МОРОЗ ПӦЛЬЛӦН КОЗИН

Асывнас, муртса Аннуш восьтіс синсӧ, пыр и уси дум вылас, мый талун Выль во. Чеччис вольпась вывсьыс и — ёлка дорӧ. Сідзи и эм. Ёлка улас мешӧк сулалӧ, гӧрд ленточкаӧн кӧрталӧма. Дерт жӧ, тані Мороз Пӧльлӧн козин. Сӧмын вот мый эськӧ тані? Аннуш помнитӧ, колян во Мороз Пӧль вайис дадь, воддза воӧ — акань. А талун нӧ мый?

Вежон чӧж нин Аннуш мӧвпалӧ козин йылысь. Весиг мамыслысь тшӧкыда юавліс:

— Ваяс оз таво Мороз Пӧльыс козинсӧ?

А мамыс вочавидзліс:

— Бура кӧ олан: гырысьяслысь кывзысян, чачаястӧ ворсӧм бӧрад ас местаӧ тэчан, гашкӧ, и ваяс.

И со. Кыскис Аннуш ёлка увсьыс мешӧксӧ, разис гӧрӧдсӧ, восьтіс. И кыскис сэтысь... Портфель. Вот тайӧ да! Портфель. А кутшӧм мича, сьӧда-гӧрда, мича югъялан томанъяса. Колснитіс-восьтіс томанъяссӧ. А пытшкас тетрадьяс, ручка, карандашъяс. Анна радысла эз тӧд, мый и вӧчны. Окота вӧлі кодлыкӧ петкӧдлыны козинсӧ, ӧтвылысь радлыштны. Кӧть эськӧ садйӧ нуан, но талун сэн некод абу, праздник лун. Мамыс, дерт, мӧсъяс дорын фермаын. А папыс кытчӧкӧ петӧма, абу жӧ гортын. Кӧть эськӧ суседъясӧ петавны, Шурлы петкӧдлыны. Но сійӧ таво велӧдчӧ нин школаын да, кӧнкӧ, бара кагалы моз шуас: «Аддзӧмыд, мыйӧн ошйысьны».

— Час, Агния баб ордӧ ветла.

Пасьтасис Анна, кӧлысас кияссӧ сюйӧмӧн лэптіс портфельсӧ мыш вылас (аддзывліс, кыдзи Шур ветлӧдлӧ школаӧ) да мӧдӧдчис пӧчыс ордӧ.

— Агния баб, — пырӧмӧн тшӧтш горӧдіс Анна, — Мороз Пӧльыд меным козин войнас вайӧма, портфель. Видзӧдлы, видзӧдлы, кутшӧм мича! Югыд томанъяса. А пытшкас, пытшкас! Абуыс сӧмын абу.

— Но, таво школаӧ нин мунан? — нюмъялігтыр юалӧ Агния баб.

— Школаӧ. Локтан ар муна. Сизим арӧс нин меным регыд лоӧ.

— Но и шань. Сідзкӧ, тэ нин ыджыд.

Аннуш чӧв олыштіс, мӧвпалыштіс, сэсся шуис:

— Агния баб, сӧмын ме вот некыдз ог гӧгӧрво, кытысь Мороз Пӧльыс тӧдӧ, мый меным портфельыс зэв ёна колӧ вӧлі?