ВЫЛЬ ЫДЖЫД ШУДӦН

Выль во. Выль тӧжд. Выль сьыланкыв.
Выль думным збыльмӧ.
И мый он аддзы, мый он кыв —
Дзик быдтор выльмӧ.

И весиг лымйыс усяс выль,
Кыдз бара колӧ.
Выль кыськӧ локтӧ-содӧ вын,
Мед сӧвмӧ олӧм.

Выль кыа петас, бара дон,
Ас юяс восьтӧ,
Выль биӧн ломзяс енэж дор
И тан, и эстӧн.
Важ календарлӧн бӧръя лист,
Дерт, выльӧн вежсяс,
Но важ во йылысь кыпыд висьт,
Код шуӧ, эжсяс?

Оз, сылы паныдсӧ оз ков
И сёрни панны:
Сэн пессьӧ миян вежӧр-лов,
Сэн олӧм банным.
Выль шудсӧ-пудсӧ восьтысь во,
Пыр миян лолӧ
Да ачыд водзмӧстчысьнас ло,
Мед лёкыс полӧ.