ЮКМӦССтрубйыс нитшкӧн кӧть туӧ, Васӧ лэптаныс эм. Сідз-тадз сюйлӧмны муӧ Струбсӧ — кузь тай со нэм. Пыдӧ, рӧмыдас бара Юрнам пыра — ог усь: Сэні тіпкӧ на яра Важъя олӧмнас Русь. Гашкӧ, тайӧ оз ваыс Бриньгы пемыдас сідз, А кольчуга-броняӧс Уклад сабля оз видз? Али би рӧма вӧвъяс, Вирсьыс чепсасигтыр, Мед монгол нарт эз кӧвъяв, Водзӧ тӧвзьӧны пыр? Шыыс паськалӧ-киссьӧ, И со, аддза, оз лэдз Роч крестьянин ас кисьыс То пу гӧр, то и меч. Кыдз кӧть кадыс эз ӧддзы, Вешта быд пӧлӧс шог Да, мудз тӧдтӧг, ог ӧтчыд Юкмӧс дорас на лок, Медым, пуксяс кор чӧв-лӧнь, Пессис-кыліс — кув-ков — То ли Му шарлӧн сьӧлӧм, То ли аслам пӧсь лов.
