ВЕК СИН ВОДЗЫН, ОЗ ВУН…

Сэкся лунсӧ
ылыстӧны вояс...
Мед жӧ бӧръя лов шыӧдз
оз вун
Да век
сьӧлӧм лэптысь югӧр
кояс
Миян ыджыд лун —
Победа лун!

Син водзам тэ
сэкся сувт,
Печора, —
Лӧзӧдӧм,
но век на йиа от.
Сэкся моз жӧ, тӧлӧй,
шутьляв гора,
Морӧсӧс тэ,
сэкся радлун, сот!

Тэнӧ, сэкся кыпыдлун,
он конды.
Сэкся енэж лӧзӧй,
тэ он быр.
Медводдзаысь
войнабӧрся шонді
Югзьӧдіс сэк миянӧс
и шонтіс
Мӧдлапӧвсянь
нимкодясигтыр.

Сійӧ аснас
лёк вылӧ оз веськӧд,
Медбур думъяс-кӧсйӧмъяс
оз кыр.
Челядь чукӧр
гырысьяс моз эским:
Ӧні сӧмын мир
тан лоас пыр!

Эстӧн, ягъяс саяс,
рытыввылас
Войнаыслысь кусӧдісны би,
Медым татӧн,
югыд нӧрыс йылас
Нюмъялім да радлім
челядь ми.

Сэк, кор перйӧм мичсӧ
ловнад кылан,
Кыдз нӧ содтӧд
эскыны он кут,
Мый оз сыв,
мый некытчӧ оз кылав
Лым моз, йи моз
миян ӧтув шуд?

Збыль мед сійӧ ӧзйис,
а эз чусав,
Миянлы сэк сетіс
содтӧд вын
Быд пу чалльӧн,
дзик быд ёльӧн
муса,
Быд туй вожӧн дона
ывла выв.

Сы вӧсна и татӧн,
нӧрыс йылын
Быдмысь войтыр
ышлолалім сідз...
Челядь сямӧн-вежӧрӧн
ми кылім:
Быдторсӧ,
мый матын
и мый ылын,
Дзик став бурсӧ,
мый эм Му шар вылын,
Кыдз он пукты пыдди,
кыдз он видз!

Найӧ, кодъяс мунлісны тась,
найӧ
Дорйисны ӧд врагысь
Сӧвет му,
Медым тайӧ тулыссӧ
эз сайӧд,
Пежлунсӧ мед аскӧдыс
эз вайӧд,
Зывӧклуннас
мед эз сюйсьы Майӧ
Вӧрӧгъяслӧн
йӧзсӧ личкысь ру.

Сэкся серпас
ылыстӧны вояс,
Но со век тай
син водзам, оз мун...
Му выв йӧзлы
югӧръястӧ кояв,
Яръюгыд да том
Победа лун.