КОМИ-ПЕРМЯК ЧОЙ-ВОКЛЫ

Кыдз кӧть турӧбыс эз гарт
Лымсӧ — асьсӧ дзугис:
Тані март и сэні март —
Тулыс восьтысь здукыс.

Ӧтвыв гажнас сэн и тан
Водзӧ, чой-вок, олам.
Ӧтвыв гажыс, шондібан,
Ӧта-мӧдлы колан.

Сытӧг ыджыдтор он пу,
Сьӧлӧмтӧ он ӧзйӧд.
Сӧвмӧ ыджыд чужан му,
Ыджыд шуд и вӧзйӧ.

Менам Изьва да Кува —
Ловъя ваа чойяс —
Ӧтмоз кылӧдӧны ва,
Бурдӧдӧны дойяс.

Тан и сэн, кыдз вильыш ёрт,
Ӧтмоз ветлӧ тӧлыс.
Миян костын абу сёрд,
Коді лёк ног сӧліс.

Ті да ми, да ми да ті —
Ӧти дружнӧй котыр.
И ме, парманымлӧн пи,
Пукта улӧдз копыр.

Тіян зарни юбилей —
Праздник тшӧтш и миян.
Ӧтвыв туй визь югзьӧ мед
Ловтӧ лэптысь биӧн.

Миян ӧтув сьыланкыв
Быдлаын мед кылӧ,
Вай жӧ лэптам дружба кыв
Нӧшта вылӧ, вылӧ!