АСНАД ЮГЗЬӦДАН ОЛӦМ

Тэ, Октябрь,
Аснад югзьӧдан олӧм,
Тэӧн сьӧлӧмӧй
Вына да яр.
Дӧвзьӧд флагъястӧ
Сідзи, кыдз колӧ,
Медым кывбурам
Лача эз ям.

Медым увтыртӧм йӧзыслы
Этшнас
Сійӧ отсаліс
Нуӧдны кось.
Тэнад вывтассянь,
Уна кӧть этша,
Быдтор донъяла,
Мый кӧть ог босьт.

Шудыс абу на тай
Помтӧм-дортӧм,
Оз куш нимкодьлун
Кӧвъясь и мем,
Ыджыд мирас —
И тані кӧ, гортын,
Сьӧлӧм дойданыс
Ӧнӧдз на эм.

Но тэ быдторйын
Ышӧдан менӧ,
И ог нюкыртчы
Ловнам ме, ог.
Сыкӧд, зывӧк мый,
Пыртӧдан венӧ —
Тэнсьыд могмӧда
Колана мог.