ФОТОГРАФИЯ

А луныс вӧлі пӧсь,
Збыль гожся вӧлі луныс.
И пуяслы сэк
Васӧдлун эз шед.
Кузь верстъяс ковмис
Мамлы менӧ нуны,
Районнӧй сиктын
Снимайтчыны мед.

Быть сэсся довгы,
Кӧть и доза ылӧ:
Бать менам гижис,
Корис пырысь-пыр,
Мед карточкаӧс
Мӧдӧдісны сылы,
И мамӧ менӧ
Нуис-кыскис дыр.

Фотографыс эз юась
Ковтӧг нинӧм,
Мый вӧлі колӧ —
Вӧчис регыд зэв.
Сьӧд синма
Дзоля мортлысь снимок
Фронт вылӧ батьлы
Мӧдӧдісны сэк.

А батьӧ би пыр
Война туйсӧ ордйис,
Ён косьын кытчӧдз
Пуляысь эз пӧр...
И ловйӧн кольӧм
Сылӧн дона ёртъяс
Тшӧтш ыстісны
И карточкаӧс бӧр.

Эм аслам ӧні
Менӧ батьӧн шуысь,
Но сэксяторйыс
Паметьысь оз быр.
И ӧнӧдз видза,
Быттьӧ дойдлӧм шудӧс,
Бать вирӧн пасйӧм
Карточкаӧс пыр.

И мыйсӧ кӧть ог тӧдлы,
Нэмӧс оліг,
Оз вун
Да-й оз позь вунӧднысӧ мен,
Мый тшӧтш и меӧ
Веськаліс осколок —
Пӧсь кӧрт тор,
Коді батьӧс виис сэн.