КОР ШУРАКЫЛӦ КУРАН УВ

А лӧсьыд куртны, кӧть и киӧн,
Кор мыштӧ гильӧдыштӧ тӧв.
А луныс! Таысь кыпыд сійӧ
Оз ло да-й некор эз и вӧв.
Пӧсь шонді гӧгыльтчӧ на вывлань,
И, быттьӧ лолалӧ веж от,
Сё пӧлӧс дукӧн тырӧм ывла —
Тшӧтш шонді югӧръяслы под.
Ӧд шонді пасйысис быд заӧ,
Быд турун сіын сылӧн пас.
Мед, кавшасьӧ кӧ небесаӧ,
Но сылы-й муыс нэмсӧ ас.
Мен сійӧн войтырыскӧд кокни,
Мый ӧтвыв кераныс оз кув,
Ог тӧдлы сэк ме дой ни, шог ни,
Кор шуракылӧ куран ув.
Кыдз быттьӧ дедъяснымлӧн выныс
Быд сӧн пом зэлӧдӧ — оз лэдз,
И, лолӧс вежышта да, выльысь
Ог прӧста войтыр пӧвстас педз.
Кӧть некор видзӧдлыны бӧрӧ,
Сы понда майшасьны оз ков:
И киыд-кокыд ветлӧ-вӧрӧ,
И ветлӧ уджӧн сьӧктӧм лов.