧс бердӧ топӧдлі. А сэсся регыд и кывсис: кулӧма пӧ. А сыӧдз некор эг топӧдчывлӧй.
АВЕНИР. А гашкӧ, кодӧс тэ дінад топӧдлан, ставныс кувсьӧны да?
ПОМЫСОВ. Мый тэ сэн сӧран, Авенир? Ме эськӧ тэ местаын тадз эг шу.
АВЕНИР. А мый нӧ, Степ Марьяӧс кутлӧмыд — кулӧма, Вератӧ кутлін — воши.
ПОМЫСОВ. Кутшӧм Вераӧс?
АВЕНИР. Пантиль Вератӧ.
ПОМЫСОВ. Ок, кодӧс казьтіс. Эськӧ...
АВЕНИР. Быть ӧд казьты, оз кӧ вун.
ПОМЫСОВ. Вай важсӧ ог лэптӧ. Мый вӧлі, вӧлӧма. Сійӧ кадсяньыс уна ва визувтіс, нинӧм сійӧс казьтывны. Ме эськӧ вунӧді нин, эн кӧ казьтышт.
АВЕНИР. Оз ӧмӧй дум вылад усьлывлы?
ПОМЫСОВ. Оз. Мӧдан кӧ ставсӧ помся казьтывны — йӧйман. Ме лёк думъяссӧ юрысь вӧтла. Сӧмын мичаяссӧ да лӧсьыдъяссӧ видза. И тадзи кокньыдджык овныд. Колӧ кужны веськӧдлыны аслад олӧмнад, аслад юр вемнад. Ме эськӧ тэ местаын тадзи жӧ олі, важсӧ нинӧм казьтывны.
АВЕНИР. А тэ кужан овнысӧ? Тэ олан, кыдз кӧсъян? И тэнад артмӧ?
ПОМЫСОВ. Артмӧ. Мортыд аслас олӧм вылын ачыс кӧзяин. Шуи ме локны карӧ — локті, шуи мича ныв вылӧ гӧтрасьны — гӧтраси, шуи нималана мортӧдз воӧдчыны — воӧдчи.
АВЕНИР. А менам оз артмы. Ог вермы тадзсӧ овны, ог вермы! Гӧгӧрвоин? И тэныд ковмас мӧд ног видзӧдлыны аслад олӧм вылӧ.
ПОМЫСОВ. Меным? Оз-ӧ нин тэ радиысь?
АВЕНИР. Оз ме радиысь. Но тэныд бара на ковмас казьтыштны Вератӧ. Да-да.
ПОМЫСОВ. Бара Вераӧс казьтін? Вай дугды. Ме эськӧ некор эг казьтышт сійӧс.
АВЕНИР. Мый, и тӧд вылад он уськӧдлыв? Ассьыд гректӧ.
ПОМЫСОВ. Ог, дерт. Вай дугдам та йылысь. Бурджык ю нӧшта сё грамм. (Кисьтӧ, кыкнанныс юӧны.)
АВЕНИР. Но ме муна сэсся. Тэнӧ следователь дорӧ корласны. Да-да.
ПОМЫСОВ. Кутшӧм следователь дорӧ? Мый понда?
АВЕНИР. Вера понда.
ПОМЫСОВ. Тэ збыль тайӧс шуан?
АВЕНИР. Збыль.
ПОМЫСОВ. А тэ кытысь тӧдан? Тэнӧ корлісны нин?
АВЕНИР. Корлісны. Ме висьталі, кыдзи вӧлі. Да-да.
ПОМЫСОВ. Тэ йӧй али сюсь? Тэ менсьым олӧмӧс кӧсъян кисьтны? Пеж рӧд. Ме эськӧ тэнӧ ас киӧн пыдзырті.
АВЕНИР (чеччӧ). Эн увгы. Ме мӧді. Тэныд лои висьталӧма-а.
ПОМЫСОВ. Да тэ кӧ мӧдан вомтӧ паськӧдлыны, ме тэныд!
АВЕНИР. Повзьӧдсьӧма нин менӧ. Сёрмин, другӧ. Да-да.
Лӧсьӧдчӧ петны.
ПОМЫСОВ. Сувт! Ме эськӧ...
АВЕНИР. Эськӧ, эськӧ... Эн кӧ эськӧ сэки вӧрӧдӧ Верасӧ...
ПОМЫСОВ. А тэ? Тэ сӧстӧм?
АВЕНИР. Вешйы! Лэдз менӧ! (Мунӧ ӧдзӧслань.)
ПОМЫСОВ (кутчысьӧ сыӧ). Ог, ог лэдз! Тэ кӧсъян менсьым олӧмӧс торкны? Ме Госсӧветса депутат, а тэ коді? Тэ ассьыд олӧмтӧ эн вермы лӧсьӧдны морт ногӧн.
АВЕНИР. Тэ вермин? Тэнад ставыс лючки? Тэ шуда?
ПОМЫСОВ. Мый нӧ ме тэкӧд сёрнита, нинӧм абуыскӧд. Мун! Но мӧдысь кӧ веськӧдчан менам туй вылӧ, ме тэнӧ нырышта! И вомтӧ топӧд! Гӧгӧрвоин!
Авенир мунӧ.
МӦД ДЕЙСТВИЕ
Коймӧд петкӧдчӧм
Николай Николаевич Дуркинлӧн патера. Тӧдчӧ, мый озыра олӧны, но мера тӧдтӧг лӧдӧма кӧлуйсӧ, кытчӧ веськалӧ.
Пызан вылыс тыр. Ирина нылыс лыддьӧ газет. Батьыс зэв гажапырысь пырӧ жыръяс.
НИКОЛАЙ (вомгорулас ворсӧ). Пам-па-ра-ра, пам-па-ра-ра. (Легыштӧ, быттьӧ йӧктӧ.) Ирина! Йӧктам мекӧд. Пам-па-ра-ра, пам-па-ра-ра.
ИРИНА. Пап, дугды. Ме тэнсьыд статьятӧ лыддя.
НИКОЛАЙ. Но, лыддьы, лыддьы. (Чӧв ланьтлӧ. Матыстчӧ пызан дорас.) О-о! Мыйта добраыс. Ирина, аддзан: быдторсӧ меным козьналісны. А тэ вӧлі он тшӧкты пасйыны чужан лунӧс ресторанын. Аддзан, мыйта вайисны козинсӧ!
ИРИНА. Но, энлы, ме лыддьыся.
НИКОЛАЙ. Нина! Нина!
Локтӧ Нина.
НИНА. Мый нӧ чуксасян?
НИКОЛАЙ. Видзӧдлы, кыдзи менӧ йӧзыс пыдди пуктӧны. Сы мында козин вайисны.
НИНА. Сідз тай.
ИРИНА. Лыддьынысӧ оз сетны. (Петӧ газетнас.)
НИКОЛАЙ (босьтӧ пызан вылысь часі). Аддзан, кутшӧм мича. Талӧн и доныс, буракӧ, мича. Кымын шайт бара сулалӧ-а?
НИНА. Сюрс саяд выйим-а.
НИКОЛАЙ. Абу кӧ унджык.
НИНА. Кымын нӧ часіыс? (Арталӧ.) Дас ӧкмыс часі.
НИКОЛАЙ. Дас ӧкмыс? Эн сӧр!
НИНА. Ачыд лыддьы.
НИКОЛАЙ (артасьӧ). Збыль тай, дас ӧкмыс. Сё дивӧ!
НИНА. Нэмтӧ тырмас. Да и челядьыдлӧн челядьыслы на кольӧ. Та мыйтаыд.
НИКОЛАЙ. А тэ вӧлі шуан, ог пӧ ресторанын чужан лунтӧ пасйӧй. Миян и рестораныд, буракӧ, вешъяс. Уна-ӧ, шуан, мынтін? Нолы пуксьы да артавлы.
НИНА. Мый артала?
НИКОЛАЙ. Босьт кабала, ручка. Сэсся бура артав, мый дон козьналісны. Сэсся уна-ӧ видзин ресторан вылас — сэтысь чинты. Гашкӧ, и прибыль на лоӧ.
НИНА. Некор меным.
НИКОЛАЙ. Артав, артав.
НИНА (лэптӧ свитер). Ме ог тӧд, дона-ӧ ӧттор-мӧдтор...
НИКОЛАЙ. Ириналысь юав. Сійӧ тӧдӧ, быд лун тай рынокті шӧйтӧ.
Нина свитернас петӧ.
НИКОЛАЙ. Да. Сы мында йӧз. Сы мыйта тост. Сы мыйта бур кыв шуисны. Сы мыйта бур козин.
Пырӧны Нина да Ирина. Нина босьтчӧ видлавны козинъяс, артасьӧ. Ирина пуксьӧ креслӧӧ да видзӧдӧ батьыс вылӧ.
НИКОЛАЙ. Мый, Иринушка?
ИРИНА. Лыдди тэнсьыд гижӧдтӧ.
НИКОЛАЙ. Но, мый шуан? Менсьым статьяӧс сетісны республикаса медся ыджыд газетас. Тэнад батьыд пыдди пуктана морт.
ИРИНА. Ме тэнсьыд ӧтитор кӧсъя юавны: мыйла тэ йӧзсӧ велӧдан?
НИКОЛАЙ. А кыдз нӧ велӧдтӧгыс? Йӧзсӧ велӧдны и колӧ.
ИРИНА. Но тэнад тайӧ статьяын нинӧм выльторйыс абу. Воспитание йылысь быд книгаын тайӧ эм. А тэ ставлы тӧданаторсӧ бара гижан.
НИКОЛАЙ. Мыйла нӧ ог гиж? Быд лун, быд здук колӧ йӧзыслы висьтавны, колӧ йӧзсӧ велӧдны, кыдзи овны. И му вылас век вӧліны йӧз, кодъяс велӧдлісны мукӧдсӧ овны.
ИРИНА. Пап, а тэ збыль чайтан, мый тэныд позьӧ йӧзсӧ велӧдны?
НИКОЛАЙ. А мыйла эськӧ оз? Ме велӧдчӧм морт, кандидат наук, бур верӧс, бур бать, бур ёрт. Тэ со менам кутшӧм авъя ныв быдмин. Сэсся и гижнысӧ-велӧднысӧ ме кужа. Быдӧн ӧд оз на куж. Унджыкыс и кык кывсӧ шуны оз кужны.
ИРИНА. А Володяным?
НИКОЛАЙ. Мый Володяыс?
ИРИНА. Тэ сійӧс эн куж воспитайтнытӧ.
НИКОЛАЙ. Быдмигас зэв шань зонка вӧлі. Бура велӧдчис и.
ИРИНА. Юсис да, тэнад пиыд.
НИКОЛАЙ. Татшӧм гӧтырнад быдӧн юсяс.
ИРИНА. Гӧтыр мыжа.
НИКОЛАЙ. А коді нӧ?
ИРИНА. Абу ӧмӧй медводз бать-мам? Тэ тӧрыт сійӧс весиг ресторанад эн лысьт корны, мед йӧзыс эз аддзывны, кутшӧм тэнад пиыд юысь.
НИКОЛАЙ. Ирина, ми зэв бур бать-мам. Мыйла тэ менӧ кӧсъян увтыртны?
ИРИНА. Да ме ог кӧсйы увтыртны, ме кӧсъя гӧгӧрвоны тэнӧ.
НИКОЛАЙ. Ме тэ син водзын.
ИРИНА. Тэ зэв правильнӧй морт, папочка. Зэв бур морт. Тэнад зэв уна ёрт, тэнӧ ставныс радейтӧны. Збыльысь-ӧ тэ аслад олӧмын некор да некутшӧм мыжтор весиг эн вӧчлы? Став олӧмыд век вӧлі веськыд туй кодь. Некор эз чукыльтлы? Некор эн джӧмдыв?
НИКОЛАЙ. Джӧмдылі кӧ, ме джӧмдалӧмсӧ пель сайӧ сюркнявлі, мед мӧдысь сідз не вӧчны.
НИНА (бӧрддзӧ). Володятӧ эгӧ корӧ ресторанад, да миянӧс некор оз прӧстит. Тӧрыт нин чужан луныд вӧлі, а эз на и чолӧмав тэнӧ, весиг эз звӧнитлы.
НИКОЛАЙ. Гашкӧ, эз на и палявлы да.
НИНА. Кымынысь нин ачым звӧнитлі, да оз босьт трубкасӧ. Гашкӧ, кутшӧмкӧ неминуча лои. (Чышкалӧ синвасӧ.)
НИКОЛАЙ. Чӧв. Палялас да воас. Бара на деньга мӧдас дзайгыны.
Кылӧ звӧнок шы.
НИКОЛАЙ. Со тай, локтӧ. (Петӧ восьтны.)
ИРИНА (мамыслы). Мам, тэнад збыль идеальнӧй верӧс?
НИНА. Ме эськӧ шуда вӧлі, тэ кӧ аддзин батьыд кодь мортӧс. А вот пиукным миян — ловъявывсянь сьӧлӧм сісьтысь.
ИРИНА. Кодлы кутшӧм шуд усьӧ, сідзи и олӧ.
НИНА. А тэ эськӧ мед ассьыд олӧмтӧ лӧсьӧдін, а эн вокыд вылӧ каттьысь.
ИРИНА. Меным и тікӧд зэв лӧсьыд.
Пырӧны Николай да Авенир.
НИКОЛАЙ. Нина, Ирина, тӧдмасьӧй. Тайӧ Авенир, менам челядьдырся ёрт.
АВЕНИР (копыртлӧ юрсӧ). Видза оланныд.
НИНА. Чолӧм, Авенир. Важӧн нин тэнӧ эг аддзыв.
ИРИНА. Видза оланныд.
НИКОЛАЙ. Авенир, тэ та дыра кадӧн эн вунӧд менсьым чужан лун! Тэ воин менӧ чолӧмавны! Меным тӧрыт тыри ветымын арӧс.
АВЕНИР (шӧйӧвошӧмӧн). Ветымын.
НИКОЛАЙ. Мыйла тӧрыт эн лок? Эськӧ ресторанӧ ветлім. Юим-сёйим, сьылім-йӧктім.
АВЕНИР. Да.
НИКОЛАЙ. Нина, Ирина, петкӧдлӧй тайӧс ставсӧ мӧд жыръяс. Идралӧй пызан вывсьыс. Сэсся, Нинук, вай миянлы мыйкӧ нуртор. Да кутшӧмкӧ юантор. Тэ мый юлывлан? Виски, бренди? Коньяк?
АВЕНИР. Водка.
НИКОЛАЙ. Водка? Нинук, выйим абу миян?
НИНА. Сюрас.
Нина да Ирина петкӧдӧны козинъяс, Нина пыртӧ сёян-юан, водка доз.
НИКОЛАЙ. Нина, микӧд пукалышт, Авенирыскӧд.
НИНА. Ог вевъяв, Колюш. Асьныд нин ті пукыштӧ, челядьдыртӧ казьтыштӧ. (Петӧ.)
НИКОЛАЙ. Пуксьы, Авенир. Кыдз олан-вылан?
АВЕНИР. Сідз-тадз.
НИКОЛАЙ. А мыйла сідз-тадз? Семьяад ставыс бур? Нылыд?
АВЕНИР. А мыйкӧ тай олӧны-а.
НИКОЛАЙ (кисьталӧ). Вай ю. Ме вӧсна.
АВЕНИР (лэптӧ румкасӧ). Но, сідзкӧ. (Юӧ.)
НИКОЛАЙ. Тэ, буракӧ, меысь ичӧтджык.
АВЕНИР. Ӧти воӧн.
НИКОЛАЙ. Но мый, Авенир. Позьӧ нин миян олӧмлы кутшӧмкӧ дон сетны. Ме лыддя, мый олӧмӧй менам артмис. Министерствоын зав отделом. Коркӧ, челядьдырйиыд, кужлім эг та йылысь мӧвпыштлынысӧ? Сьӧд вӧр шӧрысь петӧм йӧз. Помысов — депутат. Ме — министерствоын уджала. Семья, гӧтыр, гӧгӧр тырбур. Абу эськӧ лӧсьыд ошйысьнысӧ да. Кулитчынысӧ нинӧмӧн.
АВЕНИР. Ставыс, сідзкӧ, тыр-бур.
НИКОЛАЙ. Тэ вот миян ёртъяс пиысь ӧтнад сиктӧ кольччин, но бара жӧ керка лэптін, гӧтыр, челядь.
АВЕНИР. Сідз эськӧ да.
НИКОЛАЙ. Ю. (Бара кисьтӧ.) Ӧтитор эськӧ майшӧдлӧ сьӧлӧмӧс. Володя пиным юышталӧ. Тэрмасис армия бӧрас да. Узьлӧма водзвыв. Кага чужтӧдзыс ковмис гижсьыны. Локтісны рӧдвужыс, пинь-зык. Юысь рӧдысь гӧтырпуыс вӧлӧма. Володяным тшыксис. А тэнад нылыд?
АВЕНИР. Том на. Да-да, том. (Юӧ.)
НИКОЛАЙ. Верӧс сайӧ эз на пет?
АВЕНИР. Школа таво помалӧ, кутшӧм верӧс сайӧ?
НИКОЛАЙ. Менам Ирина оз на жӧ лӧсьӧдчы, эськӧ арлыдыс выйим нин да. Кывзы, Авенир, асьным кор бурлачитім, ёнакодь вӧлі нывъястӧ кыйӧдам. А ӧні ассьым нылӧс кӧть керкаысь ог лэдз, мед эськӧ некод оз вӧрзьӧд-дойд. Сідз ӧд?
АВЕНИР. А тэ Вератӧ помнитан?
НИКОЛАЙ. Кутшӧм Вераӧс?
АВЕНИР. Пантиль Вератӧ.
НИКОЛАЙ. Но.
АВЕНИР. Регыд тэнӧ следователь корлас.
НИКОЛАЙ. Менӧ?
АВЕНИР. Тэнӧ. Да-да.
НИКОЛАЙ. Мыйысь?
АВЕНИР. Тэ Верасӧ помнитан?
НИКОЛАЙ. Помнита. Сэсся мый?
АВЕНИР. Вот сы вӧсна и корласны.
НИКОЛАЙ. А мый, сюрӧма кыськӧ?
АВЕНИР. Сюрас! Комын восайсаыс.
НИКОЛАЙ. Авенир, тэ тӧлка морт, но кывтӧм пемӧс кодь, нинӧм лючки-ладнӧ сёрнитны он куж. Сідзи эн и велавлы ассьыд мӧвпъястӧ мӧд мортлы бура висьтавны. Тайӧ, дерт, ыджыд искусство, мичаа сёрнитны колӧ велӧдчыны, кыдзи и мукӧдторйӧ.
АВЕНИР. Тэ вот зэв кыв-вора, да менсьым пельӧс эн сьӧдмӧд-а.
НИКОЛАЙ. Тэ, Авенир, сиктад олігӧн культураас эн и велавлы. Кысь нин гижны, сёрнитнытӧ эн велавлы. Ме тайӧ искусствоас ёна велӧдчи. Ӧні кӧть кутшӧм обществоын, кӧть кутшӧм компаниеын, кужа сёрнитны, сьӧрсьӧн-бӧрсьӧн ассьым мӧвпъясӧс тэча, дасьтысьтӧг йӧз водзын верма кык час чӧж варовитны. Тэ некор эн видлы? А миян Помысовыд, депутатыд...
АВЕНИР. Бур, мый кужан сёрнитны. Сідзкӧ, ставсӧ следовательыдлы и висьталан сьӧрсьӧн-бӧрсьӧн. Нинӧм кӧть он дзуг. А ме сэсся муна.
НИКОЛАЙ (чепӧсйӧ пызан сайысь, кутчысьӧ Авенирлы соскас. Вашкӧдӧмӧн). Кытысь тӧдан? Коді висьталіс?
АВЕНИР. Ачым ме висьталі.
НИКОЛАЙ. Тэ йӧймин али мый?
АВЕНИР. Дасьты ассьыд мӧвпъястӧ сьӧрсьӧн-бӧрсьӧн. А Вера вӧсна кывкутнытӧ ковмас. Да-да. (Петӧ.)
Нёльӧд петкӧдчӧм
Вениамин Прокопьевич Максимовлӧн патераыс. Абу ёна озыр, но сӧстӧм. Гӧтырыс куйлӧ крӧватьын.
МАША. Веня, вайлы рӧмпӧштансӧ пызан вывсьыс.
ВЕНЯ (майкаа да гортса спортивнӧй гача, тяпиа, мыччӧ рӧмпӧштан). На, видзӧдчы.
МАША (ёна дыр видзӧдалӧ ассьыс чужӧмсӧ). Веня, кымын чукыр нин содӧма. Господьӧй дай енмӧй, пӧрысьмыны тай мӧді. Эз и удайтчыв меным йӧзыс моз овнысӧ, мичаа вӧччынысӧ, джуджыд бӧра тупли кокӧ сюйлыны. (Бӧрддзӧ.)
ВЕНЯ. Но, Маша. Но, мый сэсся бӧрдан. Но, дугды. Но, быд ногыс тай лоӧ овны да мый сэсся вӧчан. Но, дугды. (Тапкӧдӧ пельпомас, бурӧдӧ.)
МАША. Томдырйи сэтшӧм окота вӧлі джуджыд бӧра туплиасьны да уличті юр лэптӧмӧн тотшсьӧдны-ветлӧдлыны. Эз и удайтчыв. Велӧдчигад сьӧмыд эз вӧв, нинӧм вылӧ ньӧбнытӧ. Сэсся тэкӧд ӧтлаасьӧм бӧрын пыр и сьӧкті, но, мися, мед, кор кокнямма, сэки, кагасӧ чужтӧм бӧрын, джуджыд каблука туплиася да мӧда коляска гурйӧдлыны. (Бара бӧрддзӧ.) Эз и удайтчы. Кага вайӧм бӧрас со кок йылӧ эг нин и вермыв прамӧя сувтлыны.
ВЕНЯ. Но дугды. Но, кыдз нин Ен шуӧма. Но, мый сэсся... Комын во тай кольӧма. Нылыдлӧн нин со нылыс школаӧ муніс. Но, мед. Со тадз миян лои овны. Но, матӧ комын во кӧ нин олім, и водзӧ олам.
МАША. Пуксьыв мекӧд орччӧн.
ВЕНЯ (пуксьӧ Машакӧд орччӧн, босьтӧ киӧдыс). Но, эг ӧд лёка олӧй. Ӧтсӧгласӧн, но, нэм чӧж.
МАША. А кызь кӧкъямыс восӧ крӧватьысь чеччывтӧгыс, кок йылас сувтлытӧгыс... Ок-ок-ок...
ВЕНЯ. Но, со тай тэнад кокыд. (Индӧ инвалидлӧн кӧляска вылӧ.) Квартиратіыд журъялӧ, пусьыны и песласьны, но, верман. Колӧкӧ, но, ывлаӧ петкӧдла.
МАША. Ой, Веня, тэ сэтшӧм бур морт. Комын во тэ мекӧд, вермытӧм морткӧд, олан. Кӧнкӧ ӧд, окота жӧ мукӧд моз босьтны гӧтыртӧ сойбордйӧдыс да праздник лунӧ улич кузя мунны. Шуда гозъяяссӧ аддзан, да, кӧнкӧ, сьӧлӧмыд муткыртчылӧ жӧ. А ме со кутшӧм.
ВЕНЯ. Но, лӧнь сэсся, Маша. Но, мый талун тэкӧд? Но, кутшӧм лӧдз курччис?
МАША. Веня, кор ме ӧтнам, пыр мӧвпала, кутшӧм мыжысь менӧ Енмыс ёрис? Ставсӧ юрын артала-муртала. Ассьым олӧмӧс гуг и бан нин бергӧдлі, некутшӧм ыджыд грек эг аддзы. Мамлысь да батьлысь олӧмсӧ донъялі. Зэв шань йӧз вӧліны. Кутшӧмкӧ гуся грек кӧ налӧн эз вӧв, мый меысь дзебисны. А гашкӧ, пӧльлӧн ли пӧчлӧн грекыс ме вывті тадзи быгыльтчис. А? Веня?
ВЕНЯ (зумыштчис). Но, Маша. Но, ӧвсьы, эн дзуг асьтӧ.
МАША. Но ӧд кутшӧмкӧ грекысь ме вештыся! Да и тэ мекӧд тшӧтш.
ВЕНЯ. Но да. Но, грекысь. Маша, сідзкӧ, менам грекысь и вештысям.
МАША (пуксьӧ крӧватяс, еджыд улыс паськӧма). Тэнад грекысь? Кутшӧм грекысь?
ВЕНЯ. Но, кутшӧм грек? Но, сідз ме шуи, нем думайттӧг.
МАША. Висьтав, Веня, висьтав!
ВЕНЯ. Но, ме сідз прӧста шуи.
МАША. Висьтав, Веня, висьтав! Сы мыйта во ӧтлаын олам, а тэнад мыйкӧ висьтавтӧмтор на кольӧма.
ВЕНЯ. Нинӧм, но, висьтавнысӧ меным.
МАША. Енлы кевмысям, да, гашкӧ, вештас гректӧ. Прӧститас да кок на меным сетлас, Веня.
Кылӧ звӧнок шы. Веня петалӧ, бӧрсӧ пырӧны Авениркӧд.
АВЕНИР. Чолӧм-здорово.
МАША. Авенир кыськӧ усьӧма! О господьӧй! Пӧрысьмӧмыд жӧ тай. Кымын во эг аддзысьлӧй.
ВЕНЯ. Пуксьы-шойччы. Мый, кыдз сэн сиктас оланныд-выланныд?
АВЕНИР. Некутшӧм выльтор ог тӧд. Ме ӧд сэтысь важӧн нин мунлі.
ВЕНЯ. Карын али мый олан? Керка ачыд стрӧитін, да эновтін?
АВЕНИР. Сідз тай артмис.
ВЕНЯ. Но, мыйкӧ могӧн воин?
АВЕНИР. Могӧн...
МАША. Висьтав могтӧ, вермам кӧ, могмӧдам.
АВЕНИР. Сёрниӧн ме вои Веня дорӧ.
МАША. Гуся сёрни али мый?
АВЕНИР. Гуся. Да-да.
МАША. Мый, кутшӧм гуся сёрни вермас тіян лоны? Бурлачитан кадныд важӧн нин кольӧма-а.
ВЕНЯ. Но, гуся сёрни кӧ, и петалам кухняӧ. Маша, вайлы ӧти доз, пукыштам Авениркӧд.
МАША. Босьт со, шкапас.
Веня босьтӧ водка доз, петӧны кухняас.
(Сценаыс бергӧдчыштӧ.)
Веня восьтӧ доз, кисьталӧ румкаӧ водка.
АВЕНИР. Стӧканыд абу?
ВЕНЯ. Эм.
АВЕНИР. Кисьт мен стӧканӧ.
Веня кисьтӧ стӧканӧ, Авенир юӧ, вомас босьтӧ закуска.
ВЕНЯ (юӧ румкаысь). Нӧшта юан?
АВЕНИР. Кисьт джынсӧ.
ВЕНЯ (кисьтӧ). Мый нӧ могыд?
АВЕНИР (юӧ). Вератӧ помнитан?
ВЕНЯ. Кутшӧм Вераӧс?
АВЕНИР (гораа). Пантиль Вератӧ помнитан?
Веня повзьӧмӧн чепӧсйӧ, пӧдлалӧ кухня ӧдзӧс.
ВЕНЯ. Лӧньджыка.
АВЕНИР. Тэ висьтав, помнитан он?
ВЕНЯ. Но.
АВЕНИР. Мый но? Тэ мичаа висьтав.
ВЕНЯ. Но, помнита. Сюри али мый кыськӧ?
АВЕНИР. Сюрас кыськӧ, комын во нин коли да. Кӧсъя со мый висьтавны. Тэнӧ следователь корлас.
ВЕНЯ. Менӧ? Мыйысь?
АВЕНИР. Тэ код водзын кӧ карась, а эн ме водзын.
ВЕНЯ. Вера помласьыс?
АВЕНИР. Да-да.
ВЕНЯ. Тэ нӧ мый? Сы мында во коли. Йӧймин? Коді важсӧ ӧні мӧдас лэптыны?
АВЕНИР. Ме.
ВЕНЯ. Тэныд, мый, окота лои тюрмаӧ пуксьыны? Овнытӧ дышӧдіс?
АВЕНИР. Да. Пукся. И тэ тшӧтш. И Митрей. И Николай. Гректӧ колӧ вештыны. Да-да.
ВЕНЯ. Тэ мый, поп? Грек вештӧм йылысь мӧдін сёрнитны?
АВЕНИР. Поп не поп, а мыжсьыд ковмас вештысьны.
ВЕНЯ (скӧрмӧмӧн. Чеччӧ да мышкыртчӧ пызан вомӧн Авенирлань. Гораа вашкӧдӧмӧн). Тэ нэмтӧ кургин-олін. Керка лэптін, челядьтӧ быдтін. А ме? Ме нэмӧс грек вешта. Коктӧм гӧтыркӧд комын во ола. Инвалидӧс видза. Пывсьӧда-мыссьӧда. Комын во ки вылын новлӧдла. И кӧн на помыс?
АВЕНИР. Тэ кӧсъян шуны, мый тайӧн грекыд вешйис?
ВЕНЯ. Тэ, Авенир, ме ордысь мун. Мун татшӧм сёрнинад, пет керкасьыс. Он кӧ, шошаӧдыд кычиӧс моз шыбита.
АВЕНИР. Ме тэн ставсӧ висьталі. Следователь тэнӧ корлас. Да-да.
ВЕНЯ. Пет!
Авенир петӧ.
Витӧд петкӧдчӧм
Помысов патераын. Пукалӧны Помысов, Дуркин, Максимов.
ПОМЫСОВ. Ті тӧданныд-ӧ, мыйла миянӧс корӧны следователь дорӧ?
Дуркин да Максимов чӧв олӧны. Зумышӧсь.
ПОМЫСОВ. А ті кывлінныд, Авенир пӧ вежӧрнас торксьӧма.
ВЕНЯ. Но, збыль?
НИКОЛАЙ. Торксьӧма?
ПОМЫСОВ. А ті онӧ тӧдӧй? Ме ставсӧ нин тӧдмалі. Менам мамӧ ветлӧма гӧтыр дорас. Важӧн пӧ нин тайӧ сылӧн.
ВЕНЯ. Кывлі, мунӧма пӧ гортсьыс.
ПОМЫСОВ. Ме дорӧ воліс. Пантиль Вера комын во сайын вошліс, да менӧ кӧсйӧ мыждыны. Абу кӧ торксьӧма, татшӧмтор он вермы думыштны.
ВЕНЯ. Но, инӧ, торксьӧма.
НИКОЛАЙ. Ме ордӧ воліс да меным ёна тешкодьӧн жӧ кажитчис. Ме эг гӧгӧрво, мый висьӧ, да вӧтлі. Сӧрӧ быдторсӧ да.
ПОМЫСОВ. Гӧтырыс ачыс оз гӧгӧрво, мыйла гортсьыс мунӧма, некутшӧм помкатӧг эновтӧма семьясӧ, карас пӧ бичуйтӧ.
НИКОЛАЙ. Мися, ӧвсьы сӧрӧмсьыд. Ӧні ставыс гӧгӧрвоана лои.
ПОМЫСОВ. Висьысь мортлысь нӧ мый бурсӧ виччан. Кывйыд пӧ лытӧм. Со и сӧрӧ нем абусӧ.
НИКОЛАЙ. А меным тайӧ юрӧ эз волы.
ПОМЫСОВ. Висьӧ пӧ, висьӧ. Сӧрӧ быдторсӧ, лӧсьӧдлӧ.
НИКОЛАЙ. А сідзсӧ, видзӧдан да, быттьӧ прамӧй морт.
ПОМЫСОВ. Кутшӧм эськӧ прамӧй, вежӧрнас кӧ торксьӧма.
НИКОЛАЙ. А тэ, Веня, эн казявлы али мый?
ВЕНЯ. Но. Мый сэн сӧранныд?
ПОМЫСОВ. Тэ эн кывлы, мый Авенирыс юрнас торксьӧма? Кывлін жӧ эськӧ да.
ВЕНЯ. Но, кӧть ас костаным нинӧм абусӧ эн больгӧй. Сідз нин вукӧдӧ ставсьыс таысь.
ПОМЫСОВ. А тэ мый, сы ног жӧ кӧсъян сёрнитны?
ВЕНЯ. Но, вешйӧ вайӧ ме дорысь.
НИКОЛАЙ. Тэ абу-ӧ ачыд вежӧрнад торксьӧмыд?
ПОМЫСОВ (Венялы). Тэ йӧй али мый?
НИКОЛАЙ. Тэ вомтӧ сэн паськӧдлан! Тэныд мый, окота дзескыдінӧ юртӧ сюйны?
ВЕНЯ. Но, менӧ сёр нин повзьӧдлынытӧ. Менӧ олӧмыс и сідз топӧдіс. Комын во инвалидӧс видза. Ме став пыръяыс муні. Нинӧмысь ог пов.
ПОМЫСОВ. Ме тіянлы бура висьталі: Авенир торксьӧма юрнас. Тіянлы нӧшта колӧ мыйкӧ няклявны да вомад сюйны?
НИКОЛАЙ (Венялы). Тэ бура пель саяд сюркнялін, мый шуисны?
ПОМЫСОВ. Завидьысла. Нэмсӧ оліс, керка лэптіс сиктын, быдтысис, а сэсся йӧймис. Миянӧс, нималана йӧзӧс, мӧдіс увтыртны, да ӧд ачыс мунӧма следователь дорас. Ми вылӧ каттьысьӧма. Кутны эськӧ пемыд пельӧсын да зульӧдны.
НИКОЛАЙ. А тэ, Митя, он чайт, мый тайӧ кодкӧ тшӧктіс сылы вӧчнысӧ. Миянӧс няйтӧн лякны?
ПОМЫСОВ. Меным эськӧ тайӧ юрӧ эз волы да. Гашкӧ, и збыль.
НИКОЛАЙ. Вермас лоны, тэнад кутшӧмкӧ политическӧй прӧтивник. Медым тэнсьыд нимтӧ сьӧдӧдны да вӧтлыны депутатсьыд.
ПОМЫСОВ. Вермас лоны, вермас лоны. Петкӧдлыны эськӧ сылы гаж.
Квайтӧд петкӧдчӧм
Следовательлӧн кабинетын. Иван Назарович, секретарь (гижалӧ сёрнисӧ), Помысов, Авенир, Николай, Веня.
ИВАН НАЗАРОВИЧ. Комын куим во сайын, май 27-ӧд лунӧ, вошис том ныв — Подорова Вера Пантелеймоновна. Ме лэпті архивысь делӧсӧ, нуӧді прӧверка. Кытчӧ вошис гражданка Подорова, некод оз тӧд. Попов Авенир Васильевичсянь воис заявление, мый сійӧ луннас Ті, Помысов Дмитрий Витальевич, Ті, Дуркин Николай Николаевич, Ті, Максимов Вениамин Прокопьевич, Ті, Попов Авенир Васильевич, мырдӧналінныд Подороваӧс. Та бӧрын сійӧс некод нин эз аддзыв. Тіян мыжыд кыскӧ кык статья вылӧ.
ПОМЫСОВ. Иван Назарович, тайӧ кутшӧмкӧ недоразуменньӧ. Авенир Васильевич либӧ юрнас торксьӧма, либӧ кодкӧ сылы тшӧктӧма менӧ лёкӧдны. Ме вӧча заявленньӧ. Мед врачьяс гӧгӧрбок видлаласны Авенирӧс. Тайӧ висьысь морт. Гортсьыс пышйӧма да бичуйтӧ. Тырвыйӧ сюсь морт некор гортысь оз мун.
ИВАН НАЗАРОВИЧ. Дмитрий Витальевич, энлы тэрмась. Меным воис заявленньӧ, быть колӧ нуӧдны прӧверка. Ме тіянӧс кори, мед некымынтор юавны. Кӧні ті вӧлінныд комын куим во сайын май 27-ӧд лунӧ?
ПОМЫСОВ. Ме вӧлі гортын, дасьтыси экзамен кежлӧ.
ИВАН НАЗАРОВИЧ. Аддзылінныд-ӧ сійӧ луннас Подорова Вера Пантелеймоновнаӧс?
ПОМЫСОВ. Эг, эг аддзыв.
ИВАН НАЗАРОВИЧ. Николай Николаевич, Ті кӧні вӧлінныд сійӧ луннас?
НИКОЛАЙ. Вӧлі гортын, Вераӧс эг аддзыв.
ИВАН НАЗАРОВИЧ. Вениамин Прокопьевич?
ВЕНЯ. Но, ме вӧлі гортын, и Вераӧс эг аддзыв.
ПОМЫСОВ. Но тайӧ спектак. Пеж спектак. Ме тайӧс, Авенир, некор ог вунӧд. Эн думайт, мый тайӧ тэнад бурӧн помасяс.
ИВАН НАЗАРОВИЧ. Лӧньлӧй, лӧньлӧй, Дмитрий Витальевич. Меным колӧ дознаниесӧ водзӧ нуӧдны.
НИКОЛАЙ (небыдика). Да, Иван Назарович, эн эскӧй висьысь мортлы.
ИВАН НАЗАРОВИЧ. Ті, Авенир Васильевич, аддзылінныд-ӧ май 27-ӧд лунӧ Вера Подороваӧс?
АВЕНИР. Аддзылі. Ми вӧлім вӧр діас нёльӧн. Ме, Помысов, Дуркин да Максимов. Найӧ мырдӧналісны Вераӧс.
НИКОЛАЙ (чепӧсйӧ). А тэ аддзылін? Менӧ аддзылін?
АВЕНИР. Тэнӧ эг. Ме воштылі садьӧс. Но ме аддзылі, кутшӧм вӧлі Вера. Да-да.
ВЕНЯ. А менӧ? Менӧ аддзылін?
АВЕНИР. Эг.
ПОМЫСОВ. И ті сылы эсканныд, Иван Назарович?
АВЕНИР. А тэнӧ аддзылі. Да-да. Тэ медводз. Тэ — менам син водзын.
ПОМЫСОВ. Тэ йӧй. Абу тыр вежӧра. Ме талун жӧ гижа заявленньӧ. Кодлы вузалін ловтӧ? Коді медаліс тэнӧ? Мед лякӧсьтны менсьым бур нимӧс?
АВЕНИР. А тэнад сійӧ вӧлі, бур нимыд?
ПОМЫСОВ. Дугӧдӧй тайӧ спектаксӧ, Иван Назарович. Ме эськӧ тайӧ мортсӧ ас киӧн песовті.
АВЕНИР. Он вермы.
НИКОЛАЙ. Иван Назарович, миян син водзын увтыртӧны зэв пыдди пуктана мортӧс, миянлысь ёртӧс, депутатӧс, Дмитрий Витальевичӧс. Тайӧс тадз кольны оз позь. Мый висьталӧ Авенир, ставыс клевета. Сыысь тшӧтш эм статья, и сійӧс ковмас мыждыны. Ме лоа свидетельӧн.
ИВАН НАЗАРОВИЧ. Ме ветлі тіян сиктӧ, юаси йӧзыслысь, некод нинӧм тіянлы паныд эз висьтав. Заявленньӧ вӧлі, прӧверка нуӧдӧма. Авенир Васильевич, мыйла тэ аслад томдырся ёртъяс вылад тадзикӧн норасин, абу гӧгӧрвоана.
ПОМЫСОВ. Ме клеветаысь судӧ сета.
ИВАН НАЗАРОВИЧ. Тіян право.
АВЕНИР. Иван Назарович, ме ӧд эг найӧс лёкӧдӧм ради ті дорӧ шыась, ме ачым кӧсйи вештыны мыжсӧ. А ставыс мӧдарӧ артмис. Ме чайті, найӧ ме моз жӧ майшасьӧны.
ПОМЫСОВ. Ме эськӧ тэнӧ, татшӧм майшасьысьсӧ... Ас киӧн помалі. Тэ ачыд тӧдан он, коді тэ? Тэ — туй дор бадь. А тэ тӧдан, мый вӧчлывлӧны туй дор баддьыскӧд? Керавлӧны.
АВЕНИР. А менам ставыс син водзын, немтор эз вун, быттьӧ тӧрыт вӧлі. И нитшкыс, и чӧдйыс, ставыс гӧгӧрыс гӧрд пӧнарика...
ПОМЫСОВ. Ме ӧд шулі, мися, висьӧ мортыс.
АВЕНИР. Чӧд вӧлі сэки дзордзалӧ.
НИКОЛАЙ. Ті кывлінныд? Чӧд пӧ дзордзалӧ. Кодкӧ аддзылінныд, кыдзи чӧдйыс дзордзалӧ? Иван Назарович, ме уджала образование юкӧнын, бура тӧда психология, и верма стӧча шуны, мый тайӧ мортыслӧн вежӧрыс вӧрзьӧма.
АВЕНИР. Ті, ті... Ті сійӧ луннас воштінныд ассьыныд яндзимнытӧ, ті талялінныд сійӧс асланыд кок улын, сідз жӧ, кыдз Вераӧс, тайӧ сӧстӧм, муса нывсӧ. И тіян долыда овсьӧ-вывсьӧ. Сӧвесьтныд тіянӧс оз мучит. Кыдз сӧмын тіянӧс муыс новлӧдлӧ? Быдӧн тіян пиысь гыжнас кутчысьӧма олӧмас, нимкодясьӧ. А Вералӧн ті вӧсна кусі олӧмыс. Вера, и ме эг вермы тэнӧ дорйыны. Ме мыжаыс, ме. И некор ог вермы тайӧ мыжсьыс мынны.
Занавес
Авансцена. Скамья, дорас усьӧма Авенир, видлӧ чеччыны, но оз вермы. Код.
АВЕНИР. Вера, прӧстит. Ме ог вермы тайӧ мыжнас овнысӧ. Либӧ босьт менӧ ас дорад. Вера!
Матыстчӧ Наташа, Авенирлӧн нылыс.
АВЕНИР. Вера, тэ воин. Тэ мела воин. Вера, прӧстит.
НАТАША. Батьӧ, чеччы, лок гортӧ мунам. Йӧзыс дивитасны.
АВЕНИР. Вера.
НАТАША. Ме абу Вера. Ме — Наташа. Мунам гортӧ. Лӧсьыда мӧдам овны, батьӧ.
АВЕНИР. Наташа, тэ? Тэ мела воин. Наташа, вай гортӧ мунам.
НАТАША. Батьӧ, тэтӧг гортын гажтӧм. Мамӧ виччысьӧ и.
АВЕНИР. Мунам, мунам. Мед сӧмын видлас кодкӧ тэ вылӧ воны! Иван Назаровичыс шуис, мед ме тэнӧ видза. Да-да. Вера, прӧстит.
ПОМ
