ДЗИРДАВ, ШОНДІ!

Ог сы вӧсна, мый пӧрысьмыны понді,
А сы вӧсна, мый муса лунысь-лун
Мем олӧмыс, ме шуа:
«Дзирдав, шонді,
Да некор менам енэжысь эн мун!»

Эг веськавлы ас нэмӧн война вылӧ,
И водзджыкся на лёксӧ ме эг тӧд,
Но кадлысь этшсӧ мукӧд моз жӧ кыла,
И ме пыдди оз донъяв сійӧс мӧд.

О, кыдз нӧ эськӧ сьӧлӧмӧс оз ёнтышт,
Кор кӧнкӧ мӧдлӧн ёнтышттӧг оз ов!
Мем колӧ шонді — югдӧдысь и шонтысь,
Мед сылы воча кыптіс менам лов,

Мед бура аддзи — коді мелань банӧн,
А коді мышкӧн — бура аддзи мед!
Мед ас му вылын,
Ас йӧз костын тані
И лёклуныслы тывъяс ме эг шед.