УСЬКӦДЛЫСЬ ЛЫЗЬ
Батьыс Анналӧн шофёр. Сійӧ журкнитлӧма-ветлӧма карӧ да вайӧма нылыслы выль лызь. Лызьыс мича, кузь, лӧз краскаӧн мавтӧма, а нырас нӧшта на и лым чир серпасалӧма. А Аннушлы нимкодьыс. Матыстчылас лызь дорас, видлас, шыльӧдыштас, киас босьтас да чеччалыштас, бӧр пуктас.
Ӧдва вермис Аннуш мӧд лунсӧ виччысьны. Да и шойччан лун слӧймис, оз ков садйӧ мунны. Водз зэв чеччис. Тшӧкыда видзӧдлывлӧ, оз-ӧ нин кыз гыӧра ӧшинь пырыс югыдыс тыдав. Ньӧжйӧник мӧдіс жӧ асылыс лӧзавны, а сэсся югдіс. Босьтіс Аннуш лызьсӧ да петіс ывлаӧ. Кӧдзыдыс пыр и тшапкис нывкаӧс нырӧдыс. Шондіа. Югыд. Лымйыс дзирдалӧ да дзуртӧ кок улад.
Лызясис Аннуш да мӧдӧдчис Шыльыд чой дінӧ, кытчӧ векджык чукӧртчывлӧны посньыдджыкъяс. Ньӧжйӧник Аннуш мунӧ, мед быдӧн аддзыласны, кутшӧм мича лызь вайис сылы батьыс. Воис Шыльыд чой дінӧ, а сэні челядь пиысь некод абу, сэтшӧм водз петсьӧма Аннушлӧн. Сувтіс чой йылас. Сьӧлӧмыс радысла тіпкӧ. Сэсся йӧткысис бедьяснас, исковтіс да и шнёпкысис-уси. Ёнакодь эськӧ доймис, но кутчысис, эз бӧрддзы. Чой вочасӧ некыдз лызьнас эз вермы кайныс, сэтшӧм вильыд. Ковмис пӧрччыны да киас катӧдны. Мӧдысь исковтіс — бара уси. Коймӧдысь, нёльӧдысь... И век усялӧ.
Синваыс доршасьӧ Аннушлӧн. Со ӧд кутшӧм мича лызьыс, да уськӧдлысь вӧлӧма. «Нуа гортӧ да шыбита кильчӧ улӧ, мед, колӧк, батьӧ ачыс исласьӧ лёк лызьнас. А ме ассьым важ ичӧтик лызьӧс босьта, сійӧ, небось, оз уськӧдлы», — мӧвпыштіс нывка.
Бергӧдчис бӧр гортланьыс, а сылы воча Шур локтӧ, суседыс, ӧти арӧн сӧмын и ыджыд Аннушысь. Зэв еджыд юрси вӧснаыс сійӧс нӧшта Нӧк юрӧн нимтӧны.
— Э-э-э, — серӧктіс Шур, аддзис лым сюръя кодь Аннушӧс да. — Тэн нин дӧвӧль сюрӧма.
Анна букышӧн видзӧдліс детинка вылӧ.
— А лызьыс, лызьыс! Кысь татшӧмыс? — завидьпырысь юасьӧ зонка.
— Батьӧ карысь вайис. Да омӧль лызь сюрӧма, уськӧдлӧ, — бара на нырнас кыскыштіс Аннуш.
— Вайлы, ме исковтла, — корис Шур.
Исковтіс да эз и усь. Аннуш вом паськӧдӧмӧн видзӧдӧ сы вылӧ.
— Эк тэ, уськӧдлысь лызь пӧ! Ачыд он куж да со и усялан, — дэльӧдан гӧлӧсӧн шуаліс Шур.
Аннуш весиг эз лӧгась тайӧ кывъяссьыс. Сэтшӧм сійӧ вӧлі рад, мый батьыс бур лызь вайӧма. А исласьныс ӧд велалас.
