* * *

Виж корйыс кор гылалӧ расын,
Кор ойбыртӧ-вугралӧ рас,
Ас вӧр-ва сэк тӧдчӧджык аслыд,
И мичлуныс нӧшта нин ас.

И лолыд выль тӧждӧн сэк тырӧ —
Мый лоас на, водзвыв он тӧд:
Сы мичыслы, коді со бырӧ,
Век ыджыдджык доныс, век мӧд.

Сентябрыс оз лыддьысь быд рӧмӧн —
Оз лӧсяв кӧ, дыртӧ оз видз.
И медтуян рӧмӧдзыс сӧмын
Оз инмӧдчы, выныс оз сидз,

Оз инмӧдчы лун, быдса вежон,
И югзьӧдны гӧгӧр оз пов,
Мед мортлӧн век ёсь вӧлі вежӧр,
Мед шензьытӧг мортыс эз ов.