ПАССАЖИРСКӦЙ ПАРОХОДЪЯС...

Пассажирскӧй пароходъяс,
Зіль Печоранымлӧн сер...
Казьта важсӧ, ӧні кодӧс
Весиг йӧлаыс оз нер.

Воыс, воыс кывтіс кымын!
Буркӧд сорласьліс и лёк.
Шлопкӧм шынытӧ ог кыв нин,
Оз нин увгӧдчы свисток.

А ӧд вӧвлі аддзам ылысь —
Лэбзям горулӧ кыдз ньӧв.
Вошлӧ юлӧн веркӧс вылысь
Да и сьӧлӧм вылысь чӧв.

Вӧлі гӧлӧс серти тӧдам
Войнас кывтӧ-катӧ код.
Ветлӧдлінныд асшӧр ӧдӧн —
Валъявліс жӧ восьса от.

Лун и вой пыр аддзис синныд.
Эн жӧ довъялӧй тай весь.
Сэсся кӧджас саялінныд
Да он петкӧдчӧй нин сэсь.

Гожӧм уна шыа-рӧма...
Сӧмын тутсӧм ог кыв, ог.
Теплоходъяслӧн сирена
Ымӧстлывлӧ ӧти ног.