ГЫМ ВЕТЛӦ ЫБӦД

Вай босьтчы, сьыланкыв, да вен
Быд лёксӧ миян важ му вылысь,
Мед дзескыд лоӧ тэн нёль стен,
Мед унджык лоӧ тэнӧ кылысь.

Он кокнидика сетчы мен.
Ог век ме тэкӧд овлы лада,
Дай частӧ чусавлан тэ сэн,
Кӧн трачкакывны корӧ кадыс.

А кодлӧн, кодлӧн таын мыж —
Тэ ачыд, сьӧлӧмшӧрӧй, тӧдан.
Мед водзӧ сямӧй оз ло ныж,
Вай ыбъяс вылӧ тэкӧд мӧдам.

Кор вӧчан делӧ — он тӧд шог.
Нянь быдтысь тадзи радлӧ арнас,
Кор збыльмӧ сылӧн ыджыд мог —
Йӧз шудлӧн вылӧ гызьӧ зарни.

Но ӧні тулыс. Асывводз.
Ас туйӧд шонді вывлань мӧдіс,
Мед ыблысь шонтыны быд содз,
Мед сылысь тӧждсӧ быдӧн тӧдім.

И шонді водзын нюмдіс ыб.
И сэтшӧм кыпыд гӧгӧр лоис!
Кӧть трактор шыыс оз на кыв,
Но тувсов уджлӧн праздник воис.

Тэ, муӧй, сьӧд. Но тӧдам ми,
Мый сӧстӧм сьӧлӧмъяса йӧзӧс
Тэ радейтан. Быд турун сі
Тэн, копрасигмоз, аттьӧ вӧзйӧ.

А со и ачыс тан Семён,
Бать нимыс кузя кӧ — Семёныч.
Ог куж ме сылы сетны дон.
Да сюрас ӧмӧй сэтшӧм доныс,

Код восьтас уджач мортлысь мич,
Код петкӧдлас бур мортӧс ставнас?
...Семён Семёныч мунӧ сідз,
Мый аддзан: праздник сылӧн талун.

Еджыд дӧрӧм пасьталӧма
Фуфайка улас.
Бедьтор — киас.
И югъялыштӧ сӧстӧм кӧм.
И асывводзсянь бритчӧм сійӧ.

Тадз мунӧ сиктса гражданин.
А восьлас паськыд, восьлас зумыд.
И, дерт жӧ, содӧ, а оз чин
Сы чужӧм вылын югыд нюмыс.

...Гым! Кӧні? Енэж сӧстӧм дзик.
А ывла кыпыд, ывла кыпыд.
И нимкодясьӧ миян сикт:
Гым талун ветлӧ Ёльдор ыбӧд!

А гымсӧ новлӧдлӧ Семён!
Да, гымсӧ новлӧдлӧ Семёныч!
Кӧрт пуклӧс — трактористлӧн трон,
Эз вӧвлы царлӧн татшӧм троныс!

Да кысь нӧ? Царыс татшӧмтор
Эз паныдавлы весиг вӧтнас.
А трактористлы нем оз сор:
Сьӧд гыыс трактор бӧрся вӧтчӧ.

Но гы оз ветлы, гы оз вӧр:
Эз тӧвныр сійӧс тані чужты.
Плуг, быттьӧ ортсыӧ оз тӧр,
Быд лемехӧн му пытшті нюжтӧ.

Кӧзяин тӧдӧ ассьыс му:
Тан тыдовтчӧ бур сямыс сылӧн.
Сы йылысь, мый тан быдмас сю,
Збой чикыш аслысногыс сьылӧ.

Сьӧд гысӧ кырӧ зарни луч —
Тадз шонді кӧсйӧ отсӧг сетны
Семён Семёнычлы. Оз мудз
И отсавны став вӧльнӧй светлы.

Эм ыджыд кыпыдлунлӧн дой,
Код, овлӧ, вазьӧдлывлӧ синтӧ.
Эм уна ми пӧвстын герой,
Геройӧн найӧс кӧть ог нимтӧй.

Ак, кужӧ миян прӧстӧй морт
И му выв мичмӧдны ас уджӧн,
И сьыланкывлы сетны борд,
Кор колӧ — гажӧдчыны кужӧ.

И шутка кыв, и сёрни сям —
Оз мырдӧн артмы ставыс тайӧ.
Кор шойччӧ сійӧ — рамсьыс-рам.
А уджын — пытшкӧс жарыс кайӧ.

Век, уджйӧза ме лоа век
Странаӧй водзын, сиктӧй водзын,
Семён Семёныч водзын. Эк!
Оз чукты мортлы шудыс соддзӧн,

А сӧмын войтӧн. Но и мед!
Ме ассьым вежӧктӧмӧс вена.
Оз кокньыдика вермӧм шед
И ыбсӧ гӧрысьлы, и меным.

Кор честнӧй уджын кисьтан пӧсь,
Сэк тӧдлан вермӧмъяслысь радлун.
Ас муын некод абу гӧсть,
Но оз быд морт кыв ӧдсӧ кадлысь.

А кор Семёныч гӧрӧ тан,
Кор ыбсӧ чукрӧдлӧ, сэк сылӧн
Дзик быттьӧ шыльыдмылӧ бан,
Быд чукыр вошлӧ чужӧм вылысь.

Гӧр, дона ёртӧй! Ыблӧн гуг
Тшӧтш медым видлас шонді кӧрсӧ.
Ме тэнсьыд праздник ог мӧй юк?
Эм менам аслам «ыб» да «плуг» —
Кӧть сьӧкыда, но век жӧ гӧрсьӧ.

И надзӧн чужӧ сьыланкыв,
Кӧть телезнаыс кольлӧ сэні.
А олӧм паськӧдӧ век сыв,
Став мытшӧдъяссӧ корӧ венны.

Ми шудаӧсь, мый миян нэм
И стрӧг, и чож, а могным ыджыд.
Ми шудаӧсь, мый миян эм
Народ — и ышӧдысь, и мыджӧд.

Ми, йӧз, дерт, мудзлам. Сӧмын кад
Оз мытшасьлы, век водзӧ мунӧ.
Ю вомӧн вуджысь шонді рад,
Мый уджӧн озыр тувсов луныс,

Мый вӧр-ва бара эз ло рам,
Мый бурыс мортлӧн уджын лыбӧ.
И ыбын тӧдчӧ мортлӧн сям:
Гым ветлӧ ыбӧд, ветлӧ ыбӧд.