ЧОШӦЯСЛЫ ПӦЛАТЬ

Талун асывнас Анна кыліс мам-батьыслысь тешкодь сёрни. Мамыс шуис:

— Порсь гидас ваыс ёна кутіс ӧкмыны. Вольӧс ни нинӧм оз отсав. Джоджавнысӧ ӧні, страдна кадӧ, некор, а узьлынысӧ кӧть чошӧясыслы пӧлать колӧ вӧчыштны.

— Удж бӧрын мастеритышта. Чайта, рытпомӧн и эштас. Пӧвъясыс эмӧсь, — эскӧдіс батьыс.

Анналӧн и вомыс калькмуні, сэтшӧма чуймис. Порсьлы пӧлать? Асланыс налӧн пӧлатьыс эз вӧв. А аддзывліс сійӧс Агния баб керкаысь, весиг кайлывліс сэтчӧ. Пӧлатьыс вылын, пӧтӧлӧк дорас. Медводз паччӧр содті каян, а сэсся пӧлатяс вуджан. Но порсьяслы пӧлать?

Ӧдва вермис Аннуш виччысьны рытсӧ.

Петісны ая-ныла порсьлы пӧлать вӧчны. Бӧрйисны пӧвъяс, мерайтісны гидлысь кузьтасӧ, да сы кузьтаӧ и мӧдіс батьыс пӧвъяссӧ пилитны. А Аннуш сы гӧгӧр бергалӧ, отсасьӧ, кутӧ, мед местасьыс оз вешйыны.

— Пап, а нӧшта на ӧд и содъя пу ковмас вӧчны? — эз вермы терпитнысӧ да юаліс Аннуш.

— Кутшӧм содъя пу? — шензьӧ батьыс.

— А порсьясыдлы пӧлатяс кайны.

— А, — серӧктіс батьыс, — найӧ содъя путӧгыс каясны.

Кыдз нӧ найӧ, коньӧръяс, каясны сэтшӧм вылӧсӧ? Кокъясыс ӧд налӧн сэтшӧм дженьыдӧсь!

Аннаяслӧн гидас кык чошӧ: Гӧрд Ныр да Кузь Ныр. Радейтӧ нывка пыравлыны на дорӧ, то турун пыртыштас, то мамыскӧд ӧтвылысь юкталас. А медся ёна, тайӧс нин Анна тӧдӧ, радейтӧны найӧ воййыв турун да йӧн.

— Папа, а мыйла порсьясыслы пӧлатьыс колӧ?

— Мамыд тай шуӧ, гидыс пӧ ва да няйт.

— Порсьясыслы ӧд ваыс да няйтыс и колӧ, век тай няйт гуранӧ пырӧны.

— Ок тэ, Аннуш, нинӧм тай он вӧлӧм тӧд аслад другъяс йылысь. Ваас найӧ пыравлӧны жар лунӧ да лӧддза-номъя кадӧ. А сідзсӧ зэв на и радейтӧны сӧстӧмлунсӧ. Став гидсӧ найӧ оз лякӧсьтны, ӧти пельӧсӧ ветлӧны. И узьны радейтӧны векджык ӧтилаын, косінын, кос вольӧс вылын. А кор кӧдздӧдас, вольӧс пиас пырӧны, чом кодь вӧчӧны аслыныс. Зэв тӧлка пемӧсъяс.

— А мыйла нӧ либӧ миян садъяс воспитательницаыс шуӧ Игорыслы, порсь моз пӧ сёян.

— А Игорыс мый, лёка сёйӧ?

— Став дӧрӧмсӧ и пызансӧ лякӧсьтӧ.

— А тэ ӧд аддзывлін, кыдз порсьясыд сёйӧны. Кузь Нырыд водз кокнас воръяс пырӧ. Сійӧн и шуӧны няйта сёйысьястӧ порсь кодьӧн.

Регыд пӧвъяссӧ пилитсис. Анна новліс найӧс гидӧ. Батьыс мастеритіс чошӧяслы пӧлать, да эз вылӧ, пӧтӧлӧк бердас, а улӧ, джоджсьыс кык чунь вомлӧс и лэптіс.

А Анна, мед чошӧясыс эз мешайтчыны батьыслы, петкӧдіс найӧс йӧрӧ. А налы любӧыд! Ризъялӧны Анна бӧрся да руксӧны. Сэсся Аннуш пыртіс гидас кос вольӧс да разӧдіс выль пӧлатяс. Мед бура узясны косінын чӧскыд дука турун вылын нывкалӧн нёль кока ёртъясыс: Гӧрд Ныр да Кузь Ныр.