ОШЛЫ — НИТШ ПИНЬ

Талун Анналӧн сёйигӧн пиньыс уси. Гольсмуні паньыс пиняс, и турс-торс. А водзынджыксӧ пиньыс вӧрӧ нин вӧлі, ёна нин кывнас сійӧс летіс. А век жӧ забеднӧ Аннушлы лоис. «Кыдз нӧ пиньтӧгыс кута овны? Ставыс ӧд серавны мӧдасны. Да сэсся пиньтӧгыд и шушкыль кывъя лоа. Агния баб моз мӧда сёрнитны», — шогсьӧ нывка. Тӧкӧтьӧ оз бӧрд. Синваыс доршасьӧ.

Но мамыс пыр и бурӧдіс нывкаӧс, эн пӧ шогсьы, выль пинь петас.

— Кысь петас, Агния бабыдлӧн тай оз пет!

— А тэнад петас. Шыбит пиньтӧ гӧбӧчӧ да шу:

Вир туп, яй топ,

Ошлы — нитш пинь,

Каньлы — йӧв пинь,

Шырлы — яй пинь,

Меным — лы пинь.

— Мам, а мыйла тайӧ колӧ шунысӧ? — юалӧ Аннуш.

— Мед выль пинь петас.

— А мыйла нӧ тэ эськӧ Агния бабыдлы он висьтав тайӧс? Шуас кӧ, гашкӧ, сылӧн быдмас жӧ выль пиньыс.

— Пӧрысь нин сійӧ, оз нин сылӧн быдмы.

— Мама, а ошкыс мый сёйӧ?

— Вотӧс сёйӧ, турун. Таво тай, вельмӧма да, совхоз му вылӧ гусясьны, зӧр сёйны пӧ быд вой волӧ.

Аннуш ошъястӧ картина вылысь да телевизор пыр аддзывліс. «А мед, колок, и нитш пинь петас, лёка гусясьны волывлӧ, — думайтӧ нывка, — а вотӧстӧ и нитш пиньнас позьӧ няклявны».

Каньыслы йӧв пиньыс тшӧтш лӧсялӧ. А то сылӧн пиньыс вывті ёсь. Тӧрыт вӧлі пышкайӧс кутӧма да сёйӧма. Гӧнсӧ коньӧрлысь сӧмын кольӧма. «Мед каньыслы йӧв пинь быдмас. Кӧть оз кут ышнясьны ёсь пиньнас да лэбачьясӧс кутавны», — водзӧ мӧвпалӧ Аннуш.

А шырыс...

— Мама, а шырыс мый сёйӧ? — юалӧ нывка.

— Шырыс? Быдторсӧ сёйӧ: шыдӧс и, сукар и... Мый сюрӧ пинь улас, сійӧ и гиджгӧ-йирӧ, — вочавидзӧ Аннушлӧн мамыс. «Хы, — думайтӧ Анна, — кыдз нӧ шырыс мӧдас сукарсӧ йирны яй пиньнас? Агния баб тай со пиньтӧм да кӧтӧдӧ-небзьӧдӧ сукарсӧ чай пиын».

— Мама, — бара шыасис Аннуш, — а шырыс нӧ эськӧ чайсӧ юлывлӧ оз?

— Оз кӧ-а, эг некор казявлы, — серӧктіс мамыс.

Сідзкӧ, некыдз оз позь сетны шырыслы яй пиньсӧ, сылы ӧд сёйны жӧ колӧ, думайтӧ Аннуш.

— Но мый, эн на шыбит пиньтӧ? — юалӧ мамыс нывкалысь. — Шыбит ӧдйӧджык. Эн вунӧд, мый колӧ шунытӧ.

Аннуш матыстчис гӧбӧч ӧдзӧс дорӧ, видзӧдліс пемыдас Кысук ветлан розьті, чӧвтіс сэтчӧ пиньсӧ да вордіс:

Вир туп, яй топ,

Ошлы — нитш пинь,

Каньлы — йӧв пинь.

а сэсся ньӧжмӧдіс гӧлӧссӧ да содтіс:

Шырлы — лы пинь,

И меным — лы пинь.