* * *

То рам. То лӧгӧн тыра.
То лӧнь. То жвучкӧ тӧв.
А воас кад — и быра
Да кыз му улӧ пыра,
Кыдз быттьӧ-й эг и вӧв.

Но, кытчӧдз ола-выла,
Ог сӧмын жӧдз да дур,
А сьӧлӧмӧн жӧ кыла
Да кыдзи кужа сьыла,
Мый — омӧль, а мый — бур…

Бур войтырыс мен муса,
Мен дона чужан му.
И лолӧс, сэк, кор кусӧ,
Оз сідз, кыдз асъя русӧ,
Ас йӧз костысь оз ну.

Мый олан дырнам доля,
Оз ставыс югзьы. Но
Кӧть, гашкӧ, строчка коляс
Да йӧзлы радлун кояс,
Кор ачым ог нин ло.

Кӧть воыс тӧвзяс кымын,
Но налы, код мен ас,
Мед водзӧ лоӧ кывмӧн
Быд тӧв нырын, быд гымын
И менам, изьва бас.