* * *

Став олӧм туйӧй шыльыд, —
тадз кӧ кылад,
эн эскӧй
менам ылӧдчӧмлы, эн.
Кыдз уналы, 
код ломалӧ свет вылас,
эз этша шогыс
шедлы тшӧтш и мен.

Осколокъяссӧ
перъя ӧмӧй лолысь?
И меысь бокті
войнаыс эз мун.
Ме ловъя на,
ме таладорын олысь,
а кымынлы сэн
кучкис бӧръя лун!..

И бӧрыннас —
нем ылӧдлыны асьтӧ —
эг сӧмын ӧтног
гажӧдчы да ов.
Эз тырмыв ун,
и вӧлӧга, и паськӧм,
но локтысь шудӧ
эскис менам лов.

И вермалі.
Быд дойыс эз на нэрмӧд,
эг усь, эг кус,
кыдз тӧв ныр улын сись.
Ас чужан мулӧн вермӧм —
менам вермӧм,
и ог мӧй
сылӧн дойясӧн ме вись!

Ни эзысь и ни зарни
ме ог асав,
и натӧг абу омӧль,
налы лов ог сет.
И ӧні, кӧть нин аслым
сизим дасӧд,
ме действуйтысьяс стройысь
ог на пет.