ПЫРА ВӦРӦ...

Пыра вӧрӧ, медым петны
Тырӧн бӧр.
Мыйкӧ сяммас жӧ ӧд сетны
Арся вӧр.
Мыйкӧ быдтіс жӧ ӧд сійӧ
Гожӧмбыд.
Гортӧ оз жӧ тыртӧм киӧн
Колльӧд рыт.
Вӧрыс — сӧстӧм лола ёртыс —
Сэтшӧм чӧв.
Тан, сы ордын, кӧн веж ордым,
Эг на-й вӧв.
Меӧдз зато йӧзыс таті
Мунліс — тшем!
Кывтіс-катіс муті-ваті
Кымын нэм!
Кымын лыбис, кымын пӧрис
Вӧрас пу!
Ассьыс гусяторсӧ вӧрыс
Сідз оз шу.
Асшӧр гажӧс сьӧлӧм вылам
Кута кор,
Мунӧм нэмъяслысь сэк кыла
Йӧла гор.
Пысалӧма сэкся горсӧ
Коз пу ем.
Али пӧльлӧн пӧльлы горзӧ 
Миян нэм?
Ставыс важмӧ, ставыс бырӧ —
И оз ло.
Асшӧр шыӧн вӧрыс тырӧ
Век тай, со.
Лэпта, сылысь отсӧ вуджиг,
Ассьым дон:
Ме тшӧтш ыджыд, ме тшӧтш
джуджыд,
Ме тшӧтш ён.
Ставсьыс дзебас вӧрыс тайӧ —
Нем ог пов.
Сӧмын олӧмсьыс оз сайӧд —
Оз и ков.