ЮСЬЯС

Висьми ме. А мамӧ шогӧ усис,
Бара пӧжӧ меным зверобой.
Нюжвидза, а биа бордъя юсьяс
Лэбалӧны юр весьтам кузь вой.
Кытысь найӧ? Восьта синмӧс — ӧтнам.
Сӧмын йирк — ог аддзы сэсся нем.
Куня выльысь — вемӧсӧн ли вӧтнам
Лэбач борд йыв петкӧдчӧ нин мем,
Сэтшӧм ён, мый лэптӧ тшӧтш и менӧ,
Сэтшӧм паськыд, мый и меным бур...
Вӧтӧн аддза Васюган, а сэні
Вежӧн тырӧм сибӧдлытӧм нюр.
Сё верст кузьта виж да рудов кадйыс
Ачыс асьсӧ кыӧ — и оз ор.
Мамонт куа пожӧмъяс, сьӧд вадъяс
Чукльӧдлӧны-гартчӧны кӧть кор.
Юсьяс да юсьпиян вадъяс вылын
Югыд васӧ гумльӧдлӧны сідз,
Мый и тёльскӧм шыыс кылӧ ылын,
Мый и ваас содӧ эзысь визь.
А кор енэж шӧрӧд юсьяс весьтын
Вуджас миян збодер вертолёт,
Разгысьласны юсьяс тан и эстӧн,
Гызьылас и сьӧлӧм, и лӧз от.
Весиг нюрыс югзьылас, кор бордъяс
Шеныштчасны ӧти бӧрся мӧд.
И кыдз тэрыб вертолётным ордъяс
Синтӧ ёран югыдсӧ — ог тӧд.
Чужан муӧй, ёна жӧ тэ ыджыд!
Код нӧ нӧшта ме кодь озыр тан?
Юсьяс — быттьӧ енэжыслӧн мыджӧд —
Тшӧтш и сылысь мичмӧдӧны бан.
Видзӧны скӧр ю и пузьӧм саридз,
Дзоридзалысь яблоня и льӧм,
Видзӧ тшӧтш и юӧн чужтӧм наридз
Мойдӧ пыртӧм юсьяснымлысь рӧм.
Школьницаяс еджыд платтьӧаӧсь.
Пӧсь строкаын аслас югыд сер.
Радлӧмысь, быд тӧждысь аддзан тайӧс —
Юсьлӧн рӧмыс лэдзчысьны оз сет.
Мамӧ шуӧ: «Шебрала вай содтӧд.
Этша узин. Шоныдінас узь».
Нюммуна: «А вевдорам тан, со тай,
Видзӧд, кымын швичкӧ-лэбӧ юсь».
«Мый нин, — шуӧ, — кытысь босьтін найӧс?
Тешкодь морт тэ. Тӧв ӧд ӧні, тӧв.
Куржӧвитіс пельӧс. Ӧшинь саяс,
Аддзан, бара лымйыс сапкӧ чӧв», —
Пельпомъяссӧ лэптыштліс да сідзи
Видзӧдліс ме вылӧ чуймигтыр.
«Лым кӧ-й лым», — тадз мамлы вочавидзи.
Узя... Юсьяс лэбӧны на пыр.