АРСЯ ПАРМА

Сэтшӧм лӧнь дзормӧм пармаын, вичкоын быттьӧ,
Кузь да сьӧкыд молитва сэн помассяс кор,
Трачкакылӧны пипуяс — бипуръяс пыдди,
Ярмӧм би кывъя пелысь ас шынас оз сор.

Нитшка-туруна чулькъяс и пӧката сёнъяс
Бара гӧрдӧсь, и кытчӧ ог видзӧдлы, пыр
Аддза: кыдз пуыс зарнинас ньӧти оз донъясь,
Вӧрса казнаӧ гылӧдӧ, кытчӧдз оз быр.

Сиськӧс моз жӧ сентябрыслысь югзьыштӧм эрдсӧ
Здукӧн пузьӧдас тавося бӧръя кос тӧв,
Но и лым усьтӧдз нюръясын шнёпвидзас, дерт жӧ,
Усьӧм корйыс, код пу вожын быттьӧ-й эз вӧв.

Пуяс костӧдыс, мичлунсӧ асаліг, муна,
Раммӧм пармалысь лов шысӧ кывтӧг ог ов.
Кок ув дӧраыс — жугыльмӧм нитшкыс — оз тунав,
Сійӧ кок шыӧс дзебӧ тай, эг нин мед пов.

Вӧрыс енэжсӧ пыкӧ, ён, вынйӧра, зумыд,
Абу лишнӧй ме вӧръяса пельӧсас тан.
Аддза сарӧгӧсь пуяссӧ кор, петӧ нюмӧй,
Быттьӧ матысса ёртъяслысь аддза ме бан.