ВИДЗА ОЛАН, ДОНА КАР!

Кадкӧд вензьӧмсӧ он пан —
Вояс лэбовтӧны.
Ог нин медводдзаысь тан
Петкӧдчӧй ми ӧні.

Кытчӧ колӧ, тэрыб кад
Татчӧ волӧм пасъяс.
«Видза олан,
Сыктывкар!» —
Шуам изьватасъяс.

Некод лишнӧйсӧ оз шу,
Огӧ ышмӧй ньӧти.
Ӧти миян чужан му,
Изьваыс тшӧтш ӧти.

Кытчӧ колӧ, тэрыб кад
Татчӧ волӧм пасъяс.
«Видза олан, мича кар!» —
Шуам изьватасъяс.

Ӧтвыв усис сэтшӧм пуд —
Радлун кайӧ чойӧд,
Ыджыд гаж и ыджыд шуд
Бокті мед оз войӧд.

Кытчӧ колӧ, тэрыб кад
Татчӧ волӧм пасъяс.
«Видза олан, муса кар!» —
Шуам изьватасъяс.

А кор венам сьӧкыдӧс —
Некод сэк оз донъясь.
Изьваысь жӧ петлӧм йӧз
Ӧнъя чемпионъяс.

Кытчӧ колӧ, тэрыб кад
Татчӧ волӧм пасъяс.
«Видза олан, дона кар!» —
Шуам изьватасъяс.