ШОГ

Шоглуныс, донаяс, гӧраяс, тырыс.
Мед нин кӧть пӧимӧдз сотчинныд ті,
Нартитысь чукӧр мед ті улын бырис,
Оз жӧ ӧд пытшканыс ломзьывлы би.

Вӧрзяс мӧй на лыдысь кодлӧнкӧ сьӧлӧм!
Найӧс тай йӧзыслӧн дойыс оз дойд.
Налы йӧз шоглуныс мӧрччис мед! Чӧвлӧй.
Кодлӧнкӧ гывдас мӧй пӧсь синва войт.

Чепъясӧн дорисны киӧд и кокӧд.
Пежӧсьтны дасьӧсь и медъюгыд шӧр.
Чой-воклӧн гуясысь вештісны бокӧ.
Челядьлы, верстьӧлы дасьтӧны ньӧр…

Разалім-пазалім ас муысь ылӧ, —
Звер нӧшта стадаӧс чиршӧдлӧ сідз.
Мыйла нӧ тэнӧ ми, пастук, ог кылӧ?
Ӧтвывтан кывтӧ эн аслыд куш видз.

Топӧдӧ вӧрӧг, мед миянӧс чегны.
Миянысь, кувсям кӧть, слава оз мун.
Йӧзлысь став вынйӧрсӧ лэптім мӧй? Эг на.
Усьтӧдзным выль шыӧн юковтам лун.