ПОВЗЬӦДЧЫСЬ

Талун рыт Аннушлӧн бать-мамыс мунісны кино вылӧ. Нывкалы тшӧктӧны вӧлі петны суседъясӧ либӧ Агния бабыс ордӧ мунны, но Анна эз кӧсйы. Шурыс, суседъяслӧн детинкаыс, бара эськӧ дэльӧдчыны мӧдіс, полысь кӧчӧн нимтыны. Бурджык нин гортас ӧтнас олас.

И вот Анна ӧтнас. Ворсны абу окота. Чукӧртіс чачаяссӧ шкапӧ, мичаа тэчис полкаяс вылӧ. Пӧрччысис, став паськӧмсӧ ӧшліс улӧс бӧрвылӧ, кусӧдіс бисӧ да водіс узьны. Вольпасяс куйлігӧн нин нывка думайтіс, мый регыд помасяс кино, вот мамыс воас да мӧдас шензьыны, кутшӧм быдлаті керкаас сӧстӧм. Чачаяс и паськӧм — ставыс ас местаын.

Ойбырмунлі нин Аннуш, и друг кыліс кутшӧмкӧ некор на кывлытӧм шы: гирс-гурс, гирс-гурс. Вот ӧні Аннуш и повзис! Весиг лолавнысӧ дугдыліс. Топыдджыка эшкыннас гаровтчис, юр вывтіыс шебрасис. Но регыд пӧдны мӧдіс да бӧр ковмис мыччыны нырсӧ. А кӧнкӧ пач дорланяс век: гирс-гурс, гирс-гурс.

Татшӧма Аннуш некор на эз повзьыв. Весиг эшкын улас йирмӧг босьтіс. Дыркодь нин коли кадыс. Гирскӧмыс эз дугды. Мый вӧчны? И сэтшӧм дыр оз помась киноыс.

Друг нывкалы уси дум вылас батьыслӧн коркӧя шулӧмыс: колӧ быть тӧдмавны, мыйысь повзян. Сэки и полӧмыд оз ло.

— А вот чечча да и видзӧдла, мый гирскӧ, — гораа шуис Аннуш.

Медводз колі биасьны. Анна нюжӧдіс кисӧ да бергӧдіс выключательсӧ. Лампочка яръюгыда сявкнитіс бинас став комната пасьта. Гирскӧмыс здук кежлӧ дугдыліс. Сэсся паччӧр вывсянь бара: гирс-гурс, гирс-гурс.

Анна вештіс эшкынсӧ да звирк чеччис. Лыбӧдчис паччӧрӧ. А вот коді вӧлӧм гирскӧ! Кысукыс асланыс! Ворсӧ тыртӧм сакар кудйӧн. Небыдик лапанас кудсӧ паччӧртіыс ӧтарӧ-мӧдарӧ вешталӧ. А сакар кудсӧ Анна ачыс талун лэптіс паччӧрас, кор аканьясӧн ворсны кайліс. А лэччӧдныс и вунӧдӧма.

— Ак тэ, повзьӧдчысь! — Аннуш босьтіс киас каньӧс, лэччӧдіс паччӧрысь да пуктіс крӧвать вылӧ ас дінас. Ӧні Аннуш нинӧмысь нин эз пов.