МЕМ ВОРСІС ГИТАРАӦН ЁРТ
М. Ф. Марьяшинлы      

Интаын, гостиница номерын, рытнас,
Мед, тыдалӧ, гажлунӧй некор эз быр,
Мем ворсін гитараӧн, Миша Марьяшин,
Ас тангонад кытчӧкӧ чуксалігтыр.
Гостиница вевт улын — кыкнанным гӧстьяс.
Но ворсысь тэ татчӧс. Кӧть ворсаныс важ,
Полярнӧй кытш горулын олысьлы, тэныд
Зэв, тӧдӧмысь, нимкодь, мый козьналан гаж.
Зэв, буракӧ, нимкодь, мый ӧттшӧтш и сьылан —
Быд нотаӧ быттьӧкӧ кывзысигмоз,
Веж кудриа довкйӧдлӧ нёровтӧм юрыд,
Лӧз синъясыд — югыдсӧ чужтысь кык поз.
Пӧсь музыка шевкнитчис турӧблы воча.
Эз мыйӧнкӧ ковтӧмӧн сьыланыс кый, —
Шахтёръяслӧн кар йылысь висьтасис сійӧ —
Мый му вылас вӧчсьӧ и му пытшкас мый.
Тэд аттьӧ, роч ёртӧй, мый пальӧдін лолӧс,
Мый тэкӧд ми — войвывса кык гражданин...
Сьӧд из шом тан, еджыдӧн шебрасьӧм муас,
И уна бур йӧзлӧн нин тан чужанін.
Кор лаваӧд ылькмунӧ надзмӧдӧм тӧлыс,
Сэк му вылын турӧбыс чепсасьӧ, скӧр.
А сьӧлӧмӧй ворсіс на быттьӧ гитара,
Интаысь кор гортланьӧ мӧдӧдчи бӧр.