МИРЛӦН БЫД ВЕРМӦМӦН ОВ!

Мед керкаын чӧв-лӧнь,
но сьӧлӧмӧй сьылӧмӧн сьылӧ,
Мед ывлаас пемыд,
но мем югыд музыка кылӧ,
И кыпыдлун ачымӧс
йӧз пӧвстӧ нӧбӧдӧ ылӧ, —
Ӧд буретш выль сьыланӧй
йӧзас и вынсялӧ пыр,
Йӧз гажӧн и дойӧн
кор кыпӧдчӧ
му весьтас вылӧ.
А шуд вӧсна майшасьӧм-тӧждысьӧм
лолам оз быр.

Печора и Волга,
Нева и Амур,
Днепр и Лена, —
Да кутшӧм кӧть ю дорӧ
думӧй оз ну, —
Дзик быдлаын гыалӧ томлун,
а сыкӧд ми венам
Быд мытшӧд.
И ыдждӧдлам ас чужан му.
Сӧветъяслӧн Рӧдина!
Югыдсӧ вӧчысь да пестысь!
Мый тэ кодь жӧ мӧд сэсся
донаыс олӧмам эм?
Ме выльыдлысь петасъяс
аддза и татысь, и эстысь.
И сьӧлӧмӧй донавлӧ
меным тшӧтш вичмӧдӧм
честьысь.
И, могъяснас тыр,
водзӧ нюжалӧ-грымӧдӧ нэм.

Октябрь!
Менам сьыланлӧн лэбув и подув!
Тэ югзьӧдан пытшкӧсӧс,
тэысь и нимкодьлун содӧ.
«Авроралӧн» горалӧ залпыс на, кодӧс
Оз саймовтны вояс —
пыр юралӧ зэв колан гор.
И садьмӧ выль эрдъяслӧн
пасьтаыс-отыс:
Дас сизимӧд воыскӧд
йитӧдыс-визьыс оз ор.

Октябрь!
Нэмӧс вуджиг
мый кывлі,
мый аддзи,
мый тӧдлі,
Мый казьӧді-тӧдчӧді
олӧмлӧн визувсьыс мӧдлы,
Мый пасйи,
мый нимӧді-ошки ме
уджалысь рӧдлы,
Мый донаыс эм —
сійӧ асшӧрысь некор оз мун.
И войсӧ тай бӧрыньтӧ-вештӧ
пыр лӧсялан ӧдӧн
Сэт, енэжтас горулӧд
миянӧ локтысь
выль лун.

Странанымлӧн асылыс
ыльӧбтӧ, быттьӧкӧ ытва.
И вомлӧс, и кузяла
исковтан туйыс зэв кузь.
И вежӧрнам шолсйӧдла-восьлала
сэті ме, кыт на
Эг мунлывлы —
сьӧлӧмнам шогӧ ог усь.

Октябрь!
Демонстрантъяслысь кылан нин
праздникса горсӧ.
Со долыдмӧм тӧвруыс
флагъяснад шпорӧдчӧ-ворсӧ,
И енэжас шондіыс
содтӧд тшӧтш
флагъяссьыд гӧрд.
Тэ аснад тай, праздникным,
вынсьӧдан быдлунъяторсӧ,
И радлунӧй аслам
оз тӧд весиг помсӧ
ни дорсӧ,
И ӧтвывъя радлун, Октябрь,
енэж улас оз тӧр.

Октябрь!
Ме и шуда,
Мый бур йӧзкӧд ме ӧти стройын,
Мый йӧзкостса дружбаыс
ышӧдӧ-кыпӧдӧ лов,
Мый вит бордъя кодзув
тшӧтш мукӧдлы
лачасӧ койӧ.
Быд водзмӧстчан воськолӧн,
мирлӧн быд вермӧмӧн ов!