КЫЗЬ КВАЙТ ЙЫЛЫСЬ БАЛЛАДА

Сьыв, поэт, сьыланкыв,
Сьыв.
Енэжыс — 
Кельыдлӧз тыв.
Саридзыс сьылӧ жӧ, бузгӧ,
Сьылӧ да кайтӧ:
Вӧліны найӧ
Кызь квайтӧн.
Кызь квайтӧс
Некод оз вунӧд,
Лыаӧн оз тыр
Налӧн гуныс.
Быдӧн тӧдӧ матын и ылын:
Найӧс лыйлісны
207-ӧд верст вылын.
Аддзан: лӧз саридз саяс со
Тан
Лыа пытшкӧсысь сувтіс
Шаумян.
Кажӧб кос му пиын грымӧбтіс — 
Шков!
Чеччис нӧшта
25 лов.
Сувтіс
Бус да няйт
Вуштігтырйи
Кызь квайт.
Кодлӧн морӧсас пуля,
Кодлӧн кымӧсас розь.
Шуӧны: оз ӧмӧй ветлыны
Позь — 
Видзӧдлыны
Колӧ,
Азербайджан
Кыдзи олӧ.

.............................................

Тӧлысьсӧ дыняӧс моз
Быгыльтӧ войыс.
Саридзлӧн гыыс
Берегӧ койӧ.
Вот татшӧм жӧ пӧраӧ,
Вӧлі войшӧръя кад,
Найӧс лыйліс
Английскӧй отряд.
Коммунизм — 
Мездлунлы туй индысь пас.
Тӧв нырӧн, бушковӧн
Гызисны уджалысьяс.
Империялӧн помасис
Нэм — 
Крестьянин да
Пролетарий
Паныд сувтісны сылы
Тшем.
Сэні, Россияын,
Дворяналысь тшӧтшкӧртіс борд
Миян стрӧг батьным,
Ленин ёрт.
Асыввылын, татӧні,
Кадыс кор вӧлі гудыр и няйт,
Кызь квайтӧн вӧліны найӧ,
Кызь квайт.
Тӧд вылын быдӧнлӧн
Со
18-ӧд шуштӧм
Во.
Сэки став мувывса буржуй
Тан
Быдласянь топӧдіс
Азербайджан.
Сьӧкыда кучкис.
Вир киссис уна.
Вынным эз судзсьы,
И уси Коммуна.
Вӧлі сэк медся шог
Юӧр
26 йылысь, кодъясӧс
Сюйисны гуӧ.

Нуисны
Найӧс
Из чорыд сім каржа вылӧ,
Красноводск сайӧ.
Кодӧс сабляӧн сӧтісны,
Кодлысь пуля розьӧдіс морӧс.
Ставныс усины виж лыа вылӧ,
Лӧз саридз дорӧ.
Кызь квайтӧн вӧліны найӧ,
Кызь квайт комиссар.
Налысь гуяссӧ лыа оз тырт
Ни гожӧм, ни ар.
Лыйлісны найӧс — 
Некод оз вунӧд,
207-ӧд верст вылын
Налӧн гуныс.

Аддзан: лӧз саридз саяс со
Тан
Лыа пытшкӧсысь сувтіс
Шаумян.
Кажӧб кос му пиын грымӧбтіс — 
Шков!
Чеччис нӧшта 25
Лов — 
Сувтісны вуштігтыр
Бус да няйт.
Кызь квайтӧн вӧліны.
Кызь квайт.

..................................

Талунъя войыс
Югыд со кутшӧм!
Баку кар весьтын
26 вуджӧр.
Тайӧ вуджӧрыс 26
Баку кар вылын.
На понда сьӧлӧмным доймӧ,
На йылысь сьылам.
Оз тӧв шувгы
Тан.
Кылан — сёрнитӧ
Шаумян:
«Джапаридзе,
(Али тайӧ вӧт?)
Видзӧдлы:
Уджалысь войтырыс пӧт.
Нефть — быттьӧ
Мулӧн сьӧд вир.
Карабъяс, карабъяс
Море вылын, кӧн джуджыд йир.
Поезд и караб — 
Стальнӧй и кӧрт.
Став вылас ломзьӧ
Миян кодзувным, кодзув гӧрд».
Джапаридзе воча кыв
Шуӧ:
«Тайӧ бур
Юӧр.
Сідзкӧ, чорыда рабочӧй
Класс
Кутӧ ас киас
Кавказ.
Тӧлысьсӧ дыняӧс моз
Быгыльтӧ войыс.
Саридзлӧн гыыс
Берегӧ койӧ.
Вот татшӧм жӧ пӧраӧ,
Вӧлі кор войшӧръя кад,
Миянӧс лыйліс
Английскӧй отряд».
Коммунизм — 
Мездлунлы туй индысь пас.
Тӧв нырӧн, бушковӧн
Гызисны уджалысьяс.
Империялӧн помасис
Нэм — 
Крестьянин и
Пролетарий
Паныд сувтісны сылы
Тшем.
Сэні, Россияын,
Дворяналысь тшӧтшкӧртіс борд
Миян стрӧг батьным,
Ленин ёрт.
Асыввылын, татӧні,
Кор кадыс вӧлі гудыр и няйт,
Кызь квайтӧн вӧліны найӧ,
Кызь квайт.

Енэжыс лӧзӧдіс, пӧраыс
Сёр нин.
Дона вуджӧръяснымлӧн
Лӧнис сёрни.
Кодлӧн кымӧсас пуля.
Кодлӧн чегӧма ордлы.
Ахч-Куймелань налӧн
Бӧр мунан ордым...
Сьыв, поэт, сьыланкыв,
Сьыв.
Енэжыс — 
Кельыдлӧз тыв...
Саридзыс сьылӧ жӧ, бузгӧ,
Сьылӧ да кайтӧ:
Найӧ вӧліны
Кызь квайтӧн.