* * *

Дзор коз пемдӧм ю дорын дзуртӧ,
Скӧр вой тӧлыс коялӧ лым.
А енэжын — чатӧртлы юртӧ —
Сьӧд кымӧрсӧ шызьӧдӧ дуртӧг
Дзик выль реактивнӧйлӧн гым.

Ас гызьӧмнас шыасьӧ юыс,
Мый гожӧмыс пӧсьлунсӧ нуис,
Мый еджыдӧн кышасьӧ муыс,
Но ывлаыс коляс век том.
Оз, ывла оз меліась сӧмын,
А кор колӧ вежласьӧ рӧмӧн
Да вынсьӧдӧ ас вежласьӧмӧн,
Мый олӧмлы оз волы пом.

Оз олӧмыс ланьтлы, оз ӧвсьыв,
Кӧть асыв, кӧть дзурс пемыд вой.
Ок, олӧмас мыйыс оз вӧвсьыв,
Кӧть чужӧмӧ шлячаыс сьӧвзяс,
Ог пӧрӧй на быд сикас тӧвсьыс,
А кылам и радлун, и дой.

Коз кияссӧ шевгӧдіс сідзи,
Мый, аддзан, и кок увсӧ видзӧ
Да-й куслытӧм олӧмлысь вуж,
А сьӧлӧмам — шогыс и гажыс
И выльыскӧд сывйыштчӧм важыс,
Ӧд свет вылас олан дыр стажысь
Ме киритны нинӧм ог куж.
А тӧв ныр кӧ ме дінӧ волӧ,
Кыдз быттьӧ важ ёртъяссянь чолӧм,
То сідзи и вежӧртны колӧ,
Мый му вылас эм сӧмын олӧм,
А сы кындзи мый нӧшта эм?
А олӧмыс ышӧдӧ менӧ,
А олӧмыс кыпӧдӧ тэнӧ,
А сыкӧд ми мыйсӧ ог венӧ,
Мед нимӧдны ас олан нэм!