ЭМ НА, КОД ВӦСНА...

Кыдзкар сиктын и мамӧй на олӧ
Да и рӧдвужыс унакодь эм...
Мортлы, тӧдӧмысь, кувтӧдзыс колӧ,
Кодкӧ матыс мед гажӧдіс нэм.
Мед и быд пӧлӧс шоглуныс вуніс,
Мед и мольыдмис кокувса вутш,
Кӧть и лун шӧрын пемдылӧ луныс,
Кӧть и ме ог куш радлунті вудж.
Дедлӧн бадь пу, том коръяснад шпорӧд!
Мамлӧн ӧшинь ув, кыпыд век ло!
Лэччы, зэр ваӧй, челядь дыр шорӧд!
Войтыр, колльӧдӧй во бӧрся во!
Чужан му! Сійӧ ставнас мем дона.
Муса мем дзик быд пом, дзик быд дор.
Но, а этайӧ — медся на ёна:
Эм тай быдторйыслы асшӧр дон.
Став страна водзын шуа ог нымӧн,
Мый ме изьваса вӧр пулӧн чаль.
Эстӧн кыаӧн рӧммӧдӧм кымӧр —
Быттьӧ быгалӧ зарниа шаль.
Сійӧ кывтігмоз ӧвтӧ мем вывсянь —
Чужан му весьтті лэбовтысь пас.
Джуджыд вӧлӧсьтӧй, йӧзын кор кывсян,
Нӧшта нимкодь, мый меным тэ ас.
Век тай син водзын. А праздник лун кӧ,
Тан, ас му вылын, кӧн кӧть эг ов,
Эм на, код вӧсна лэптыны румка,
Эм на, код вӧсна лэптыны лов.