ПИӦС КОЛЛЬӦДІС МАМ

— Но тырмас, мамукӧй,
Эн сэсся бӧрд.
Вот вӧтлам вӧрӧгӧс
Да-й локта бӧр.

И пӧся окыштіс
Бур мамсӧ зон.
Мам вештіс син дорсьыс
Выль чышъян пом:

— Тэ прӧстит, сӧкӧлӧй,
Ме прӧстӧ сідз...
Видз сӧмын шуднымӧс,
Кыдз колӧ видз.

А батьыс пиыслысь
Дыр эз лэдз ки.
«Но, мун!» — бать синъясысь
Тадз лыддис пи.

Машина тутӧстіс
Трубач моз дзик.
Прӧщайтлӧй, донаяс!
Прӧщайтлы, сикт!

Руд буснас колльӧдіс
Зэв тӧдса тракт.
А орччӧн гӧгыльтчис
Гӧрд шонді.
Ак,

Сё шыа ягъясӧй!
Ой, ӧтка кӧк!
Войналӧн грымгӧмыс,
Он тӧдӧй, кӧн?

А лун тӧв шутьляліс:
«Эн шогсьӧй, эн»...
Кӧк кӧкис зонмыслы
Кузь нэм, кузь нэм.

Ар помын мӧдӧдчис
Пи бӧрся бать.
Мам бара сулаліс,
Кыдз дзугыль бадь.

А верӧс бурӧдіс:
— Вай эн нин бӧрд.
Вот вӧтлам вӧрӧгӧс,
Да-й пикӧд — бӧр.

Но гӧтыр правдайтчис:
— Ме прӧстӧ, сідз... .
Видз пикӧд шуднымӧс,
Кыдз колӧ видз.

Кад йитліс вочасӧн
Лун бӧрся лун.
Мам частӧ воштывліс
Войшӧрся ун.

А регыд тӧдім тшӧтш
Суседъяс, ми,
Мый ӧти частьынӧсь
И бать, и пи,

Мый служба нуӧны,
Кыдз тшӧктӧ кад.
Мам татшӧм юӧрысь
Ок, кутшӧм рад!

Удж вывсьыс воас да,
Кӧть ӧшӧд сой.
А лыддяс письмӧяс,
И чинӧ дой:

Мудз пышйӧ кытчӧкӧ,
Бӧр локтӧ вын.
Но мам лёк юӧрсьыс
Эз бара мын!

Со кутшӧм вӧлӧмыд
Тэ, курыд шог!
Мам дінас пиукыс
Оз сэсся лок.

Атака бӧрвылын,
Чӧв пуксьӧм кор,
Бать писӧ дзебӧма
Сэн югдандор.

Пи узьӧ крепыда.
Мед шойччас, мед.
Выль бойӧ кык пыдди
Бать оз мӧй пет?

Пӧсь синва сотыштіс
Салдатлысь бан.
Бать дорис вермӧмсӧ
И сэн, и тан.

Берлин сы кок улӧ
Кор усис, сэк
Ми аддзим: мирыслы
Век овны, век.

Ӧд татшӧм шуд кузя —
А тайӧ шуд —
Москваын грымӧбтіс
Салют, салют!

Россия радысла
Эз ӧмӧй бӧрд?
— Но, гӧтыр, верӧсыд
Со воис бӧр.

Нёль во чӧж тувччалі,
Мед лоны тан.
Вот сӧмын...
Шогалӧ
Оз ӧти мам.

— А сійӧ, донаным,
Век лоӧ том, —
Мам вештіс син дорсьыс
Важ чышъян пом,

А сэсся малыштіс
Зэв ньӧжйӧ сідз
Медальсӧ верӧслысь,
Кыдз шудлысь сі.

Дзик некор кадыслы
Бӧр туй оз ло.
Кад йитлӧ вочасӧн
Во бӧрся во.

Кор льӧм пу дзордзалӧ,
Сэк кӧкӧ кӧк,
Но мамлӧн сы вылӧ
Оз петлы лӧг.

Мед кӧкӧ, вермас-ӧ
Сэн лоны мыж?
Мувывса лёкыскӧд
Эз помась тыш.

Мам частӧ вӧтавлӧ,
Кыдз быттьӧ пи
Век ловъя, косясьӧ,
Оз личӧд ки.

Пи быттьӧ шуалӧ:
— Эн шогсьӧй, эн.
Фашизмлысь колясъяс
Ме эг на вен.

Но вена, вермала,
Ӧд ме — салдат.
И мен тшӧтш, усьӧмлы,
Враг оз ло рад.

Ті асьныд тӧданныд
Выль шудлысь дон.
Меч босьтны вӧрӧглы
Он сетӧй, он.

Мир, кодӧс перйылім,
Сідз видзад ті,
Мед некор Му вылын
Эз ыпъяв би,

Мед водзӧ олінныд,
Эн тӧдӧй шог,
Мед водзӧ збыльмӧдід
Ті асшӧр мог,

Мед вӧрӧг тіянӧ
Пеж ныр эз сюй,
Мед космонавтъяслысь
Эз пемдӧд туй…

Мам восьтас синъяссӧ —
И вошӧ ун.
Сикт весьтын кыпӧдчӧ
Выль мирнӧй лун.

Кӧк кӧкӧ ю сайын,
Збой шӧйтӧ тӧв.
И «газик» вӧтлӧ нин
Кыр йылысь чӧв.