КЫСУК АСНЫРАЛӦ
Талун Аннушӧс садйысь босьтіс Агния бабыс. Мамыс — фермаын, батьсӧ кытчӧкӧ ылі рейсӧ мӧдӧдӧмаӧсь. Петісны детсад йӧрысь. Ывлаыс шоныд. Лымйыс ставыс нин сылӧма, сӧмын увтасінъясын кольыштӧма. Анна кутчысьӧма пӧчыслы ыджыд сарӧгӧсь киас да дугдывтӧг сёрнитӧ.
— Талун миян воспитательница висьтавліс нянь йылысь. Няньтӧ оз позь шыблавны. И нӧшта на шуис, мед ми та йылысь ставлы висьталам. Тэ, Агния баб, няньтӧ эн шыблав. Сійӧс зэв сьӧкыд быдтыныс.
— Ок тэ, шӧвктуг, да менӧ ӧмӧй колӧ велӧдны няньсӧ видзны? Ме ӧд сійӧс ас киӧн быдтывлі. Вундігад вӧлі быд шепла мышкыртчылам. Кӧдзам, быдтам, а сёйныс вӧлі аслыным оз тырмы. Вот ті, том войтыр, энӧ ышмӧй ӧнія бур олӧмнас.
Тадз сёрнитігтыр найӧ и воисны горт дорӧдзыс. Аннушлы ещӧ на окота вӧлі кодлыкӧ висьтавны нянь йылысь.
— Агния баб, ме тӧкӧтьӧ кежлӧ Шур ордӧ пырала.
— Дыр эн ветлы.
Шур пукаліс пызан саяс да кыв помсӧ мыччӧмӧн мыйкӧ гижис.
— Мый ветлан? — дӧзмӧмпырысь юаліс сійӧ.
— Висьтавны колӧ ӧтитор, вот и локті, — збояліс Аннуш. — Миян талун воспитательница беседа нуӧдіс и висьталіс, мый няньтӧ оз позь шыблавны. Вот. И колӧ сёйны ичӧтик торъясӧн.
— Тэтӧг тӧда.
— А миян воспитательницаыс шуис, мед ми ставлы висьталам.
— Ӧти-кӧ, ме ичӧт торнас ог пӧт, — юрсӧ довкйӧдлӧмӧн висьтавліс Шур, — ме радейта ыджыда шӧралӧм нянь. Мӧд-кӧ, миян нин учительница кыкысь нуӧдліс беседасӧ, и ме ачым ставсӧ тӧда. Коймӧд-кӧ, вай гӧнит гортад, мен урок колӧ вӧчны. Гӧгӧрвоин? Анна-Ванна, бригадир.
Шур ордысь петӧм бӧрын орчча йӧрысь Аннуш аддзис Иван дедӧс, суседсӧ, коді пукаліс кильчӧ вылас да куритчис. Анна вуджис потшӧссӧ, матыстчис да пуксис сы дорӧ, сӧмын кык содйӧн улӧджык. Иван дед пӧрысь нин, беддьӧн ветлӧ.
— Иван дед, миян талун воспитательница садйын висьталіс, мый няньтӧ оз позь шыблавны.
— Оз, оз позь, — довкнитіс юрнас пӧль.
— И ставлы тшӧктіс висьтавны. Эн шыблав няньтӧ, Иван дед.
— Ог, Анна, ме няньтӧ некор ог шыблав. Ме тӧда няньыдлысь донтӧ, нылук.
Иван дед чӧв олыштіс, кыскыштіс гоз-мӧдысь чигаркасӧ да содтіс:
— А медся страшнӧйыс, Анна, кор аддзан нянь сотчӧмсӧ. Ме сэтшӧмторсӧ аддзылі война вылысь. Украинаысь. А сэні муясыд абу ми кодьӧсь, паськыдысь-паськыдӧсь, помтӧм-дортӧмӧсь. И нянь гыалӧ, воӧма нин. Ковмис миян нянь му дорас окопъяс кодйыны. Быд шеп бокӧ пуктім, мед оз вош. А немеч ӧзтіс няньсӧ. И ставыс миян син водзын сотчис. Вот тадз, Аннуш, няньыдлысь ме донтӧ тӧда.
Аннуш казяліс, кыдз пӧльлӧн чужӧмыс нормис да зумышмис.
— Но мун сэсся, ворс, — ыстіс сійӧ нывкаӧс.
Аннуш ньӧжйӧник мӧдӧдчис гортланьыс. Воис асланыс дзиръя дорӧ да сувтыштіс. Кодлы нӧ эськӧ нӧшта висьтавны нянь йывсьыс? Некод матігӧгӧрын эз тыдав. Кӧть эськӧ Пиль Колялы висьтавны, но сійӧ Шуркӧд ӧти классын велӧдчӧ, ачыс нин тӧдӧ. Питирим дядьясӧ пыравны? Но налӧн Вугыр нима понйыс зэв курччасьысь. Сідз Аннуш нинӧм эз и вермы думыштны.
Пырис гортас. Сыкӧд тшӧтш брысьнитіс-пырис Кысук каньыс да матыстчис аслас сёян дозлань, сэні йӧв пиын вӧлі куим нянь тор. Кык торсӧ Кысук нюм-ням вӧчис, а коймӧдсӧ эновтіс. Вешйис бокӧ, пуксис да мӧдіс нювсьыны-мыссьыны. Аннуш уськӧдчис сы дорӧ.
— Кысук, сёй, оз позь няньсӧ шыблавны.
Кань мыссис, быттьӧ эз и кывлы нывкалысь шуӧмсӧ.
— Кодлы шуи, сёй нянь торсӧ.
Кысук весиг пельсӧ эз вӧрзьӧдлы.
— А, тэ тадзи, — горӧдіс Аннуш, босьтіс каньӧс да мӧдіс зурӧдны сійӧс сёян дозъяс. Но кань нявзіс, нетшкысис, а сёйны эз кӧсйы.
— Но, эн мучит каньсӧ, — ӧлӧдіс нывкаӧс Агния бабыс.
Кысук асныраліс. Анна скӧрмис. Медбӧрын кань сарпыштіс Анналысь кисӧ да гӧбӧч розьті уйкнитіс-пышйис.
— Мый сійӧ оз сёй няньсӧ? Мыйла оз кывзысь? — шуаліс Анна бӧрдігтыр. Миян воспитательницаыс шуис, ставлы пӧ висьталӧй, мед некод оз шыблав.
— Да энлы, Аннуш, бӧрд. Каньыд ӧд оз быдтор гӧгӧрво, — лӧньӧдіс нывкаӧс пӧчыс. — Мед оз кӧ сёй. Оз на шыбитсьы ӧти нянь торйыд. Петкӧд пос помӧ да чирйышт. Ӧдйӧ на гулюяс локтасны да кокаласны.
— Петкӧда либӧ, — век на бӧрдӧмсьыс сыркъялігтырйи шуис Аннуш.
