* * *

Пельк тӧлыс мед нин асъявылыс ӧвсис,
Быд чалльӧн пуяс ӧвтыштчӧны тӧвсьыс.
Ю берегӧдыс шонді кӧ эз уй,
Эз коль сэн эськӧ лыа вылӧ туй.

Водз чеччис шонді, сідз жӧ, кыдзи йӧзыс,
Ру сылы асьсӧ чышкӧд пыдди вӧзйис,
И шонді югзис-збодермис сэк сідз,
Мый зарниӧдіс здукӧн ыб и видз.

Збыль, сымда веж да югыдыс быд вожын,
Кыдз сэсся эскан сэк, мый вешъяс гожӧм,
Мый мича пӧра бара оз лок дыр,
Пӧсь гожӧм йылысь казьтылӧм оз быр.

Мен сьӧкыд вежӧртны, мый бара кӧдзыд лоас.
И визув томлун ӧмӧй гӧгӧрвоас,
Мый пӧрысьлун оз тыдав вояс пыр,
Но локтӧ сійӧ, асшӧр вынӧн тыр.

Кор ывла асъя югӧръясӧн ойдӧ,
Сьӧд вой йылысь мӧй сійӧ сэки мойдӧ!
И ме ог панлы воясыскӧд вен,
Зэв лӧсьыд шонді туйӧд кывтны мен,

Кӧн кыснан бӧрся гыяс вӧтлысьӧны
Да ветки пыжӧс тэрмӧдлӧны сӧмын,
Кӧн гыяс пиысь кыптӧ ылыс вӧр,
Корабльяс надзӧн мӧдӧдчӧны бӧр.

Сэк эска ме, мый олӧм — помтӧм-дортӧм,
Кыдз енэжыс, кыт лэбӧ менам ёртӧй,
Кыдз ланьтӧм видз, кыдз ытваыслӧн от,
Код ассьыс вынсӧ-сямсӧ весь оз лот, —

Кыдз баканъяс, кыдз каляясыс, выльысь
Тшӧтш быттьӧ-й берег вӧрӧ валӧн вынысь.
И пыжӧй бӧрся туй визь гартчӧ, кузь,
Мед, олӧм вуджиг, ассьым эг жӧ узь.