АРСЯ РАСЫН
М. П. Безносовлы          

Расын мем исковтӧм гожӧмӧн ӧвтӧ,
Али нӧ гожӧмыс эз на и ор?
Кок улам быттьӧкӧ зарниа вӧвдӧм —
Сярвидзӧ гылалӧм кор.

Тӧв нырыс ытшкӧ — и тӧв нырыс куртӧ,
Ӧтарӧ-мӧдарӧ быгльӧдлігтыр.
Гажъянӧй-расӧй, да ёна жӧ бур тэ,
Он ӧд тэ сьӧлӧмӧс кыр.

Гожӧмбыд арыслы воча тэ катан;
Коръясьлан, быттьӧ тыр бордъясьлан,
тшем,
Шонділы арнас век личыдджык татӧн,
Личыдджык татӧн и мем.

Арлыдным содӧ — и тэнад, и менам,
Ӧтарӧ каттьысьӧ кадыслӧн сі.
Код тӧдас, кутшӧм на тӧв ныръяс венам!
Огӧ на згинитӧй ми.

Олӧмыс миянӧс оз на жӧ пӧръяв,
Век на тай кажитчӧ — помыс оз ло.
Мед абу медводдза, мед абу бӧръя, —
Тавося мӧд ар оз во.

Этайӧ арнас и нимкодясь мекӧд,
Кыдз пуа, пипуа, ловпуа рас.
Ӧтнам ме талун тан, ме кындзи некод.
Тыдала, гашкӧ, мый ас?