МАМЛЫ КОЗИН

Тӧдіс кӧ эськӧ Нина, мый ставыс тадзи артмас, нинӧмысь эськӧ эз пет ывлаӧ ворсны. Но мӧдарсянь кӧ, и ошйысьны-петкӧдчыны вӧлі окота выль лӧз дзоридза платтьӧнас. И кор Миша да Дима чукӧстісны сійӧс ворсны, Нинук пыр и петіс.

Детинкаяскӧд век вӧлі интереснӧ. То пывсян либӧ гид вывсянь лым толаӧ чеччалӧны, то ӧшмӧс дор йизьӧдӧны, аслыссяма исласянін вӧчӧны, то крут чой йывсянь исласьӧны. А детинкаяс босьтлісны Нинаӧс сы вӧсна, мый Нина ньӧти абу ляб, да збой. И нывка тайӧс тӧдіс, и некор эз няргыв, кӧть мый эз лолы.

И талун зонкаяслы эз петкӧдлы, мый нормис. Зэв на, быттьӧ, гажаа и ӧвтыштіс кинас:

— Вурышта да бӧр локта.

А сэтшӧм ӧд гажаа да пелька ветлӧдлісны потшӧс прасла кузя. Майӧгысь майӧгӧ. Миша керка дорті. Кыкысь сӧмын и ковмыліс Ниналы чеччыштны лым пиас, довъёвмунлі да. Мӧдысь чеччыштӧм бӧрас детинкаяс, да и ачыс Нина, дыр сералісны. Сы вӧсна, мый кыскис Нина коксӧ, а гынкӧмыс коли пыдӧ лым пиас. А лымйыс топалӧма нин, сылыштавліс да. И некыдз куимӧн оз вермыны перйыны сибдӧмторсӧ. Ковмис Мишалы гортас зырла пыравны да, гынкӧм гӧгӧрыс лымсӧ паськыда кодйӧм бӧрын, вӧлись шедіс. Туплясьӧмӧн сьӧмдытӧдзыс сералісны. Вот, вот. И мамыс Ниналы шулывлӧ ёна серавлігас, бӧрдӧм водзад пӧ.

Но оз. Нина оз мӧд бӧрдны. И кыдз сӧмын сійӧ майӧг йылас ӧшйис выль платтьӧнас! А шедӧдчигас пессьыны мӧдіс да майӧгыд и розьӧдіс, а сэсся бӧждорӧдзыс воссис платтьӧыс. А ӧд снитки выль вӧлі. Талун мамыс козьналіс.

Нина котӧртіс гортас. И колӧ жӧ нӧшта Лидакӧд вочаасьны. Пуктӧма рузумӧ гартлӧм акань даддьӧ да сійӧс кыскалӧ. Аддзӧма ворсантор. Кӧть Нина да Лида велӧдчисны ӧти классын, ӧтлаын эз ворслывлыны. Ниналы вӧлі сыкӧд гажтӧм. Да нӧшта поліс, мый детинкаяс мӧдасны серавны да оз мӧдны босьтны аскӧдныс.

Лида шыасис медводз.

— Нина, тэ эн вунӧд, мый талун мамъяслӧн праздник?

— Эг, — шуис Нина, кӧть эськӧ сылӧн тайӧ юрас эз вӧв.

— А мый тэ мамыдлы козьналін? — бара юаліс Лида.

— Нинӧм эг.

— А ме вӧчалі уна пӧлӧс кабалаысь дзоридзьяс, а сэсся на менам и дневникын кык «пять», — ошйысис сійӧ.

— Мед, — нурбыльтіс Нина. А юрас визьнитіс: а сылӧн дневникас «три». И збыль, мамыслы нинӧм эз козьнав.

Мед эз аддзыв Лида косяссьӧминсӧ, бокӧн ковмис сы дорті мунны. Воис гортас, пӧрччис платтьӧсӧ да мӧдіс сійӧс еджыд сунисӧн вурны. Куимысь чуньсӧ бытшкыліс, ӧд дзик на медводдзаысь ачыс вурсьӧ.

Кор удж вылысь воис мамыс, Нина топӧдчыштіс сы дорӧ да родӧмпырысь шыасис:

— Мамук, ме талун кык мыж вӧчи.

— Кутшӧм мыж?

— Тэныд козинтӧ праздник кежлад эг дасьты, и нӧшта...

Нывка неуна чӧв олыштіс, сэсся содтіс:

— Выль платтьӧыд косяссис. Но тэ эн шогсьы, мамук, ме сійӧс вурышті нин. Со.

Мамыс видзӧдліс Ниналысь уджсӧ, сэсся шылькнитіс юрӧдыс да ошкыштіс:

— Тэ тай ыджыд нин вӧлӧмыд. И киподтуя. Таысь бур козиныс меным оз и ков.