ЧЕРИ КЫЙЫСЬЯСЛӦН ПОСЕЛОК

Баканъяс моз катласьӧны каляяс.
Еджыд кымӧр пӧльтчис парус моз.
Быгзьӧм гыыс берегъяссӧ талялӧ,
Но оз пов посёлок, ньӧти оз.

Немла чери кыйысьяслы повнысӧ.
Керкаяскӧд орччӧн руа ты.
Татӧн, восьсаинын, налы овнысӧ,
Катерсянь моз кывны увгӧм шы.

И со, татчӧс керкаяс, кыдз пристаньяс:
Зымвидзӧны суднояс, со, пыр.
Аддзан да, посёлок быттьӧ исковтӧ
Ваыскӧд тшӧтш, биӧн югзигтыр.

Гажтӧмлунсӧ гыясыс тась вӧтлӧны,
Тшӧтш и налы югыд вой и лун.
Войпукны тан пыжӧн войтыр ветлӧны,
Пыжтӧг тан и киноӧ он мун.

Быдтор чери дука тан — канатъясыс,
Васӧд турун, эстӧн косьмысь тыв.
Якӧръясыс туй шӧрас и татӧнӧсь
Мышкыртчӧмӧн паськӧдӧмны сыв.

Лэчыд тӧлыс уличьясӧд нуалӧ
Еджыд быг да пароходлысь тшын.
И посёлок кывзӧ тылысь буалӧм,
Буретш сыысь содӧ сылӧн вын.