СӦМЫН БУРӦН КАЗЬТЫЛА
«Кола» небӧг керка йӧзӧдӧма Владимир Александрович Ляшевлысь «Фонетико-морфологические особенности вымского диалекта» небӧг.
Тайӧ удж подулас сылӧн кандидат ним вылӧ диссертацияыс, коді уна во нин куйліс Коми туялан шӧринса архивын да кодӧн тӧдмасьны вермис сӧмын лыда морт. Небӧгсӧ артмис йӧзӧдны Княжпогост районса администрациялӧн кудйысь сетӧм сьӧм вылӧ, а котыртӧма та могысь став уджсӧ В. А. Ляшевлӧн важся ёртыс Г. С. Габов, Емваын да и республикаын уналы тӧдса морт, чужан кыв сӧвмӧдысь, «Коми котырын» важысянь зільысь.
Коми кыв туялысьяс пӧся аттьӧалӧны тайӧ водзмӧстчӧмсьыс Геннадий Степановичӧс. Выль небӧгсӧ киӧ босьтлӧм мысти меным окота лои казьтыштны важӧн нин абу ловъя коми кыв туялысьӧс.
Чужлӧма Владимир Александрович 1942-ӧд вося урасьӧм тӧлысь 7-ӧд лунӧ Визин сиктсӧветувса Кольёль неыджыд грездын. 1949-ӧд воӧ пырӧма Визинса шӧр школаӧ. Помалӧм бӧрас велӧдчӧма водзӧ Коми пединститутын, коми кыв да литература юкӧнын.
1964-ӧд воын Владимир Александрович босьтӧма диплом да медводз уджалыштӧма Позтыкерӧсса школаын. Сэсся том мортлы воӧма кад мунны армияӧ. Сӧмын сэки салдатпуӧс служитнысӧ абу на дзик пыр мӧдӧдӧмаӧсь. Сыктыв районса Горьковскӧй школаын велӧдысьыс абу тырмӧма да, уджалыштӧма на сэні роч кыв да литература велӧдысьӧн.
Та бӧрын В. А. Ляшев новлӧма армияын погонъяс. Воӧма служба вылысь бӧр Комиӧ 1965-ӧд воӧ августын. И дзик пыр жӧ пырӧдчӧма уджӧ: недыр велӧдӧма Сыктывдін районын Пычимса школаын, а сэсся ВЛКСМ Коми обкомын инструкторалӧма. Та бӧрын бара уджалӧма школаын — Сёськаын.
Чужан коми кыв дорӧ ыджыд интересыс вайӧдӧма Владимир Александровичӧс аспирантураӧ. Велӧдчӧма канкарын Кывтуялан институтын, гижӧма кандидат ним вылӧ диссертация нималана коми туялысь да кывбуралысь, профессор Илля Васьлӧн (В. И. Лыткинлӧн) юрнуӧдӧм улын.
«Фонетико-морфологические особенности вымского диалекта коми языка» темасӧ бӧрйӧма пыдісянь думыштӧмӧн. Владимир Александровичӧс сэки медъёна кыскӧма диалектология, коми сёрнисикасъяс туялӧм.
1977-ӧд вося йирым тӧлысьын Эстонияса Тарту карын сэтчӧс важ да нималана университетын В. А. Ляшев дорйӧма кандидат ним вылӧ диссертациясӧ.
Сэки сійӧ уджалӧма нин Кыв, литература да история институтын. Сэсся Владимир Александрович вуджӧма Велӧдысьяслысь тӧдӧмлун кыпӧдан институтӧ, кӧні 1989-сянь 1997-ӧд воӧдз веськӧдлӧма коми кыв, литература да культура кафедраӧн.
Владимир Александрович нем виччысьтӧг кувсьӧма 1999-ӧд вося косму тӧлысь 13-ӧд лунӧ 57 арӧсӧн.
В. А. Ляшев гижӧма 60 сайӧ удж, на лыдын некымын небӧг да кывчукӧр. Кытшовтӧма став Коми мусӧ экспедицияӧн, торйӧн нин Емва вож, лыддьывлӧма лекцияяс Сыктывкарса, Ижкарса, Будапештса университетъясын, Коми пединститутын, школаясын. Лыддьывлӧма докладъяс уна конференция да конгресс дырйи. Сылы сетлӧмаӧсь нимӧдан артнимъяс: «Йӧзӧс велӧдӧмын зэв бур уджалысь» (1997) да «Уджвывса ветеран» (1997). 1985-ӧд воын сылы сетӧмаӧсь Коми АССР-са Вылыс Сӧветлӧн Президиумлысь нимӧдана кабала.
Тайӧ кос юӧр дорас, дерт, колӧ мыйсюрӧ содтыштны. Владимир Александрович тшӧтш и менам туялан юрнуӧдысь. Университетын медводдза курсын велӧдчигӧн на сійӧ волывліс миян группаӧ. Ворсліс баянӧн, кутшӧмсюрӧ частушка сяма сьыланторъяс велӧдлім да сьывлім. Сэсся миянлы торъя курс да синтаксис йылысь лыддигӧн сійӧ зэв пыдди пуктӧмӧн волысис студентъяскӧд, асьсӧ вылӧ эз пуктыв. Коймӧд курсын сійӧ веськӧдліс менам курсвывса уджӧн, сетліс уна литература да весиг мыйсюрӧ ачыс на гижліс водзкывъяс. Витӧд курсын аспирантураӧ менам пыригӧн Владимир Александрович сьӧлӧмнас век вӧлі ме дор, отсавліс мыйӧн вермис: серакуяс ыставліс да литература вӧзйыліс, аслас небӧгкудйысь коланаторсӧ сетавліс. Тартуын менам велӧдчигчӧж век письмӧасим. И сы йылысь менам колис сӧмын бур казьтылӧм.
