* * *

Тулыс дзирдалӧ,
югъялӧ, ворсӧ.
Тулыс — вильшасьысь,
кыпыд да яр.
Сыӧн пальӧдӧм
тӧлыслысь горсӧ
Кывзӧ радпырысь
гулыдмӧм яг.
Ышмӧм шондіыс
кушӧдіс лудсӧ,
Вижъюр мыччӧдны
мед эз ло сёр.
Быттьӧ вӧтӧдӧ
тӧрытъя лунсӧ —
Юлань котӧртны
уськӧдчис шор.
Енэж лӧзалӧ,
быттьӧкӧ саридз —
Ловтӧ кыпӧдысь,
пыдӧстӧм, сӧдз.
Татшӧм енэжыс
лӧсталас арӧдз,
Сӧмын ачым
мед весьсӧ эг жӧдз.
Асьсӧ мыччӧдіс
шорсайса ыбыс:
Вот-вот кыптас сэн
гы бӧрся гы!
И дзик мӧд пӧлӧс
тӧждысьӧм лыбис,
Быттьӧ кылі нин
тракторлысь шы.
И, кӧть югыдлун
ыльгӧ мен лолӧ,
И, кӧть пытшкӧсам —
бордйӧдысь ру, —
Кутшӧм гожӧмыс,
майшася, лоӧ?
Мый нин быдтас,
мый вичмӧдас му?