ЩЕЛЛЯ

Кыпыд щелляыс кымӧрсӧ пыкӧ,
Сійӧн лысваыс сэтысь оз быр.
Дзормӧм коз пуыс, быттьӧ ён пика,
Татчӧс енэжсӧ писькӧдлӧ пыр.

Шонтӧ щеллялысь топалӧм морӧс
Асъя шонді, кор асьсӧ оз дзеб.
И Печораса тӧв рытладорыс
Татчӧ лэбовтӧ, шойччыштны мед.

Парма радейтысь ёрт татчӧсінӧ
Коркӧ воліс — и косны эз кут.
Керка лэптӧма лӧз щелля дінӧ,
Медым гӧрддзавны татӧн выль шуд.

Ӧткӧн лӧсьӧдліс тан олӧм-вылӧм,
Мед и миртуйса руыс эз письт,
Но Печораса парматі ылӧ
Катша паськӧдіс сы йылысь висьт.

Ӧтчыд щелляӧ, крещенньӧ дырйи,
Сэк, кор кӧдзыдыс нӧшта нин ён,
Кыті шыбӧльӧсь, сэт дзуртігтырйи
Вӧла-доддяяс воисны, зон.

Кадыс чӧв-лӧньсӧ пузовтіс-нуис,
Пемыд пельӧслысь югзьӧдіс бан —
Тырыс керка да пывсян, да муяс,
Да и гуяс нин лоисны тан.

Кымын тулыс и тат швачкакыліс,
Эз жӧ дурлытӧг ытваыс ов...
Талун кайны кӧ важ щелля йылас,
Збыльысь нимкодьла кынмылас лов.

Шуйга берег — веж пармаӧ сунӧм,
Веськыд берег — яр биясӧн тыр.
А на костын Печораным-юным
Ёкыш кельӧбъяс видзӧ на пыр.