Я. М. РОЧЕВЛЫ

1.

Сэк, кор тӧла, Изьва гызьӧ.
Тэн и меным сійӧ ас.
Изьва гызьӧ — парма шызьӧ.
Сідз ӧд, дона изьватас?

Косьтӧг луныс кольліс гежӧд.
Мӧд ног шудыс ки оз сет.
Тӧдан: эз кӧ вӧв му вежӧм, —
Паськыд туй вылӧ эн пет.

Кадыс, кадыс помся гургӧ.
Водзӧ пыр — во бӧрся во...
Кад эз саймовт сьӧлӧм буртӧ, —
Сідз эз вӧвлы и оз ло.

Морт кӧ шуньгӧ олӧм шӧрӧд,
Сыкӧд йитвеж топыд пыр,
Лэптӧ кӧ мый вӧвлі-й тӧрыт,
Му выв тӧждысьӧмӧн тыр.

Пыдди пуктӧмлӧн пӧсь кытшын
Коми войтырлӧн бур пи...
Костыс арлыданым ыджыд,
Но кык друг нэм лоам ми.

Друглӧн друглы медбур козин —
Озырмӧдны олӧм бан.
Югзьӧ Куима важ кодзув,
Кыдзи-й куима роман.

2.

Шуньгӧ Му шарыс аскилы паныд —
Войся пемыдас туйсьыс оз кеж.
Олӧ йӧз пӧвстын ас вӧчлӧм пайыд,
Кутшӧм вӧвлін тэ — мӧдӧн он веж.
Он мӧй ӧні на бур кывнад ыззьӧд!
Гашкӧ-й тешкодь, но кӧсъя, мед сэн
Ловтӧ гажӧдысь Изьваыд гызьӧ,
Кыдзи гызьӧ на му вылас мен.