МЕЗД-БЕДЬ

Танялӧн батьыс мамыслы ичӧтик тэльӧб лӧсавліс. Воропсӧ мичаа серӧдлӧма.

— На, — шуӧ, — отсасьысьӧс вӧчи тэныд. Рокыд либӧ картупельыд кӧ латкаад сибдас, зэв кокни лоӧ тайӧн вуштынытӧ. И дозмуксӧ оз тшыкӧд.

Мамыс видлаліс тэльӧбсӧ да нюммуніс.

— А збыль ӧд отсасьысь. Кыдз тэн тайӧ юрад воис? — шензьыштіс сійӧ.

— Мезд-бедь тайӧ лоӧ, — нимтіс батьыс.

— А мыйла «мезд»? — сёрниӧ сюйсис Таня.

— А сы вӧсна, мый тайӧ бедьторйыс йӧзлы отсасьысь, пикӧ воӧмаясӧс мездысь.

— А быдӧнлы сійӧ отсасяс? — бара юасьӧ Таня.

— Быдӧнлы, — серамыс петіс батьыслӧн. — Коді шуас: «Мезд-бедь, мезд-бедь, отсав», сылы и отсалас.

Узьны водӧм бӧрын Таня дыр эз вермы унмовсьны. Сэтшӧма сійӧ мӧвпаліс мезд-бедь йылысь. Аски ковмас босьтлыны сійӧс школаӧ. Отсасьысьыс Танялы зэв ёна колӧ. Ӧти-кӧ, математика урок вылын мӧдасны юасьны босьталан таблица, а Таня оз на бура тӧд. Босьтас мезд-бедьсӧ киас и корас отсӧг. А мӧд-кӧ, сійӧ вермас дорйыны Клёпаысь. Тадзи шуисны Танялысь суседсӧ, коді вӧлі кык арӧсӧн ыджыдджык да велӧдчис витӧд классын. Збыль вылас эськӧ сылӧн нимыс Валерий, но нывкаяс ас костаныс Клёпаӧн нимтісны. Сійӧ велӧдчис воддза сменаын, а Таня — мӧдын. И быд лун вочаавліс нывкаӧс, а бӧръя лунъясӧ весиг лым мачӧн колльӧдліс.

Сідзи Таня мӧд лунас и вӧчис, босьтіс школаӧ мезд-бедьсӧ. Математика урок вылын чабыртіс киас да шуис: «Мезд-бедь, мезд-бедь, отсав». А сэсся урок чӧж уджаліс, вочавидзис быд юалӧм вылӧ. И Танялы пуктісны урокысь «пять».

Нимкодь нывкалы: со ӧд кутшӧм бур отсасьысь ӧні сылӧн.

Школаысь петігӧн бара киас бедьсӧ чабыртіс да шуис: «Мезд-бедь, мезд-бедь, отсав». И мӧдӧдчис. Гортас сылы позьӧ мунны куимлаті. Гӧгӧртны садик да выльӧн лэптӧм керка дорті, кӧні некод на оз ов. Но сэті ветлӧдлыны Танялы мамыс оз тшӧкты: стрӧитчанінтіыс пӧ нинӧм келавнысӧ. Мӧд туйыс гӧгӧра жӧ лоӧ, шуйгаладортіыс куим судтаа керка дорті. Но сэні олӧ Варс нима ыджыд сьӧд пон, да Таня сэті оз лысьт муннысӧ. А медся дженьыд туйыс куим судтаа керка веськыдладортіыс да садик косттіыс. Сэті медсясӧ йӧзыс ветлӧдлӧны. Но некымын лун сайын, мыйӧн лымйыс небзьыштіс, туй дорас, керка стен бердас Клёпа вӧчис ыджыд лым глызаясысь крепость сямаӧс. И сэтысянь Танялысь локтӧмсӧ быд лун кыйӧдӧ да лым мачӧн лыйлӧ.

Талун нывка эз пов. Сылӧн вӧлі отсасьысь. Матыстчис сійӧ местаӧдзыс, кытысянь сэсся векджык котӧртлывліс, да сувтыштіс. Сьылісӧ нюжӧдӧмӧн кыйӧдчыштіс, но лым глызаяс сайын некод эз тыдав. «Абу талун локтӧма, — чайтіс сійӧ. — И тані мезд-беддьыд отсасьӧ».

Сӧмын тадзи мӧвпыштіс, крепостьын кодкӧ вуджӧртчис. И Танялань лэбис лым мач. Нывка чур-чермуні повзьӧмсьыс, уськӧдчис котӧртны, джӧмдіс да уси веськыда туй вылас, киыс разьсис, и мезд-беддьыс уйыштіс лым пиас.

Таня весиг кок йылас эз сувт, бауӧн и нюжӧдчис лым толаас: мӧдіс корсьны мезд-бедьсӧ. Гудраліс небыд на лымсӧ, некымын шоныд луннад абу на удитӧма чорзьыны да топавны. Сӧмын юрсӧ бергӧдыштіс, видзис чужӧмсӧ лым мачьясысь. А найӧ лэбисны и лэбисны: мышкас, пельпомас, юрас. Таня чайтіс, мый лым мачыс помтӧм. Мезд-бедь эз сюр. Нывка пӧрччис кепысьсӧ да куш кинас мӧдіс чабравны лымсӧ, но ставыс весьшӧрӧ: беддьыс быттьӧ сылӧма. Таня пуксис туй юж вылас да гораа бӧрддзис. Ёна доймис син дорыс, кытчӧ веськаліс лым мачыс. Ӧбиднӧ вӧлі мезд-бедьсӧ воштӧмысь. Да и киыс лымъяс гудрасьӧмысь вӧлі курӧг лапа кодь гӧрд да сотчис кынмӧмысла. Таня кӧсйис кепысясьны, но ва киыс кепысяс эз тӧр, и ковмис разьны пальто кизьяссӧ да сюйны кияссӧ питшӧгас. Ачыс гораа бӧрдіс.

Клёпа мыччис юрсӧ лым стена сайысь да видзӧдіс сы вылӧ, сэсся петіс да воськовтіс нывкалань.

— Мый воштін? — юаліс Клёпа. Но Таня лимзаліс да эз вермы нинӧм висьтавны. Да эз и кӧсйы Клёпалы, код вӧсна воштіс мезд-бедьсӧ. Оз, оз, Таня оз висьтав.

Синваыс гӧгыльӧн визувтіс сы чужӧм вывті.

И друг... Клёпа нюжӧдчис Танялань да инмӧдчис шоныд кинас сылы бан бокас, чышкыштіс нывкалысь синвасӧ.

Таня другӧн ланьтіс, сӧмын коръясӧкӧ сыркмунліс ёна бӧрдӧмсьыс. А Клёпа, мирас медся лёк детинкаыс, чышкаліс сылысь синвасӧ да шуаліс:

— Эн бӧрд, кылан? Ме сэсся некор тэнӧ ог ӧбидит. Кылан? И некод сэсся тэ вылӧ кинас оз лысьт воны. Некор и некод. Кылан?

И тайӧс шуаліс Клёпа. Медся скӧр да лёк зонкаыс. Тайӧ, дерт, мезд-беддьыс мездіс. Ачыс воши, а Танялы отсаліс. Дерт жӧ, эз ачыс бурӧн ло Клёпаыс. Мезд-беддьыс тадз вӧчис.