СЫКТЫВКАРЫН
И. А. КУРАТОВЛЫ ПАМЯТНИК ДОРЫН

Чӧв ола. Но тэн и аслым кывмӧн
Думнам, ыджыд ёртӧй, шуа кыв-мӧд.

Быттьӧ асьтӧ кывзан веськыд кинад:
Пуктӧмыд пӧсь китӧ сьӧлӧм дінад.

Сьӧлӧм пиад — кольӧм шогъяс, дойяс,
Бур йӧз вылын ыджыдалысь войяс.

Ӧд поэт оз вермы шуда лоны,
Оз кӧ ставлы ӧтмоз вичмы шоныд.

Сы вӧсна, мый веськодьлун поэтлы
Енмыс сылӧн чужлӧмсянь оз сетлы.

Кадлӧн агас кымӧс шӧртӧ кырӧ,
Чужӧм серыд ыджыд тӧждӧн тырӧм:

Вой шӧр войӧ да и лун шӧр лунӧ
Шудсӧ дзескӧдысьыс зэв на уна.

Но мед помӧдз оз сёй тэнӧ дзугыль:
Водзӧ перъям нӧшта унджык югыд!

Лолыд, сьӧлӧм шыыд, коми горыд
Юргӧ век ас йӧзкӧд, таладорын.

Вояс ӧдысь тэнад сьылан ярмӧ...
Мышкад ӧтка пу — и ставнас парма!

Шуйга кинад мыджсин парма пуӧ —
Тэнсьыд Муза кутысь чужан муӧ.