ЛЭБОВТӦНЫ ВОЯС

Оз нин вочасьны олӧма вояс
Раскӧ саймовтчӧм дозмӧръяс моз.
Шонді быд лун выль югӧръяс кояс,
Сӧмын ылысмӧм томлунӧй — оз.

Том дыр гажлуныс кылаліс ылӧ,
Кыдз тай зэр бӧрын ӧддзылӧм шор.
Тулыс томъяскӧд шпыннялӧ, кылӧ,
Но, а ме дінӧ косавны сёр.

Сӧмын весь татшӧм думъяснас ола.
Эн вай повзьӧдчы сэн, пемыд вой.
Кӧть и жугыльнас корсюрӧ лола,
Да ӧд ловнам ме зэв на и збой.

Писькӧслунӧй эз кеж на ас туйысь,
Быттьӧ вӧлись на гӧрддзасьӧ нэм.
Уна волас на меным тшӧтш тулыс,
Шонді нюмъялас унаысь мем.